Ads by Google Ads by Google

TAPENA ‘OFU MO LE SAO O LE MANU’ATELE — PESE & SIVA

Ua le fa’atafa le afio’aga o ‘Ofu i le afio le afioga le Fa’atui Misaalefua, susu ai le Usoali’i ma Tama Fa’alagia ae tainane le fetalaiga ia i la’ua To’oto’o ma upu ia te oe le ‘Ofu.

Ina ua avanoa, sa maimoaina fo’i le matagofie o le taumafaiga fa’atausala ua alofaiva i ai ‘Ofu, ma  ua amata ona fa’atasia a latou fa’ata’ita’iga i le Malae Ta’alo, le Tala o Lupelele i Tafuna, ina ia mautinoa ua siva ma pese i latou, ae ua iloga le leo tele e ao ina o’o i ai, ina ia le fa’aletonu le fa’afofoga manino a le mamalu lautele i se sao o le Manu’atele i le Sisigafu’a o le 2012.

Masalo o le fa’aupuga lea, ‘ua tapena fa’afafine to’aga le fa’amoemoe, e le o mama i le afioaga lo latou vala’auina, ae maise ai o ‘Manu’a lava na toto ai le Ua’ lea ua manuia ai Samoa na atoa.

Fa’afetai aua ua iloga manuia o le Atua i so’o se vaipanoa o le atunu’u, ua lasi ai fa’amanuiaga nei, peita’i, o le fa’afiafiaga i le Pese ma le Siva, ua tutula’i tofa i To’oto’o, Velega ma Le’i e puipui ma fa’amamalu le fa’afiafiaga a le afio’aga.

O le Ta’ita’i o le fa’amoemoe atoa, ua tu’uina lea ia Faletui Fu’ega Lua Moliga na te fa’afoea, ma ua va’aia le tutua’ai o lana susuga e fa’aleleia ma fa’atonutonu le maualuga o le pese, ae o le taina fo’i o le piano ma mea fa’aili, ina ia leai se sasi o le sausaunoaga a le ausiva e silia ma le 200 o i latou.

O e o lo’o fa’aluma ma fetamitamia’i i le lotoifale o le ausiva e fa’afiafia le mamalu o le aumaimoa, ua aofia ai le susuga Logo Taua’i, o ia lava lea sa ia a’oina le siva, e afua mai le omai i totonu ma so’o se ituaiga taga o le a maimoaina, ae o se pese fo’i o le a fa’afofogaina i lea aso atofa.

Ina ua fesiligia i ni fe’au taua o le a fa’ailoa mai i le pese, ae tali le ali’i a’o pese, “O Ofu na o mai e fa’afiafia ma fa’afetai i le Atua, aua ua  mae’a lenei tausaga manuia, e le fiafia Ofu e fa’asea na’ua i galuega fa’atino a le Malo po’o le se ‘ese mai fo’i le fa’avae o se mea ua mae’a fa’ataoto, peita’i, e te fa’afofoga lava i ai, pe a o’o i le taimi e te auai ai i lea aso i le taimi atofa mo le fa’amoemoe.”

O le ala tonu lea, ua filifilia ai e le Komiti o le Sisigafu’a 2012, Ofu Manu’a, latou te tatala fa’afiafiaga o Pese ma Siva i le aso Lua, i le malae o Tala o Lupelele i Tafuna, aua o le sao o le Manu’atele i le fa’ailogaina o le la’ua Fu’a o le la malo e tautai lua ma Tutuila, o se  faigamalo fa’ateritori o Amerika ua atoa nei le 112 tausaga o osia mai.

I le itu o lo o fa’amoemoe i ai le aufaipese ma le ausiva, o le tausoa lea a le Fa’aili, ua i ai le susuga Lualua Isopo o le Ta Pese, La’auli Sea i le Ta pate, ma le ta tamepelau i le taimi o le siva sasa fa’atafiti a le ausiva tele ua tula’i mai ai le susuga Fa’afetai Ta’amu.

O lo o tapua’ia fo’i le taumafaiga atoa a le afio’aga e le pa’ia maualuga i Ao Fa’alupega a le afio’aaga, ae maise o alo o le afio’aga o lo’o galulue i isi afio’aga i so’o se fata faitaulaga a le Atua i Amerika Samoa.

Manatua, e le o fa’aalia mai e Ofu se a’ano o le taumafaiga a le afio’aga e ala i lana pese ma le siva, ae o le ‘ai lena o fa’afiafiaga i so’o se tausaga, e taofiofi le fa’ailo se’ia o’o lava i le taimi e fa’atino mai ai.

Ia manuia ou faiva Ofu, o ou mama na!