Tala o Fa’amasinoga
TETE’E NA TE LE’I FA’AFEFEINA LONA AFAFINE
Na teena e le tama lea o lo o tu’uaia i lona fa’afefeina o lona afafine, moliaga faasaga ia te ia, ina ua tulai i luma o le Faamasinoga Maualuga i le vaiaso na te’a nei, ma ua faatulaga ai loa lana ulua’i iloiloga mo le masina fou.
O lo o tuuaia le ua molia i lona faaaoga faasolitulafono o se fana, umia faasolitulafono se fana, atoa ai ma le faaoolima i le tulaga tolu.
O lo o taofia pea i le toese le ua molia sei vagana ua totogi le $3,200 ona faatoa mafai lea ona tatala o ia i tua.
LEILUA TUITELE
Ua taoto atu nei i se faaiuga a le Faamasinoga Maualuga se talosaga na faaulu e le loia a le alii o Leilua Tuitele, mo se poloaiga a le faamasinoga e tatala ai o ia i tua e faigaluega a’o tuli lona faasalaga faafalepuipui i le toese i Tafuna.
Na taua e le loia a Tuitele o Mike White e faapea, ua i ai le galuega tumau ua faamaonia e mafai ona galue ai le ua molia, o le mafuaaga lena ua ia talosagaina ai se poloaiga e tatala ai o ia i tua.
O se tasi o tuutuuga o le faanofovaavaaia a Tuitele, e mafai ona tatala o ia i tua e faigaluega, pe afai e i ai se galuega tumau e faamaonia atu e lana loia.
O Tuitele na se’i e le faamasinoga lana laisene ina ua ta’usala o ia i le solitulafono o le ave taavale ‘ona, peitai na maua o ia faafoeina se taavale ma molia ai loa o ia i le solitulafono mamafa o le ave taavale a’o se’i lana laisene, le solitulafono e faamalosia ai le tuli o aso e 90 i le falepuipui pe afai ae faamaonia.
SEAKERISE TUATOO
O le aso 15 o Me lea ua faatulaga e toe fofogaina ai le mataupu a le alii foma’i ia Seakerise Tuato’o, ina ua faailoa e le itu a le malo i le taeao ananafi i luma o le Faamasinoga Faaitumalo, o le a latou le failaina ni moliaga faaopoopo faasaga i lenei alii.
O le taeao ananafi na faatulaga e tatau ona oo atu i ai ua maea suesuega a leoleo sa faagasolo mai i le lua vaiaso talu ai, ona o le faalavelave tau taavale lea na aafia ai le taavale a le ua molia i Iliili, ma mafua ai loa ona tuuaia o ia i moliaga o le ave taavale ‘ona, faapea ai ma le ave taavale faatamala.
O lo o tumau pea le teena e Tuatoo o moliaga mama e lua o lo o tuuaia ai o ia e le malo, ma o loo tumau pea foi poloaiga a le faamasinoga o loo tatala ai o ia i tua e faatali ai le isi ana iloiloga lea ua faatulaga.
O le alii loia fautua ia Mark Ude o lo o tulai mo le ua molia.
SASA LE ULU O LONA TOALUA I LE LAUPAPA
O le ula lea ua tuuaia i lona sasaina o le ulu o si ona to’alua i se fasi laupapa, ua tuuaia nei e le malo i le moliaga mamafa o le faaoolima i le tulaga lua, ma le faamoemoe, o le taeao nei e tatau ona iloa ai pe faatulaga se ulua’i iloiloga o lenei mataupu i luma o le faamasinoga faaitumalo, pe tuu sa’o atu loa fo’i lea mataupu i luma o le faamasinoga maualuga.
O lenei mataupu na afua mai i le faaiuga o le vaiaso i ona tua atu i Pago Pago, ina ua maea se tauaga’upu i le va o le ua molia ma lona to’alua, ona oso ai loa lea o le ua molia i le taavale, ae tago lona toalua i se atigi fapu pia ma togi ai le ta’avale.
Fai mai le malo, o le taimi lea na toe tu ai le taavale, ma la’a mai loa le ua molia ma tago i se fagu pia e le’i tatalaina ma togi ai lona to’alua, pe’ita’i na misi. Na toe aapa le ua molia i se fasi laupapa sa taatia i tafatafa ane o le mea o lo o vevesi ai ma ta ai loa le ulu o lona to’alua ma manu’a ai, lea na faanatinati atu ai loa i le falema’i mo togafitiga.
O le tamaitai loia fautua ia Donna Clement o loo tula’i mo le ua molia, ae o le alii loia sili lagolago ia Cabel Poag o loo tula’i mo le malo.