E toalua alii pagota o loo tuli ni a la faasalaga faafalepuipui i le taimi nei, ua faamaonia i se suesuega faafuasei sa faia e le Matagaluega o Leoleo i le aso ananafi, le i ai lea o le vailaau oona o loo i totonu o le fualaau faasaina.

E lei faailoaina mai poo a fualaau faasaina ia na mafai ona maua i totonu o tino o alii ia e toalua, ina ua faia a laua suega i le vaiaso nei.

O lea suega faafuasei na faatautaia lea e le Vaega a le Ofisa o Leoleo o loo gafa ma le Taulimaina o Mataupu tau Fualaau Faasaina.

E lei faalauiloaina mai igoa o alii pagota e toalua ia ua maua a laua ova, na pau le ripoti na mafai ona tuuina mai, o le a tuuina atu i le Ofisa Faanofovaavaaia ma le Ofisa  o le Loia Sili igoa o i laua ia faatasi ai ma le ripoti e uiga i le suega sa faia.

E le o se taimi muamua lea ua faia ai ni suega faapea i totonu o le toese i Tafuna, ma faamaonia ai le faaaoga e nisi o pagota o fualaau faasaina a’o tuli ai a latou faasalaga.

E toalua isi alii pagota na faamaonia i se suega sa faia e le Ofisa Faanofovaavaaia i le lua masina talu ai, sa laua faaaogaina fualaau faasaina.

O i latou uma lava o loo faasala e le faamasinoga i le falepuipui, ona o solitulafono e fesootai ma le umia o fualaau faasaina poo le tagofia lea o le ava malosi, e poloaina i latou ina ia aua nei o latou toe tagofia le ava malosi poo ni fualaau faasaina, o ni vaega ia o tuutuuga o a latou faanofovaavaaia.

E poloaina foi e le faamasinoga le faia o ni a latou suega i soo se taimi ina ia mautinoa ai, latou te le o tagofia pe faaaogaina foi fualaau faasaina.

O alii pagota e toalua ia na maua i ai vaega o fualaau faasaina i le lua masina talu ai, sa faamaonia mai ai e faapea, o le fualaau e taua o le Oxycodone lea na aumai i le falemai e fesoasoani i le foiaina o le tino tiga na maua i o la tino.