Ads by Google Ads by Google

Tala o Faamasinoga

TOFIA UIAGALELEI AVEA MA LOIA TUTO’ATASI

Ua tofia nei e le Vaega Tofia o le Faamasionoga Maualuga le alii loia ia Marcellus Tala Uiagalelei e avea ma Loia Tuto’atasi, e sui tulaga i le loia tutoatasi sa i ai o Faamomoi Masaniai.

I se faatalatalanoaga a le Samoa News ma le susuga ia Uiagalelei sa ia taua ai e faapea, o nisi o mataupu ua amata galue ai i le taimi nei e aofia ai le mataupu faasaga i le Sui Fofoga Fetalai ia Talia Faafetai Iaulualo, atoa ai ma isi mataupu ia sa galue maumau ai le susuga ia Masaniai e pei o le mataupu a Filifaatali M. Fuiava ma Marie Ripley.

Sa ia taua lona taulimaina o faamaumauga uma mai le Ofisa o le Loia Sili e uiga i mataupu e tolu e pei ona taua, ma o le taimi nei ua amata ona ia agai iai mo le iloiloina o ia faamaumauga.

O le susuga Masaniai lea ua galue nei i le Matagaluega o Faamasinoga a le malo tele i Uosigitone, ina ua manaomia o ia e lea matagaluega latou te galulue i le tau foiaina o nisi o mataupu o loo tulai mai i Amerika Samoa nei.

ALOMA SIATAGA

O le tamaitai lea na tuuaia i lona faaoolima lea i se alii leoleo atoa ai ma lona faia o ni gaioiga e save’u ai le nonofo filemu o tagata lautele, ua tausala i le moliaga mama o lona tete’e lea i galuega a leoleo, ma ua faanofovaavaaia nei o ia mo le umi e 6 masina.

O le tamaitai o Aloma Siataga na taofia mai e leoleo i le masina na te’a nei, ina ua fesiligia e se alii leoleo o ia  i le mafuaga ua le faapipi’iina ai le laisene o lana taavale i le  vaega e tatau ona faapipi’i ai, peitai na palauvale le ua molia i le leoleo, atoa ai ma lona kikiina lea o le leoleo ao la agai atu i le taavale a le leoleo i le ofisa mo suesuega.

Na uluai tuuaia Siataga i moliaga o le tetee atu i leoleo, faaoolima i le tulaga tolu ma le faatupu vevesi i nofoaga faitele, peitai i le maliliega lea sa ia sainia ma le malo ma talia e le faamasinoga, ua ia tali ioe ai i le moliaga o le tetee atu i leoleo ae solofua e le faamasinoga isi moliaga e lua na totoe ai.

O isi poloaiga o le faanofovaavaaia a Siataga  e aofia ai lona totogiina o le salatupe e $50, auai i aoaoga fesoasoani ai i lona mafaufau ma le tulaga o le ita vave.

Fai mai faamaumauga a le malo, ina ia fesili le alii leoleo ia PSO. Pepe Mann i le ua molia i le aso na taofia ai lana taavale poo fea lona laisene avetaavale, sa faalogo atu le leoleo o palauvale atu le ua molia  ia te ia, faatasi ai ma le toe faaola e le ua molia o lana taavale o le a toe alu.

Na talosagaina e le alii leoleo o Mann nisi leoleo mo se fesoasoani, ma agai atu ai isi leoleo e toalua ma faatonu le ua molia e oso i fafo o lana taavale, peitai sa musu foi o ia atoa ai ma lona lafo o isi upu masoa i leoleo, ma i’u ina toso mai ai e leoleo o mai fafo o lana taavale ae tuu atu i totonu o le taavale a le alii leoleo o Mann, ma agai atu ai  loa le alii leoleo ma le ua molia i le ofisa mo suesuega, peitai o iina na ta kiki mai ai e le ua molia mai tua le ulu o le alii leoleo.

SUI KALAPU LAKAPI A NUUULI

E foliga mai o le a le faataunuuina faamasinoga autu o alii e toafa mai le kalapu kalapi a Nuuuli, ia o loo tuuaia i lo latou faaoolima lea i le alii laufali ia Ponifasio Vasa i le tausaga na te’a nei, ina ua manino i le iloiloga lea na faia i le vaiaso na te’a nei, o loo faagasolo talanoaga a latou loia ma le loia a le  malo, mo se maliliega aufaatasi e faamuta ai lenei mataupu.

Na faailoa e loia a i latou nei e toafa e aofia ai Fuatai Tago, Barry Wells, Iopu Siolo ma Uili poo Pelenato Barry e faapea, o loo faagasolo pea talanoaga ma le malo mo se maliliega e faamuta ai lenei mataupu.

E lei faailoaina mai se aso o le a toe fofogaina ai lenei mataupu, ae o le a faufua i le mautu ai o talanoaga o loo faia i le va o itu e lua.

O le alii e lona lima i ai i latou na tuuaia i lenei mataupu, o ia le ao Selefuti Tago, na toe tatala i tua i le masina o Tesema na te’a nei, ina ua tali ioe o ia i le moliaga mama o le faaoolima i le tulaga tolu.

O le aso 23 Iulai 2011 na tulai mai ai lenei faalavelave lea na manu’a tigaina ai le alii o Vasa.