Ads by Google Ads by Google

Feiloa’i ma lulu aao ma nisi o ali’i iloga ta’aloga lakapi

E foliga eseese lagona o le atunuu a’o aga’i atu i le faataunu’uina o le ta’amilosaga ta’ito’a 7 i le faaiuga o le vaiaso nei, ina ua maua le avanoa o nisi e feiloa’i, silasila ma lulu aao ai foi ma nisi o alii iloga i le taaloga lakapi i le lalolagi, e pei o le kapeteni a le au taitoa 7 a Niu Sila ia D.J Fobres o Papaliitele Peter Fatialofa ma Muliagatele Brian Lima.

O le Aso Lulu na te’a nei na toai taunuu mai ai malo faaaloalogia uma lava mo le taamilosaga taitoa 7 o le sisigafu’a i lenei tausaga, lea ua faamoemoe e amataina i le itula e 9:00 i le taeao nei, i le malae a le V.A Stadium i Tafuna.

O le ulua’i feiloaiga sa faia e le Kalapu a Malisi Sagato Iosefo i lona nofoaga autu i Tafuna, e ala i le ‘ava o feiloaiga e faafeiloa’i ai malo mai fafo e aofia ai ma alii laufali ua faamoemoe latou te faatautaia lenei faamoemoe.

E le’i mafai ona taunuu mai se tasi o ali’i sa faamoemoe e avea ma malo faaaloalogia i lenei faamoemoe, le susuga ia Jerome Kaino ona o nisi o mafuaaga le maalofia.

Na tumutumu le malae vaalele i Tafuna i nisi o paaga o le taaloga lakapi, ina ua lolofi atu latou te fia molimauina le toai taunuu mai o nisi o fetu pupula i le taaloga lakapi, aemaise ai lava le alii o Fobres lea faatoa maua le avanoa e tuvae mai ai i laufanua o Amerika Samoa.

O nisi na maofa ina ua faatoa vaai tino lava i foliga o lenei alii, ma o lagona fiafia na mafai ona faatinoina e ala i le pa’i atu i ai ma lulu lima ma lenei alo o le atunuu e faafeiloai ai lona taunuu mai.

Na maua le avanoa e fesiligia ai e le Samoa News le susuga Fobres e tusa ai o le avanoa ua mafai ona ia maua e malaga mai ai i Amerika Samoa nei, e avea ma se tasi o malo faaaloalogia i le taamilosaga taitoa 7 o lenei tausaga.

“O se lagona faagaeetia ma le fiafia ina ua ou maua lenei avanoa ou te malaga mai ai e auai ma molimauina le faagasoloina o le taaloga lakapi i Amerika Samoa nei, o lo’u taimi muamua lenei i Amerika Samoa ma ua tuli mata’i fo’i la’u vaai ou te fia molimauina le tatala aloaiaina o le taamilosaga i le aso a taeao (taeao nei)”, o le saunoaga lea a Fobres.

Na faafetaia e le afioga Papaliitele le avanoa ua mafai ai ona valaaulia i latou e le kalapu a Malisi e malaga mai e fai ma molimau i lenei faamoemoe.

“O se avanoa lelei lenei mo Amerika Samoa e siitia ai le tulaga o le taaloga, ina ia ausia tulaga maualuluga ma mafai ai ona pei o nisi o au tetele o le lalolagi e aofia ai Niu Sila, Fiti ma Samoa mai le Pasefika nei,” o le saunoaga lea a Papaliitele, o se tasi o alo Samoa ua loa tausaga o taalo i le taitoa 15 a le Manu Samoa, lea fo’i sa avea ai o ia ma Kapeteni mo le tele o tausaga.

E ui e le fou le malaga mai o le afioga ia Muliagatele Brian Lima i le teritori nei, peitai o lona auai mai i lenei tausaga na ia taua ai, e le o toe sau o ia o se tama taalo, ae o loo malaga mai o ia o se fesoasoani poo se faiaoga foi e lagolago i le atina’eina o le taaloga lakapi i le teritori nei.

“Ua ou fiafia ina ua ou malaga mai e auai i lenei faamoemoe, ma ou te talitonu fo’i, o le a maua se avanoa e fesoasoani atu ai i nisi o kalapu lakapi i le teritori e faasoa atu ai le taleni ina ia mafai ai ona atina’e le taaloga lakapi, ma ausia ai e Amerika Samoa tulaga maualuluga e pei ona i ai isi foi au tetele i le lalolagi,” o le saunoaga lea a le alii sa avea ma uigi ta’utaua a le Manu Samoa mo le tele o tausaga.

O nisi o alo iloga a Samoa i le taaloga lakapi o loo malaga mai e aofia ai le alii sa avea ma numera 10 a le Manu Samoa i tausaga ua mavae, o ia lea o Rodger Warren, lea o loo avea ma faiaoga a le au taitoa 7 a Malisi mai Apia o loo malaga mai i lenei faamoemoe, o le afioga ia Galumalemana Rudolf Moors sa avea muamua ma faiaoga o le au taitoa 7 a le Manu Samoa, atoa ai ma le afioga Anae Tui Komiti, le alo a Samoa lea ua avea nei ma laufali faavaomalo a le IRB.

O le po anapo na faataunuuina ai le uluai faafeiloaiga aloaia o malo mai fafo, i se sauniga na taitaia e le malo i le maota o Lee Auditorium i Utulei, lea foi na maua ai ma le  avanoa e saunoa ai le alii Palemia o Samoa, susuga Tuilaepa Lupesoliai Sailele Malielegaoi, faatasi ai ma le tele o faafiafiaga eseese na molimauina ai e le atunuu i lenei faamoemoe.

O le a mafai ona maua se isi ripoti e tusa ai o faatalatalanoaga sa faia e le Samoa News ma nisi o fetu pupula i le taaloga lakapi i isi a tatou lomiga o loo mulimuli mai.