Ads by Google Ads by Google

Molia Nisi Fasioti Tagata - Fetauiga Ta’aloga Soka Aikupito

O le fetauiga a tagata maimoa ma le au tapua’i a ‘au soka e lua i le a’ai o Port Said i Aikupito, o se tasi lea o mea sili ona fa’aletonu ua o’o i ni ta’aloga soka talu mai ona fa’avae le fa’agatama, e tusa ai ma lipoti fa’ailoa mai e le Asosi Soka a le Lalolagi - le FIFA, lea fo’i e fa’atupea le tele o ta’amilosaga soka i le tatou nei atunu’u.

O se mea e lelei ai, e ao ina nofouta ai si tatou fo’i atunu’u i nei ituaiga o fa’aletonu, ia le maua ai i tatou i nei faiga sese ma le leaga, a’o tatou savalia pea le soifua taumafai o a tatou fanau talavou i lea fa’agatama.

E ui fo’i ina laititi lava Samoa i le fa’afanua, po’o Samoa Tuto’atasi po’o Amerika Samoa, ae mautinoa lava, a o’o ina o’oo’oga le ita o le Samoa, e muliga fasiotiga tagata lea ua fa’ailoa mai na tupu i Port Said i Aikupito i mea e fa’atino fo’i e o tatou tagata i taimi e sese ai le fa’autautaga loloto ma le to’a ai le tai i loto o tagata e to’atele.

Peita’i, ona o i tatou ua matua ai le Talalelei, ua avea ai fa’agatama ua tauva ai o tatou alo ma fanau, ma afuaga o mea lelei ma masaniga mafana mo tupulaga uma lava. Peita’i o le fa’alavelave lea ua tupu i Port Said, ua fa’asalaina ai le Asosi Soka a lea malo e le FIFA ae ua fa’asaga ane le Malo latou matua molia le to’a 75 o e na fa’ataututu ma leoleo, ma latou fa’apogaia le maliliu o tagata e tusa ma le 74 i latou, ae le taulia ai le to’atele na manunu’a ma mea totino sa susunuina ma ua fa’aleagaina ai.

O ‘au Soka nei e lua, o al-Masry ma al-Ahly i le aso muamua o Fepuari 2012.

Ua fa’ailoa mai, e to’a 9 ali’i leoleo, ua aofia ai i le to’a 75 o i latou ua molia i le fasioti tagata ona o lea fa’aletonu, o lona uiga, o itugalua o le fa’alavelave na tupu, ua tau fai totofu i le fa’amasinoga e tula’i ma tali i o latou moliga ona o le silia ma le 74 o i latou lea na maliliu ma manunu’a ogaoga i lea fa’alavelave.

O le isi mea na atili ai ona vevela toto o tagata lautele, ona ua fa’aalia i nisi ripoti, e le’i faia tiute o leoleo ina ia latou taumafai sofa’i le pisa a nei au maimoa ma ‘au tapua’i o le ta’aloga, aua ana latou faia lo latou tiute, e le o’o ina tetele fa’apea le to’atele o i latou e maumau ola. Ona o lea tala na pa atu i tua, na toe sofa’i ai nisi fa’afitauli ma toe maliliu ai nisi e to’a 16.

Ua aofia ai ma le Taitai Uati o le ‘au Leoleo o le Malae sa faia ai lea ta’aloga, le ali’i o Maj Gen. Issam Samak, ae le’o manino lelei po’o le a lona moliga o i ai. Na mae’a loa lea vevesi tele, ae fa’amalolo lelei ai lava ma Maj Gen. Samak mai lona tulaga lea sa i ai e le Malo o Aikupito.

O le isi to’alua ua molia i nei moliga matuia, o ni tamaiti e le’i mafai ona fa’atula’ia i le fa’amasinoga maualuga, peita’i, ua fa’ailoa mai, o le a fa’afofogaina lava o la’ua fa’amasinoga e le Fa’amasinoga mo fanau e i lalo o le 18 tausaga le matutua.

Ua fa’ailoa mai o le ‘au mai Port Said al-Masry na manumalo i le ta’aloga lea 3-1, peita’i, i le taimi na mae’a ai loa le ta’aloga, na osofa’i mai loa le ‘autapua’i a al-Masry ma pa’ilima loa le au tapua’i a al-Ahly. O le afuaga lea o le fa’aletonu, ma ua le toe mafai pe faigofie lava fo’i ona toe vaovao.

Na mafai ona ave’esea mai tama ta’a’alo a ‘au e lua, ae ua oso ai lava le fiva o le au tapua’i latou aua ua masani lea atunu’u i le fa’atatutu lava o fetauiga a ‘au nei e lua i so’o se taimi e faia ai ni ta’aloga i lo latou va. O se mea fita, ua fa’ailoa mai nei, na iloa lava e le vasega o leoleo, sa fa’ataga tagata maimoa e o mai i totonu o le malae ta’alo mo lea ta’aloga ma latou naifi ma meatau fa’apena.

I ni nai aso na te’a ai, sa toe fa’aalia mai i ni tala tusia i le BBC e le susuga John Leynei Cairo, ua va’ai atu i le fa’afitauli na tupu, sa leai se galuega tele a le Au Leoleo po’o le Militeri na faia i le fa’alavelave na tupu, e foliga mai sa auai ma i latou i taupulepulega leaga nei ina ia tupu se fa’alavelave i le i’uga o lea ta’aloga, a leai, e tauau sa latou iloa ua tupu le mea, ae sa latou tu’ua se’i fa’atele se mea e tupu mai.

saunia: Leua Aiono Frost