Ads by Google Ads by Google

Pasia Faipule suiga pili sii ai lafoga i oloa ma pisinisi

O le vaiaso na te’a nei na pasia ai e le maota a latou suiga i le pili na faaulu e le alii kovana, e faaee ai lafoga i luga o oloa ma pisinisi, ina ia mafai ai ona faatupe le 10 miliona, lea o loo fuafua e tuu atu i le falemai o le LBJ, e fesoasoani ai i le auina atu o gasegase i fafo mo togafitiga.

E 9-4 le palota na pasia ai e le maota o sui le latou pili lea i le vaiaso na te’a nei ma le faamoemoe, e tatau ona faitau tolu i le taeao nei ma aloaia ai loa sa latou faaiuga, a’o le’i tuuina atu i le Senate mo le faia i ai o sa latou fo’i faaiuga.

Ae mo le maota o le Senate, ua maea ona faia la latou faaiuga e teena ai le pili lea e 10 miliona a le kovana, ma alo atu ai loa i sa latou malologa ma le faamoemoe o le taeao nei o le a toe tauaofia ai, e faatalitali ai galuega a le maota o sui e uiga i lenei mataupu.

I suiga a le maota o sui ua atagia mai ai, e na o le $2.3 miliona le tupe o le a mafai ona maua mai e le malo i siitaga o lafoga i oloa ma pisinisi, e fesoaosani ai i le polokalame a le LBJ, lea e auina atu ai gasegase i fafo mo togafitiga.

O le pili tupe e 10 miliona a le kovana sa ia faaulu i le fono, na fuafua e faatupe mai i tupe e maua mai i lafoga o le a faaee i oloa e pei o le ava malosi, pia ma le sikaleti, o le lafoga tai $2,000 e totogi e soo se pisinisi i le atunuu, faaopoopo le lafoga i totogi e 4%, atoa ai ma le pili e sii ai totogi o laisene pisinisi.

Ae i iloiloga e lua sa faia e le komiti o le Soifua Maloloina ma le Paketi a le maota o sui, na mafai ai loa ona faia sa latou faaiuga e aofia ai ma suiga e pei ona pasiaina nei i le faitauga faalua.

Ua manatu le maota o sui o le a latou teena le lafoga i totogi e 4% sa manatu le kovana e faaopoopo, atoa ai ma le suia uma lea o le tau mo le siitaga i laisene pisinisi, atoa ai ma lafoga i oloa.

O suiga la a le maota o sui, ua faaitiitia mai ai le lafoga sa fuafua mo le ava malosi ma le pia mai le 250% i le 240%, ae o le sikaleti ua faaitiitia mai i le 15.5% mai le 17.5% sa fuafuaina e le alii kovana.

O siitaga uma lava i laisene pisinisi, ua faaleaoga e le maota o sui siitaga sa fuafuaina e le malo, ae faaopoopo i ai na o le tai $50 mai le tau o laisene o loo i ai i le taimi nei, e oo foi i le lafoga tai $2,000 sa fuafua e totogi e pisinisi uma i le tausaga, ua suia ma faatulaga e amata atui le $200 e oo atu lava i le $2,000, fuafua lea i le  tupe maua a le pisinisi i le tausaga, ina ia mautinoa o loo gafatia e le pisinisi ona totogi le lafoga fuafua lea i luga o ana tupe maua.

A’o le’i tuuina atu suiga e pasia i le vaiaso na te’a nei, na fesiligia e le afioga i le alii faipule ia Larry Sanitoa taitaifono o komiti sa gafa ma le faatautaia o iloiloga, poo le a le fua lea ua faaaoga e fuafua i ai le lafoga i oloa ma laisene pisinisi, ae fia foi se tupe ua fuafua le komiti o le a maua mai e le malo ma suiga ua latou taua.

Saunoa Puleleiite Liamatua Tufele Jr, o ia lea o le taitaifono o le komiti o le Soifua Maloloina/LBJ a le maota e faapea, o suiga a le komiti o loo faavae mai lea i ana iloiloga e lua sa faatautaia, atoa ai ma le iloiloina lea ma le totoa e le komiti o atugaluga ma finagalo faaaliao molimau uma sa molimau i luma o le komiti.

Na faamanino foi e Puleleiite le ono mafai lea e le malo ona maua le tusa ma le $2.3 miliona mai lafoga ia ua pasia e faaopoopo, peitai na toe saunoa Sanitoa e faapea, talu ai e le o manino se auala na faaaoga e le komiti e fuafua i ai ana siitaga, e ono aafia ai foi pisinisi pe afai o le a sii lafoga i oloa ma laisene pe a faafou.

“E le o i ai foi se mautinoaga mai le malo e ono mafai ona o latou aoina mai ni tupe i lafoga nei pe a faaopoopo, pe a fuafua i le tulaga faigata ona tau ao mai e le malo ni tupe mai lafoga o loo i ai i olooa nei,” o le saunoaga lea a le alii faipule mai Tualauta e uiga i lenei mataupu.

Na tulai le afioga i le alii faipule ia Taotasi A. Soliai ma ia saunoa e faapea, ua uma ona ia talosagaina le komiti ina ia faapupula le aofai o le tupe o le a mafai ona maua mai e le malo i le lafoga lea, peitai o lea ua sauin e pasia suiga ae o lea lava e le o manino mai le tulaga e pei ona ia fesiligia.

“O lo’o i ai fo’i so’u atugaluga i le ono le mafai lea e le malo ona ao mai nisi tupe mai lafoga ia, ona o lea foi ua manino i molimau a le malo le faigata tele lea ona tau ao mai e le malo o tupe mai lafoga o loo i ai i le taimi nei,” o le saunoaga lea a Taotasi.

O le mataupu na laga e afioga i faipule o loo tete’e i le pili lenei, afai e sii le lafoga i oloa ma laisene pisinisi, o le mamafa o le avega o le a toe i’u atu lava i le atunuu, o i latou ia o le a totogiina siitaga o le a faatula’i e pisinisi.

E ui i finagalo faatuiese e uiga i le pili, peitai na pasia lava i le palota e 9 ioe ae toa 4 na palota leai.

O faipule na palota leai e aofia ai Sanitoa, Taotasi, Tapumanaia Galu Satele Jr ma Vailoata E. Amituana’i, ae o faipule na palota ioe i le pili e aofia ai Puleleiite, Vailiuama Steve Leasiolagi, Talia Faafetai Iaulualo, Toeaina Faufano Autele, Faimealelei Allen, Lemapu Suiaunoa Talo, Fetu Fetui Jr, Puletuimalo D. Koko ma Simei Pulu.