E toalua ni alii ua tuuaia e le malo ona o se faalavelave na aafia ai se teineititi e 16 tausaga le matua, lea ua i’u ina maitaga ai o ia.

Talu ai o puipuiga i lalo o le tulafono aemaise ai e i ai le sootaga a i laua ua molia nei ma le teineititi na aafia, o le a le mafai ai e le Samoa News ona faalauiloa suafa o alii nei e toalua.

O le isi o i laua e 22 tausaga le matua ae o le isi o se tama e 62 tausaga le matua e pei ona taua i faamaumauga a le faamasinoga.

Na tutulai i laua i le aoauli ananafi i luma o le faamasinoga faaitumalo mo le fofogaina o moliaga a le malo, ma ua toe faatulaga le isi a laua iloiloga i le taeao o le Aso Tofi o le vaiaso nei.

O lo o tuuaia i laua nei e toalua i moliaga mamafa e lua e aofia ai le faiaiga i se teineititi e laititi i lalo o le tulafono faapea ai ma le tagofia o itutinosa o se teineititi i le tulaga muamua, ma le moliaga mama o le faia o ni gaioiga e lamatia ai le saogalemu o se alo e laititi i lalo o le tulafono.

I faamaumauga a le faamasinoga o lo o taua ai e faapea, o le aso 27 Fepuari 2012 na faafesootai ai e se tasi o le aiga o le teineititi na aafia le ofisa o leoleo, ma logo i ai le faalavelave lea ua mafua ai ona ma’itaga lenei teineititi.

Na fesiligia e leoleo le teineititi na aafia ma ia faamaonia ai, sa latou faiaiga ma i laua e toalua.  Na faailoa e le teineititi i leoleo igoa o i laua sa latou faiaiga.

Na taua e le teineititi i leoleo e faapea, o le masina o Tesema 2011 na amata ai ona la masani ma le alii e 22 tausaga, peitai na faatoa la faiaiga i le masina o Ianuari 2012, ae  o le toeaina 62 tausaga sa la faiaiga i le masina o Tesema 2011.

Fai mai le teineititi,sa fai atu le ali’i lea e 62 tausaga le matua ia te ia, e aua ne’i ona talanoa i se isi e uiga i le mea ua tupu ia te i laua.

E tusa ai ma faamaumauga a le faamasinoga o lo o taua ai, o le toeaina 62 tausaga, o le sponsor lea a le aiga o le teineititi o lo o aafia, ae o le matai foi lea o le latou aiga.

Ina ua faailoa e le teineititi na aafia le mea ua tupu i lona tina, sa alu lona tina ma talanoa i le toalua a le ua molia, ma na faatoese le toalua a le ua molia i le tina o le teineititi.

Na talanoa foi le tama o le teineititi i le ua molia, lea foi na faatoese ai le ua molia ma ia faailoa i ai, ua malosi le tiapolo ua mafua ai ona tulai mai lenei faafitauli.

E lei mana’o le toeaina e 62 tausaga e fai sana faamatalaga, peitai na ioeina e le alii e 22 tausaga, i leoleo, tulaga e uiga i le la mafutaga ma le teineititi na aafia, atoa ai ma le taimi sa la faiaiga ai.

E tusa ai ma fa’amaumauga a le fa’amasinoga, na ta’usala muamua e le fa’amasinoga ia le toeaina 62 tausaga, i le moliaga o le faia o uiga mataga i se tama’ita’i, ia Setema 1997.

E $50,000 le tupe na faatulaga e le faamasinoga e tatala ai le tama e 62 tausaga i tua mai le toese, peitai i le maea ai ona faafofoga  o le faamasinoga i faafinauga a loia, na toe faaitiitia ai i le $35,000.

Na taua e le loia a le tama e 62 tausaga e faapea, e tiga lava ona iloa e le ua molia o lo o i ai se suesuega o lo o faia faasaga ia te ia, ae le’i avea lea ma itu na sola ese ai ma le atunuu ae sa nofo pea o ia i le teritori. Sa fesoasoani foi o ia i leoleo i a latou suesuega sa faia.

Ae na finau le loia a le malo o Hanley Blake e faapea, e tatau ona faatumau pea le tupe ua faatulaga e tatala ai le ua molia i tua, ona o le matuia o le gaioiga sa ia faia, ina ua ia faatonu le teineititi na aafia e aua nei ona ta’uina i se isi le mea o loo tupu i lo la va.

Ae mo le alii talavou, na talia e le faamasinoga faafinauga a loia ina ia faaitiitia le tupe e tatala ai o ia, mai le $20,000 i le $15,000.

Na finau le tamaitai loia fautua na tulai mo le alii talavou lea e faapea, o le ua molia o se alii faatoa solitulafono, ma o tuuaiga foi o lo o faia faasaga ia te ia e le’i faamaonia e le faamasinoga.

Ua poloaina e le faamasinoga i laua uma ia e toalua ina ia tuuina atu a laua pepa malaga e taofi e le malo, sei vagana ua maea a laua mataupu.