Ads by Google Ads by Google

Tala ‘oto’oto o le Pasefika

U’U LEOLEO INDONESIA E SU’ESU’E LE MALIU O SE TUSITALA PAPUA

Ua u’una’ia malosi e le Fa’alapotopotoga a Tusitala ia leoleo Indonesia ina ia faia su’esu’ega i le mafua’aga o le maliu o se tusitala i itumalo Papua Niu Kini.

O Leiron Kogoya, o se tusitala mo le Papua Pos Nabire ma le Pasifik Pos Dail, na malaga i se va’alele na tafana e ni tagata, a’o taumafai e tu lau’ele’ele i le malae va’alele i Mulia i le itumalo a Papua Niu Kini.

Na malaga lenei tusitala, e 35 tausaga, mo le palota i le a’ai o Jayapura ma na maliu o ia ina ua tau ni pulufana i lona ua (se’i tulou).

Na ta’ua e le Fa’atonusili o le fa’alapotopotoga o tusitala a Asia ma le Pasefika, o Jacqueline Park, le fa’amaonia mai i lenei fa’alavelave, le tulaga le mautonu o feagai nei ma tusitala i Indonesia, a’o latou taumafai e fa’ataunu’u o latou tiute.

Na ia ta’ua le u’una’ia e la latou fa’alapotopotoga, o leoleo ma ta’ita’i o le malo Indonesia ina ia faia se su’esu’ega i lenei mata’upu ma fa’asala i latou na fa’atupuina le fa’alavelave.

TO’A 17 TAUSIMA’I CNMI UA FA’AMAVAE MAI I A LATOU GALUEGA

E to’a 17 ni tausima’i o le atu Mariana ua fa’apea ona fa’amavae mai i a latou galuega i totonu o le ‘Commonwealth Health Center’ ma ua avea ma se tulaga ua fa’apopoleina ai le faigamalo, ona o le a to’alaiti tausima’i e galulue i le falema’i i le lumana’i.

Na ta’ua e le to’atele o tausima’i ua fa’amavae, o le mafua’aga ua o latou faia ai lenei fa’ai’uga, ona o lo o fia mana’o i tupe o a latou litaea, lea e fa’ato’a mafai na maua pe a o latou fa’amavae mai i a latou tautua i totonu o le malo.

E foliga mai ua o’o le polokalama penisone a lenei malo, i se tulaga fa’aletonu ma ua i ai se talitonuga, ua toe tolu tausaga o totoe o lenei polokalama, ae e leai se vaifofo ua fa’amautuina.

O ni isi o mafuaaga ua fa’amavae ai nei tausima’i, e aofia ai le tuai so’o o latou totogi, o le leai o se fesoasoani mai i le malo aemaise ai o le tau leai o ni sapalai ma vaila’au mo le fa’atinoina o latou tiute.

IOE FAIAOGA SAMOA I TU’UAIGA O LONA SAUAINA O SE TEINEITITI AOGA

Ua ioe nei se faiaoga o se a’oga tulaga muamua i Samoa, i moliaga o le faao’olima i se teineititi a’oga, lea na maliu i le masina ua mavae.

Na ulua’i molia Telesia Funa’i, lea na faiaoga i le a’oga tulaga muamua a Vaie’e i le fa’ao’olima na i’u i le oti, ae peita’i, na toe suia lea moliaga, ina ua mafai ona fa’amaonia e foma’i, e leai se so’otaga i le va o lea fa’alavelave ma le maliu o lenei teineititi.

Na maliu lenei teineititi e valu tausaga, ona o se tulaga faaletonu i lona fatu.

O le aso 22 o Iulai ua faatulaga e lau ai le fa’asalaga o lenei faiaoga i luma o le Fa’amasinoga Fa’aitumalo.

TALITONU KOLUSE MUMU I FITI, UA TATAU ONA NONOFO TAGATA I NOFOAGA MAUALULUGA

Ua i ai se talitonuga a le Koluse Mumu i Fiti, e tatau ona o ese tagata o le atunu’u mai i nofoaga e tele ina a’afia i lologa, ona e to’alima ni isi na maliliu i lologa na a’afia ai le atunu’u i le masina ua mavae, ae e to’a 2,000 tagata o lo o i ai pea i nofoaga sulufa’i.

Na fa’amaonia e le ofisa tau i fa’alavelave fa’afuase’i le tatau ona aofia i fuafuaga mo le puipuia o le saogalemu i le lumana’i, ia le si’i atu o tagata o le atunu’u, e fa’amautu i nofoaga maualululuga.  Ma ua i ai nisi o nu’u ma afioaga ua malilie i lea tulaga, e pei ona fa’aalia e le sui fa’atonusili o lea ofisa, o Christopher Ho.

Source: Radio New Zealand