E tasi lava faanaunauga o alo a Samoa ua lauiloa ma logologoa o latou talaaga i le taaloga  o le lakapi, o le fia vaai lea i se au taito’a 7 faapea ai ma se au taitoa 15 a Amerika Samoa, o ofi atu i falagamaea a le lalolagi, e pei fo’i ona i ai au a Samoa ma isi atunuu o le Pasefika i le taimi nei.

Ina ina ua fesiligia e le Samoa News se tasi o alo o le atunuu sa avea muamua ma uigi saoasaoa a le Manu Samoa i le tele o tausaga ua mavae, le afioga ia Muliagatele Brian Lima i sona finagalo i le tulaga ua i ai le atina’eina o le lakapi i Amerika Samoa nei, sa ia taua ai e faapea, e tele le avanoa e ausia ai e Amerika Samoa le tulaga maualuga ua oo i ai au tetele a le lalolagi, pe afai e finau pea e atina’e ma faaleleia le taleni i tausaga uma.

“E leai se isi auala e mafai ai ona televave le atina’eina o le taaloga lakapi i Amerika Samoa nei, e pei o le faia lea o taamilosaga e pei o le taamilosaga lea ua faia e le Malisi Sagato Iosefo i le tausaga nei, ma ia faaauau atu ai lava i isi tausaga o loo i luma, ina ia mafai ai ona faatosina mai isi au mai fafo e taaalo ma au a Amerika Samoa, ma atina’e ai pea le taaloga lakapi,” o le saunoaga lea a Muliagatele.

Saunoa Muliagatele, sa tau amata foi faapea le taaloga lakapi i Samoa i tausaga ua te’a, peitai ina ua amata e le kalapu a le Marist St. Joseph ana taamilosaga faavaomalo e pei ona faaauau mai ai lava i le taimi nei, o iina na vaaia ai loa le atina’eina o le taaloga lakapi ma faaauau mai ai lava seia oo mai i le taimi nei.

Saunoa Muliagatele, e maualuga lona talitonuga e mafai foi e Amerika Samoa ona ausia le tulaga maualuga ua i ai Samoa ma isi au tetele a le lalolagi i le taaloga o le lakapi.

“Ou te talitonu afai e mafai e Samoa ona ausia  le tulaga maulauga lea ua i ai nei lana au, e tatau foi ona mafai e Amerika Samoa, ma,o la’u tatalo lena o loo i ai, ou te fia vaai i se au mai Amerika Samoa nei i taamilosaga tetele a le lalolagi o loo faagasolo i tausaga taitasi, e le gata i le taito’a 7 ae aofia ai foi ma le taitoa 15,” o le saunoaga lea a Muliagatele.

O le lagona lava foi lea e tasi na faailoa e le afioga ia Papaliitele Peter Fatialofa, lea sa avea muamua ma kapeteni o le au taitoa 15 a le Manu Samoa mo le tele o tausaga.

Saunoa Papaliitele, e mafai e Amerika Samoa ona siitia le tulaga o le lakapi pe afai e galulue faatasi kalapu ma tama taaalo e tausisi ma mulimulita’i i tulafono o loo faatautaia ai taaloga a le Faalapotopotoga o taaloga lakapi a le lalolagi, le IRB.

“Ou te fia vaai i se au a Amerika Samoa i soo se taamilosaga o loo faagasolo nei a le IRB, o le agaga maualuga ia te a’u, ia ausia e Amerika Samoa le tulaga lea foi ua ausia e lona uso mai Samoa faapea ai isi atumotu o le Pasefika,”o le saunoaga lea Papaliitele.