Ads by Google Ads by Google

Sauni Leoleo faatino lana tiute masani puipuiga saogalemu atunu’u

Ua alo atu nei le Matagaluega o Leoleo mo le faatinoina o le latou tautua masani, mo le faamamaluina lea ma le puipuia o le saogalemu ao feagai ai le atunuu ma le faamanatuina o le 112 tausaga, talu ona sisiina a’e le fu’a a le Iunaite Setete i laufanua o Amerika Samoa.

I se poloaiga na tuuina atu e le afioga i le Komesina o Leoleo ia Tuaolo M. Fruean i Vaega taitasi uma o le Matagaluega, ua faalauiloa atu ai le polokalame ma vaega taitasi o le a galulue ai leoleo.

E fa vaega ua vaevaeina i ai tiute a leoleo mo le faatinoina o a latou faiva masani, lea e aofia ai le faafeaoina atu o malo faaaloalogia mai nofoaga o loo faamautu ai agai atu i le malae o le VA Stadium i Tafuna, ma toe momoli atu i fale talimalo o loo nonofo ai.

E ese mai i vaega ia, ae ua maea  foi ona tofia leoleo latou te tulimata’iina le saogalemu o le atunuu i luga o le alatele i soo se taimi, faapea ai isi e tiute i nofoaga taitasi o le a faia ai faagaioiga a le malo, ina ia mautinoa e i’u manuia le faamanatuina o le fu’a i lenei tausaga.

I le poloaiga na tuuina atu e le tofa Tuaolo i Vaega uma o le ofisa o Leoleo, o loo taua ai le leai lea o se leoleo e mafai ona malolo mai aso faamanatu e pei ona fuafuaina a le malo, ae o le a faatinoina uma o latou tiute e pei ona tauto ai.

O le a laei ai foi le toniga faapitoa a le matagaluega o leoleo i taimi o sauniga faapitoa faapenei, e pei ona i ai le ofutino paepae ma le ia lanu mumu.

O le susuga i le alii leoleo ia Lt. John Cendrowski o le a faauluulu i ai le vaega  o le a faafeaoina atu malo valaaulia.

O le susuga Cpt. Lavatai T. Sagapolutele o le a faauluulu i ai le vaega ua tofia latou te leoleoina le saogalemu mo malo valaaulia uma lava mai fafo, ae o le Sui Komesina o le a ia vaavaaia uma vaega ua tofia i ai leoleo e galulue ma tautua ai.

I se faatalatalanoaga ma le Sui Komesina ia Leseiau Laumoli na ia taua ai e faapea, o le tautua o le a ofoina atu e le faapito mo soo se tasi, ae o le a tautua lava le matagaluega o leoleo i le tulaga e masani ai lana tautua.

Ua fautuaina le atunuu ina ia aua le tagofia le ‘ava malosi ma uli le taavale, pe soona paka foi i nofoaga e faasa, ina nei avea ma auala e soli ai le tulafono.

Mo i latou uma e agai atu i fiafiaga mo le faaiuga o le vaiaso ma le taimi o le fu’a, ua fautuaina le tuu o le taavale i le fale ae vili se taxi pe vaai se tagata e le o tagofia le ava malosi na te uliina le taavale ina ia saogalemu le aiga poo i latou o le a malaga atu i le fiafia.

Ua fautuaina foi le atunuu ina ia mataala i soo se taimi e feoai ai i luga o le alatele i taavale, pe kolisi foi le auala pe a savavali, ina ia mautinoa e malu puipuia tagata uma.

O le aso Tofi na tea nei na amata faamamalu mai ai poloka a leoleo mo le vaitaimi lenei o le fua ma le faamoemoe, e faamaea i le aso 19 o Aperila.

“O le agaga maualuga o le afioga i le komesina ma le matagaluega, ia aua nei i ai se faalavelave matuia e tulai mai i le taimi o le aso fiafia o Amerika Samoa,” o le saunoaga lea a Laumoli.

fa’aliliu Ausage Fausia