Na matua fa’atumulia uma lava nofoa o le Lecture Hall a le Kolisi Tu’ufa’atasi i le to’atele o fanau a’oga mai a’oga maualuluga a Samoana, Fagaitua, Leone, South Pacific Academy na latou fa’atauaina le avanoa e fa’atalanoa ai ma le Vaega o A’oa’oga Fa’apisinisi a le Kolisi, ina ia fa’amasani le fanau o le a fa’au’u mai a’oga maualuluga, i ni a latou filifiliga tatau e ono faia mo so latou tomai saili i a’oa’oga maualuluga pe a mae’a ona fa’au’u mai a’oga maualuluga.

“O se avanoa lelei lenei, e mafai ona outou fesiligia ai se fesoasoani a lenei fo’i itu o A’oa’oga Maualuluga, ina ia mautinoa ua outou tausa’ili tomai e aoga mo i outou i le lumana’i, ae fa’afiafiaina ai fo’i outou i ituaiga tulaga e mafai ona si’itia i ai o outou tagata pe a i’u lelei a’oa’oga i lea matata e aofia ai: Su’etusi ma Tausitusi, Pulega o se Pisini ma fa’atu ni pisinisi tuma’oti, Pulega o Tagata Faigaluega ma Aiaiga e atili atina’e ai le Pisinisi, ae maise o le fa’amaumauga o fuainumera aoga tele i Pisinisi.”

O se saunoaga lea a le tama’ita’i o lo’o avea ma fa’auluuluga o le vaega o a’oga’oga maualuluga i le Kolisi Tu’ufa’atasi, i lana saunoaga amata o le taeao fesilafa’i i le va o fanau a’oga na asiasi atu, ma i latou le taupulega o a’oa’oga fa’apisinisi a le Kolisi e aofia ai ma fanau o lo’o tau’avea nei mataupu i le kolisi i le taimi nei.

Ona o nei fanau uma sa filifili lelei mai e a’oga uma o lo’o a’oa’oina ai ina ia avea ma sui o i latou e o’o ane i lenei polokalama a le BAOA [Business Ambassadors of ASCC], ua va’aia lo latou la’ei fa’apisinisi, ua foliga o ni tagata faigaluega i latou uma, ma ua talafeagai lelei ma le anava tau’ave a le Vaega o A’oa’oga Fa’apisinisi a le Kolisi.

Ua fa’ailoa mai e le Fa’auluuluga o A’oa’oga Fa’apisinisi a le Kolisi, Dr. Faofua Fa’atoafe, “O le tolu ai lenei o tausaga, o latou faia nei galuega tima’i i le fanau a’oga i A’oga Maualuluga uma o le teritori, ina ia mafai ona fa’ateleina le fanau a’oga e fiafia i mataupu fa’apisinisi i a’oa’oga i le Kolisi i le isi tausaga a’oga fou.”

Ua ia fa’ailoa mai fo’i, sa masani ona o i latou i tua i a’oga maualuluga, peita’i, ua fuafua atu e ia, e tele le taimi e fa’aaluina e i latou, peita’i, e sili atu ona o mai le fanau a’oga i le lotoa a le Kolisi, e una’ia ai fo’i o latou loto, ina ia fiafia e ulufale i le Kolisi mo a’oa’oga maualuluga, ae le o le fa’ama’amulu mai le olaga a’oa’oina.

“E sili atu ia i matou ona o mai le fanau i totonu o le tatou Kolisi, e fa’afaigofie ai ona mautu a latou filifiliga e tau’avea latou a’oa’oga fa’apisinisi po’o nisi lava tomai ua ofoina atu e le tatou Kolisi i le isi tausaga a’oga.”

“O le fa’amasani fo’i i le va’ai i le nofoaga ma iloa lelei Ofisa e ao ina latou fa’afeso’ota’i, ae ese ai ma le fetaui ma latou uo ua mae’a a’oa’oina i le Kolisi, o i si nei mea e una’ia ai o latou agaga ina ia latou ulufale i le Kolisi ma a’o’oga ai.” O se isi lea toe fa’aopoopo a le tama’ita’i taiulu o A’oa’oga fa’apisinisi.

Na vaevaeina le aotelega o le fanau a’oga sa auai i vasega e tolu mo le isi soso’oga o le latou taeao fa’aa’oa’o i a’oa’oga i le kolisi, ina ia mafai ona maua ni fa’amaumauga lelei mo le vasega fa’apisinisi e mafai ai ona latou fa’amaumau lenei tausaga ma le latou taumafaiga e una’ia fanau e ulufale i le Kolisi.

O nei vasega e tolu ua tu’ueseeseina ai le fanau ua mae’a ona faia latou filifiliga ina ia latou tau’avea mataupu fa’apisinisi i le Kolisi, o le isi vasega o isi tomai eseese ae le o le fa’apisinisi, ma le vasega mulimuli, o i latou ia e le’i faia se latou filifiliga, ma ua le mautinoa lava se latou fa’ai’uga faia i o latou olaga a’oa’oina i le Kolisi pe leai fo’i.

O le tama’ita’i taiulu sa fa’atautaia le vasega a i latou ua le mautinoa se filifiliga e faia, o Athena Mauga e na te tau’avea le vasega o i latou e tau’avea mataupu fa’apisinisi i le Kolisi, ae o le susuga Lam Yuen Jr. sa ia fa’atautaia le vasega a i latou o isi uma lava kosi o tau’avea i le kolisi.

E mautinoa i latou na le mautu se filifiliga, ua o ese mai le lotoa a le Kolisi Tu’ufa’atasi, ua mae’a faia a latou filifiliga tatau, aua o le tima’i lea sa fa’aofi i o latou loto e le tama’ita’i taiulu o a’oa’oga fa’apisinisi a le kolisi, ua matua lava ma totoe e faia ai le latou filifiliga tonu.

Ona o lea fo’i o le a mae’a a’oa’oga o lenei afa tausaga, ua tulata fo’i i taimi e amatalia ai lesitala i le Kolisi lava latou, ma ua tima’ia ai le fanau, ina ia filifili toto’a i tomai o lo’o sili ona mo’omia e le tatou malo ma pisinisi uma lava o i ai, e mafai ai ona fa’atautaia a latou kamupani ma matagaluega ta’itasi o le malo, e ao lava ina i ai le vasega o tausitusi ma su’etusi ia mautinoa, o lo’o aluga lelei le fa’atautaiaga o pisinisi fa’alotoifale o le tatou malo.

Ina ua mae’a le aso atoa o tima’iga sa pa’u i le a’ai o finagalo o le fanau talavou, sa i ai se latou fa’atasiga mulimuli i le faleta’alo o le Kolisi ma faia ai se taumafataga o le aoauli, ma latou mavae ai, ae ua fa’afetai, ua mae’a faia se filifiliga tatau a nisi o le fanau, sa le gaua’i tele o latou loto, ina ia saili a’oa’oga lautele, nai lo le fa’atalale i le soifuaga talavou ua ia maua i lenei vaitau.

I se talanoa mai a se tasi o ali’i talavou mai le South Pacific Academy, ua ia fa’ailoa ai, “E ao ina ou tau’avea mataupu fa’apisinisi aua o a’u lea e fa’amoemoe o’u matua ou te fa’atautaia le la’ua pisinisi i Amerika Samoa nei, e le o mama la ia te a’u lea tulaga, ma le mafuaga o le o’o mai i le Kolisi i le taeao nei.”

Matagofie le vave ona faia o lea tima’iga e lea vaega o le Kolisi, e lelei pe afai ae fa’ata’ita’i uma fo’i i ai isi kosi tau’avea i le Kolisi, ina ia le tau fetineia’i solo ai le fanau a’oga i vaitaimi o lesitala.