Ads by Google Ads by Google

SIKAILI FA’AA’OA’O SE ALI'I GAOI

O le ali'i lea e masani ona alu e tala’i i le fale o se tasi o aiga i oganu'u tu totonu o Tafuna, o lo o tau sa'ilia e le aiga ni isi fa'amatalaga auiliili e uiga ia te ia, ona ua manatu le aiga o le a tu'uina atu sa latou tagi i le Ofisa o leoleo fa'asaga i lea ali'i, ona o gaoioiga mataga sa ia faia.

Na ta'ua e le ulugali'i na a'afia i gaoioiga a le ula lea e fa'apea, o le lua ai lenei o vaiaso talu ona malaga asiasi atu le al'ii lea ma ona laei pei se tagata tala’i ma afea lo latou fale, la te taliaina fo'i ma le tina o le aiga ona o le manatu maualuga i le talalelei a le Atua ma le auala o lo o fa'asoa atu ai i so o se tasi.

Ae o le vaiaso na te’a nei na manino ai i le ulugali'i lea, o le ula lea e le o se tagata tala’i mai se ekalesia po o se tapuaiga, ae o se tagata gaoi o lo o fa'afoliga o se A’oa’o.

Na ta'ua e le susuga ia Fisaga Atimalala e fa'apea, o ia e le i i ai i le fale i le aso na tula'i  mai ai le fa'alavelave, sei vagana ai lona to'alua ma si ana fanau laiti, ae pe tusa o le te’a laitiiti o le 10:00 i le taeao o le aso Lua na te'a nei, na va'aia ai loa fo'i e le tina o le aiga ma si ana fanau le fotua’i atu o le ula lea ma lana ato ta'ita'i lanu uliuli, o lona ie faitaga, ofutino lanu meamata lima u'umi ma le fusiua.

E silia ma le 40 minute o faia le su'esu'ega a le tina o le aiga a le ali'i lea i mata'upu o le Tusi Paia, ae fa'afuasei loa ona tagi lona afafine laitiiti, ma aga'i atu ai loa le tina o le aiga i totonu o le potu e aumai le ofu e sui ai si ana tama.

Fai mai Fisaga, pe tusa ma le 10 minute talu ona alu 'ese lona to'alua, na toe foi mai ai ma lona afafine ma le manatu, o le a fa'aauau la latou su'esu'ega, peita'i na te'i ina ua ia va'aia ua leai se ali'i tala’i i totonu o le fale, se'i vagana ai lana ato o lo o ta'atia mai i le faitoto'a o le sitepu pito i tua o lo o matala.

Na fa'ataalise atu le fafine ma ia iloa ai ua leai le $67 sa i totonu o le ato, e o'o fo'i i le DVD player, o le ipod, o ofu ma se'evae sa i le isi itu o le pito i tua o le fale ua leai uma.

“O le itu faigata o lenei mata'upu, e le matauina e lo’u to'alua foliga o le tagata lenei, ae na o le fa'atasi lava fo'i ona ou va'ai i ai, ae o lo o taumafai pea e sa'ili'ili se auala e mafai ai ona maua, ma le fa'amoemoe afai e maua, o le a fa'ailoa atu loa i le Ofisa o leoleo lenei mata'upu,” o le fa'amatalaga lea a le susuga Fisaga i le Samoa News.

Fai mai Fisaga, sa tula'i mai fo'i se fa'afitauli fa'apenei i ni tausaga ua tuana'i peita'i sa maua e taulele’a o lo latou pitonu'u le ali'i lea ina ua taumafai e fai ni uiga mataga i se tina matua sa masani ona asiasi i ai i lona fale.