So’o se fa’afiafiaga lava i le atunu’u e i ai lona taualuga, ma ua fa’apea fo’i ona talimalo le tatou Malo, ae i ai lona taualuga. I lenei tausaga, ua vala’aulia ai Ausiva mai Sale’a’aumua Aleipata ma Lano mai le Fa’asalele’aga, ae maise fo’i o le Fautasi mai le afio’aga o Salelologa - Le Tolotolo o le Tama Uli.

Fa’afetai i lo outou masi’i mai, peita’i, ua va’aia fo’i lo outou sao lava saunia ma le matagofie, ua fa’aoso ai fo’i le manu nai utufiu i le fiafia. Peita’i i a outou taualuga o nei mea uma, sa matua fa’afetaia ai le sao o a outou tama fanau i lo tatou nei malo, ae maise fo’i o le masi’i mai le o le fala masi’igata i Augafa’apae o le afio’aga o Sale’a’aumua, sa ia sausaunoa e fa’amae’a ai le fa’afiafiaga manaia. E ese mai lea sa sausaunoa fo’i le tofa le Tauto’oto’o a’o le Fofoga fetalai o le Maota o Sui o le fono faitulafono Savali Talavou Ale ma le Faletua, aua o i latou fo’i ma le pa’ia o aiga, sa talimalo i le masi’i mai o lea afio’aga.

Mai le afio’aga o Lano i le Fa’asaleleaga, na sausaunoa ai le afioga Vui Seigafolava Florence Vaili Saulo ma sa iloga fo’i ona matagofie ma le alofagia o lona sao mo lona afio’aga, ae o lo’o ia talimalo ai fo’i ma le afioga Muliagatele Paulo Saulo i lea aumalaga.

O le tofa Pati Faiai ma le Faletua sa latou talimalo i le masi’i fa’aaloalo mai a le Auva’a o le Tolotolo o Tama Uli, peita’i, e ui ina e le’i i ai se latou sao i le Pese ma le Siva, ae sa lagona o Lano lava o Salelologa lava lea, aua o “tama uma lava o le Fa’asalele ma le fa’atalatala se mata e emo.”

Fa’afetai i le a’ao mafola ma le agalelei o le susga Pati ma le faletua ma Aiga ona ua fo’i lea aumalaga ma le mama ua lomi ma le va’a ua goto, ae le o logo lelei le tulaga o le va’a i le tu’uga e pei ona mana’o ai le na talimalo. E le masani le Tolotolo o Tama Uli i le tulaga lea, na’o le mua sa mana’omia, peita’i, ua fa’alogo i tala, e le o le va’a lea sa mua ai i Samoa, o lea e aumai le va’a tuai e a’o ai, ae o le va’a moni lava e tutu’u ai, o lo’o nofo pea i Samoa e tatali le tu’uga o le Sisigafu’a a Samoa e fa’ailoga ai lona 50 tausaga.

Ma le isi, e fetaui lelei lea ma to’ai taunu’u o latou foe sipuni, e mafai ona fa’aemo ai le uila i le tu’uga o loma nei. Ia, se’i tatou mata’i se faiga o le a maimoaina i le aso tu’upoina.

O le taualuga a le afio’aga o Alataua i le latou pese matagofie ma le sao lelei tapena, o le afioga le Fa’asisina a’o le Senatoa o Alataua i le Maota Maualuga o le fono faitulafono a Tutuila ma Manu’a, Fuamatu J.V. Fuamatu.

I le itu o le latou siva, sa taualuga ai le ausiva mata’utia lea o alo ma fanau o le Sosaiete a le “SOFIAS’ i le itumalo Alataua, [Sosaiete O Fa’afafine I Amerika Samoa], e le latou Kuini ua mae’a fa’apaleina i le fa’ai’uga o le vaiaso na te’a, le Kuini Mizz Tepatasi Vaina. E ese mai lea sa sausaunoa fo’i le mamalu o le au vala’aulia e pei ona vala’auina fa’aaloalo ai e le tofa Lopa Seti mo le taualuga o le latou sao i le toe aso o le sisigafu’a 2012.

Mai le fa’afiafiaga a le afio’aga o Vatia na sausaunoa ai le afioga le Tama’ita’i o le Ao Gaoteote Tapatonu ma o le afioga fo’i le Kovana Itumalo o le Falelima i Sasa’e o le atunu’u. Na sausaunoa ai fo’i ma le afioga le Augafa’apae Sinata’aga Judy Mose e soa ai lana sausaunoaga i lea aso iloga ma le fa’ai’uga fo’i o le sao o Vatia i le sisigafu’a a Amerika Samoa 2012.

Mai le fa’afiafiaga a le afio’aga o Ofu i le Manu’atele, sa sausaunoa ai le afioga le Fa’atui Misa’alefua Hudson. O le au fa’afiafia lenei sa mua i ai faiva i malae o le atunu’u i le Malae i Tala o Lupelele i le ulua’i aso o le Sisigafu’a 2012. Na aiaiuli tofa i To’oto’o Le’i Sonny Thompson ma Velega Savali. O se ausiva na lanu i ula atoa ai le malae, ma ua iloga lava fo’i le lava tapena o lo latou sao e le tofa Fu’ega Nua ma le ausiva mamalu. Tau ina ia sao i ama le folauga a Amerika Samoa i le toega o lenei tausaga, ma ia alofa fo’i le Atua, foa’i le mau i o tatou aiga ta’itasi i le atunu’u, ae maise ia faifai malie faiva o tama a le Malo, ina ia fili ma le fa’autaga loloto ni o tatou ta’ita’i ae a la tatou faigamalo i le fa’ai’uga o lenei tausaga 2012.