Ads by Google Ads by Google

Volipolo o le Pasefika

Manumalo ‘au volipolo Amerika Samoai le ulua’i Ta’amilosaga Ipu o le Pasefika

O se ulua’i liki volipolo lenei ua fa’atautaia i le tatou malo e auai mai ai ni ‘au a nisi o malo o le Pasefika, ma ua fa’aigoaina ai fo’i e le ASVBA lea liki, o le Liki Volipolo a le Pasefika e sailia ai se siamupini o le sisigafu’a Amerika Samoa 2012.

Peita’i, mai fa’ai’uga ua mae’a fa’apineina ma fa’amau fa’ailoga fo’i, ua tula’i mai ai, ua tulaga ese le fa’atautaiga o le ta’aloga Volipolo i totonu o le tatou malo, aua e manumalo uma lava tatou ‘au voli i vaega uma sa tauva ai i lea liki.

Muamua o le vaega o Tama’ita’i:

 Na o’o lava le taumafai o le au volipolo malosi mai le konetineta o Ausetalia i le sailiga o le Ipu mo ‘Au a Tama’ita’i ina ua latou manumalo a’ia’i i le ‘au malosi mai Samoa o le “Puatausaga Girls.” Na mua’i faia’ina i latou i le Puatausaga i le seti muamua, peita’i, na toe fa’sagatonu loa le latou ‘au ma ua to’a fo’i e faia latou peleni masani o le ta’aloga, na toe fiu loa le Puatausaga e saili se manumalo mulimuli ane i seti e lua. O a’i o le ta’aloga lea sa tula’i mai: 13-15, 1-12, 15-13. Malolo lelei mai ai loa i latou e tatali le fetauiga a le Amouli Girls ma le taumafai Girls mai Pava’ia’i. Na muamua fo’i faia’ina Amouli i lea fetauiga, ae mulimuli ane manumalo i a latou seti e lua mulimuli ma maua ai le fa’ai’uga e fetaui i latou ma le Sonyx i le sailiga o le siamupini mo le Ipu a Tama’ita’i.

O le ta’aloga vevela lea fetauiga ina ua o’o i le taimi atofa e fa’amae’a ai le ta’amilosaga fa’avaomalo i le itupa o tama’ita’i i le fale ta’alo lava o Tafuna sa fa’atautaia ai i aso e lua o le Sisigafu’a 2012.

 Peita’i na ‘ese fo’i le lagona o tama’ita’i o le moafanua, e le’i tu’ua lava se avanoa i si ‘au masi’i mai, ae na fana uma lava le malo e Amouli ma latou maua ai seti e lua o le sailiga i le siamupini 2012  le Ipu a le Pasefika Volipolo Tama’ita’i, lea ua fa’asima nei i Amouli, Falelima i sasa’e. O ‘ai o lea ta’aloga e 15-12, 15-13.

Mai le vaega a le “Kuini” lea e masani ona “Kuiga” sa fetaui ai le ‘au masi’i mai Samoa o Kuini fo’i, ae fetaui ma le a’u fa’atali a tatou fo’i Kuini i ‘inei, e le’i tele i se pito, matua u’u mai le Kuiga o si ‘au masi’i mai, ma solipala i lalo, leai se manumalo na tu’u i ai e Kuiga Amerika Samoa. Sole, o le tou tausaga lava lenei! Sa tatau ona fa’amau le mea lea i se fa’aipoipoga a se tasi aua o lea sa ta’a le fili i le laueleele o le “Motu o Fiafiaga.”

O le vaega o Kuini nei sa latou faia lea taua mata’utia, o Kuini mai le Falelima i Sasa’e. Ioe le mafaufau ua tali tutusa lava o outou togi ma Kuini o le Falelima i Sisifo lea sa matua afulelea i le Sisiva i le mugala mo so outou ‘ai e ala i fa’afiafiaga mo le maimoaga a le mamalu o vala’aulia ma le malo atoa i le “Malae o Tala o Lupelele.”

Lea na fa’alua lava ona fa’ava’aia nai Kuini mai Samoa i lo latou malolosi ma le ta’uta’ua ua i ai nei, ina ua latou manumalo i le seti muamua e 15-9, 15-13. Kailo pe toe sau le Kuini lea ua se’ia atoa ma lona Kuiga i lenei tausaga.

O le vaega o tamaiti ta’a’alo e lalo ane o le 19 tausaga na fetaui ai lava tatou ‘au laiti nei e lua. Ua va’aia lava le tulaga lelei o lenei fa’agatama i le tatou atunu’u, ona o le vave fo’i ona kolenia o ta’a’alo a le fanau talavou ia, a’o le’i o’o ina ta’a’alo i ‘au matutua po’o A Team a le Volipolo.

O le ‘au malosi a le Sideout sa latou sipa ma le ‘au a le Filemu, ma ua iloga mai, o lo ua taumafai lava le Side Out ina ia latou maua le manumalo aua o a latou taumafaiga i lenei tausaga, o lo’o fa’ailo ai lo latou agaga alolofa atu i le latou uso ua maliu, Dominic Andrew Tautunuafatasi lea na latou lagomauina i lona oliolisaga tumau i le vaiaso na te’a.

Ua manumalo la le Side Out U19 i le liki o lenei sisigafu’a ina ua lua lava latou seti o manumalo ai i le Filemu i ‘ai e 15-13, 15-13.

O le fetauiga i le itupa o Ali’i  ‘A Teams’  sa maua ‘au e ta’a’alo ai ina ua manumalo mai le Laumua o Tumua mai Samoa i lona fa’ato’ilaloina lea o le Tausala i a latou seti e lua i le tasi a le Tausala mai Samoa fo’i.

O ‘ai o lea fetauiga mata’ina e 13-15, 15-10, 15-11. Sauni mai ai loa le Laumua o Tumua po’o ai o Puatausaga mai Samoa ma Side Out o Amerika Samoa e manumalo. O se ta’aloga mata’ina fo’i lea ta’aloga, aua e tau fai tutusa le malolosi o ‘au, peita’i, na fa’atamala lava Puatausaga ma manumalo fa’alua ai fo’i le Side Out i a latou seti e lua, ma fa’asolo atu ai loa le Side Out mo le su’ega o le Ipu a le Pasefika i le Volipolo.

O ai o lea fetauiga e 15-9, 15-10 ma sa toe saunia ai loa le Laumua o Tumua mai Samoa ma le Side Out mai Amerika Samoa mo le sailiga o le siamupini. Na tolu lava seti na fili ai le siamupini o lenei tausaga, lea na manumalo ai le Side Out muamua i ‘ai e  15-13, faia’ina lea o i latou ia Laumua o Tumua i ‘ai e 14-15 ae toe manumalo ai i ‘ai e 15-9. Ona manumalo ai lea o le Side Out i le ta’amilosaga atoa a le vaega o Ali’i fa’atasi ai ma le vaega o tamaiti talavou e i lalo ane o le 19 tausaga, o se tausaga lava mo le Side Out le 2012.

E mata’ina le ta’aloga i le tou taga’i atu i ‘ai o le fetauiga lea, ma ua fa’afiafiaina lava le Komiti Fa’afoe o le ASVBA i lenei tausaga, ona o se liki sili lea ona tele ua latou fa’afoea, ae ua fa’afetai ua taunu’u mea uma sa momo’o i ai le loto o le susuga le Peresetene Pio Gaisoa ma le laulauatofi, ia manuia mea uma!

O lo ua i ai fo’i se fa’amoemoe ina ia so’o le fau ma le fau i lea tausaga, ma ia saga fa’aleleia ai pea le tomai o fanau i ta’aloga volipolo ma fa’asolo atu ina lelei fo’i se tatou ‘au fa’avaomalo e tofia mo ni ta’aloga i fafo i le lumana’i. Ua fa’ailoa mai e tusa ma le 300+ tagata sa auai e maimoaina nei ta’aloga i aso ta’itasi, ma o se tele lea ua sili na’ua talu ona faia ta’aloga o lenei tausaga.

Fa’afetaia fo’i ‘au uma mai fafo ona o lo latou sapaia mai o le fa’amoemoe i lenei liki volipolo fa’avaomalo o le Pasefika, ma ua fa’aalia fo’i le agaga fa’afetai tele o Josie Afu i le mamalu o ‘au ta’itasi uma sa auai i lenei tausaga, “fa’afetai ta’a’alo fa’atausala.”

saunia: Leua Aiono Frost