Ads by Google Ads by Google

To’afa manunu’a i luga o se va’a fagota

E le’i i ai se soifua na ma’imau ina ua tula’i mai le fa’alavelave i se vaa fagota e lesitala i Amerika Samoa, lea o lo o ai nei i sana malaga i luga o le sami, ae to’afa i latou na manunu’a.

I se ripoti na maua mai i aiga o nisi o le auva’a o lo o a’afia i lenei faalavelave, sa latou faailoa mai ai i le Samoa News e faapea, e toafa tagata fagogota na manunu’a i lenei faalavelave, lea e aofia ai ni alii mai Filipaina se toalua ma se alii e afa Tonga, afa Samoa.

Ae ina ua fesiligia e le Samoa News le Ofisa o le U.S Coast Guard i le aso ananafi, na faamaonia mai ai e le susuga Lt. Steven Caskey e faapea, “e leai nisi na maliliu i lenei faalavelave, sei vagana ai alii e toafa na manunu’a ina ua pau se boom mai luga o se masini sisi i le pito i tua o le vaa”.

Na taua e Lt. Caskey e faapea, o lo o faaauau suesuega a le Coast Guard e uiga i lenei mataupu, ma ua faamoemoe o se taimi o i luma o le a tuuina mai ai se isi ripoti atoatoa e  tusa ai o lenei faalavelave.

Sa ia taua foi e faapea, o le faalavelave na tulai mai i na ua motu le uaea (cable) lea e nonoa ai le boom e faaaoga e le isi masini silini pito i tua o le vaa, ma tulai mai ai loa le faalavelave.

E faapea se ripoti o i latou na manunu’a ua faamoemoe e auina atu i Hawaii mo le faia i ai o ni togafitiga.

E lei mafai foi ona faamanino auiliili mai poo fea tonu le vaega o le ogasami lea o loo fagota ai le vaa lea i le taimi nei.

Ae na taua e se molimau e lei finagalo e faailoa lona suafa e faapea, o le vaa lea o loo tulai mai ai lenei faalavelave, o se vaa e lesitala i se tasi o kamupani vaa fagota i le atunuu, lea e tusa ma le tai 6 masina e malaga ai e fagota ma toe foi mai.

O le vaa fagota o loo aafia i lenei faalavelave o se vaa fagota mai le kamupani a le Tri Marine.

Fai mai le molimau, sa taumafai nisi o le latou aiga faapea ai ma aiga o isi foi sui o le auvaa e faafesootai le Ofisa mo ni faamatalaga e uiga i lenei faalavelave, peitai sa mumusu le Ofisa o le vaa fagota e faamatuu mai nei faamatalaga ia te i latou, o le mafuaaga lena sa ia talosagaina ai loa se fesoasoani a le Samoa News, ina ia mafai ai ona manino le faalavelave o loo tulai mai.

E lei mamao atu foi i le tausaga na tea nei se isi foi faalavelave na tulai mai i luga o se vaa fagota lea na maliu ai se alii sa galue i galuega ta i’a, ina ua motu le boom mai luga o se tasi o masini silini ma manu’a tigaina ai lenei alii ma iu ina maliu ai.

E le o manino mai i le taimi nei poo afea ua faamoemoe e toe foi mai ai le vaa lenei i totonu o le atunuu.