Ads by Google Ads by Google

Sola Vaiala ma le Siamupini ...

o le Taito’a 7s TMO Pago Marist

Na matua faamalieina le silasila ma le maimoa a le silia i le toa 3,000, na molimauina le Ta’amilosaga o le Lakapi Ta’ito’a a le Malisi ma le TMO, aemaise o le sailiga siamupini i le va o Vaiala ma le’au malosi a le Tepatasi mai Aleipata, i le faaaogaina o le polo aemaise ai o gaioiga ma sikaili a tama taalo sa faia i totonu o le malae.

Ae sili ai i lo lena, o se avanoa taua na molimauina ai e le mamalu o le atunuu faapea ai malo mai fafo nisi o alo mai Samoa o loo taalo i le au taito’a 7s a le Manu Samoa, e pei o le susuga ia Tom Iosefo ma Faalemiga Selesele mai le Tepatasi, ae o Patrick Faapale mai le au a Vaiala, o ia foi lea sa mauaina le faailoga o le tama taalo o le taamilosaga.

Ua sola atu nei le kalapu lakapi mai le afioaga o Vaiala i Apia ma le Ipu atoa ai ma le faailoga tupe e $10,000, ina ua avea ma siamupini o le ulua’i taamilosaga ta’ito’a 7 a le TMO Pago Marist 7s lea na faatautaia i le faaiuga o le vaiaso na tea nei.

O nai sasi laiti na vaaia i le au a Tepatasi na maua ai loa ma le avanoa o Vaiala e faagasolo mai ai le polo, ma o latou laasia ai faa fa le laina sikoa a le Tepatasi, ma maua ai o latou ai e 24 i le 14 a le au mai Aleipata.

E pei ona silafia, o le au mai le afioaga o Vailele na umia mai le siamupini o le taamilosaga lenei o le fu’a i le lua tausaga talu ai, a’o faatautaia e le Iuni Lakapi a Amerika Samoa (ASRU) lenei faamoemoe, peitai o le tausaga lona tolu lenei o le taamilosaga faavaomalo mo le sisiga fu’a, ae o le ulua’i tausaga fo’i lenei ua faatautaia ai e le TMO Pago Marist lenei faamoemoe, lea foi e le’i manuia ai le taumafaiga a Vailele ina ua faiaina i le au a Tepatasi i le semifinal o le Ipu autu.

Na taua e le faiaoga o le au a Vaiala ia Rudy Leavasa lona fiafia tele ina ua manuia le taumafaiga a lana kalapu i le faamoemoe a le TMO Marist Pago 7s i lenei tausaga.

Sa ia taua i le Samoa News e faapea, o se uluai taimi lea ua malaga ese mai ai Vaiala e tausinio i ni taamilosaga faavaomalo faapenei, lea foi ua faamanuiaina ai, ma o le faanaunauga, e toe fia malaga mai foi e tausinio i le tausaga fou, pe afai e toe maua atu se isi valaaulia.

O le susuga ia Leavasa sa avea foi ma sui o le Samoa A i tausaga ua mavae, sa taalo foi i au fili a tamaiti aoga a Samoa, lea sa masani ona malaga taamilo i Niu Sila ma Ausetalia, o ia foi lea na taitaia le  kalapu a Vaiala ma manumalo ai i le taito’a 7 a le Marist St. Joseph i le tausaga na tea nei.

O le au a Vailele na mauaina le tulaga tolu a’o Laulii Lions i le tulaga fa, ina ua manumalo Vailele i le la taaloga.

I le vaega o le plate ua manumalo ai le au mai Vaimoso,  ina ua faiaina ai le au a le TMO Marist Pago 7s i se taaloga finau, i ai e 14-7.

O le Bowl ua manumalo ai ai le au a le Apia Maroons ina ua faiaina ai le au a Fagaali mai Samoa i ai e 31-5, ma le faailoga o le shield ua manumalo ai le kalapu a Avele-Pago ina ua faiaina ai le au a le Knights mai Utusi’a i ai e 17-7.

E le’i manuia le taumafaiga a le au masii mai Tonga, le Vava’u Tonga 7’s ina ua faiaina i le TMO Marist Pago 7s i le semifinal o le plate.

Na faafetaia e le alii kovana ia Togiola Tulafono le kalapu a Malisi i Amerika Samoa nei ona o le mafai lea ona tuu faatasia o lenei faamoemoe taua.

Sa ia faafetaia foi pisinisi uma sa lagolagoina le taamoemoe a Malisi, aemaise ai le kamupani a le TMO sa lagolagoina malosi fuafuaga o le taamilosaga i lenei tausaga.