ELIOTA SIAUMAU JR

O le vaiaso na tea nei na toe fofogaina ai i luma o le Faamasinoga Maualuga le mataupu a Eliota Siaumau Jr, ina ua faila e lana loia o Sharron Rancourt  se talosaga, e faamanino atili ai e le faamasinoga se tasi o vaega o ana poloaiga lea ua faataga ai ona tatala i tua Eliota, e faigaluega a’o tuli ai lona faasalaga faafalepuipui.

Na faailoa e Rancourt e faapea, ua uma ona talia e le faamasinoga le talosaga e tatala ai le ua molia i tua e faigaluega i le kamupani a le Pisisami Trucking, ma o se tasi o vaega o lana galuega o le aveina lea o loli, ae peitai e le o faatagaina e le pule o le falepuipui, susuga Lt. Lumana’i Maifea.

Na faailoa ai e le alii faamasino sili ia Michael Kruse e faapea, e le a’afia le fa’amasingoa i tulafono ma ta’iala o lo o fa’afoe ai e le pule o le to’ese le falepuipui i Tafuna.

Fai mai Kruse, e mafai e le faamasinoga ona talia le talosaga ina ia tatala le ua molia i tua e alu e faigaluega, peitai o lea fa’aiuga e le mafai ona fa’aleaoga ai fa’ai’uga ma tulafono o lo o lima taitaia ai le va’ava’aiga o le toese i Tafuna.

Saunoa Kruse, e le faafoeina e le faamasinoga le falepuipui, ma o le mataupu foi o loo tulai mai i le pule o le falepuipui, o tulaga tau tulafono e le oo i ai le malosi o le faamasinoga.

Ina ua fesiligia le loia a le malo, susuga Cabel Poag i sona manatu i le talosaga, na ia faailoa ai lona le tetee lea i le talosaga a le ua molia.

O Siaumau Jr o lo o tuli sona fa’asalaga fa’afalepuipui e 20 masina, ina ua ta’usala o ia i le solitulafono o lona fesoasoani i se isi tagata i le umia fa’asolitulafono o le pauta faasaina o le aisa.

O se tasi o tuutuuga o le faanofovaavaaia a le ua molia mo le 5 tausaga, e aofia ai lona totogia o le salatupe e $5,000.

KILISITINA SEIGAFO

O le tina talavou lea na tuuaia e le malo i le moliaga o le gaoi, ina ua na gaoia se $260 mai i se tamaloa papalagi sa la fetaui i le falema’i i Faga’alu, ua faatulaga e lau i le aso 9 Aperila lona faasalaga.

Na fa’amaonia e Kilisitina Seigafo i luma o le fa’amasinoga, lona gaoia o le $260 mai i le teugatupe a le ali’i papalagi, e ala i lona fa’aaogaina o lana pepa ATM.

I le uluai mailiiega lea na sainia e le malo ma Seigafo ile tausaga na tea nei, lea foi na talia e le faamasinoga, na malie ai le malo, o le a leai se moliaga e faia faasaga ia Seigafo, ae o le a toe totogi e le ua molia le tupe a le tamaloa na ia gaoiaina.

Ina ua talia e le faamasinoga le maliliega lea, sa tatala ai loa i tua le ua molia ma le  tuutuuga, o le a ia toe totogiina le tupe, peitai ina ua toe valaauina lana mataupu i le masina na tea nei, e le gata e lei tulai i luma o le faamasinoga, ae na maua foi e le faamasinoga e lei toe totogiina lava le tupe, o lea na faia ai loa le poloaiga e toe taofia Seigafo i le toese seia oo mai i le taimi nei.

O lo o taofia pea o ia i le toese e faatali ai le aso lea ua faatulaga e lau ai loa faasalaga. O le alii loia ia Mike White o loo tulai mo Seigafo ae o Cecilia Reyna o loo tulai o le malo.

HEFA PAHE

O le alii Tonga lea na tuuaia i lona umia faasolitulafono o se vaega o le laau faasaina o le mariuana, ua faatulaga le aso 9 Aperila e lau ai lona faasalaga, ina ua talia e le faaasinoga maualuga le maliliega faavavevave lea sa ia sainia ma le malo i le vaiaso na tea nei.

O le alii o Hefa Pahe e toatolu i ai tagata na loka mai e leoleo i se vevesi na tulai mai i le uafu o vaa faila i le masina na tea nei, lea na maua i ai i le toatolu lea vaega o le laau faasaina o le mariuana.

I le tali ioie ai o Pahe i le moliaga e pei ona molia ai o ia e le malo, sa ia tautino ai e faapea, e faamaonia sa ia te ia se vaega o mariuana, ina ua sailia e leoleo lona tino i le masina na tea nei.

Ua manatu itu e lua o le a tuuina atu ni a laua faafinauga i le faamasinoga mo se faasalaga o Pahe, peitai ua malamalama ma iloa e le ua molia, tusa lava pe finau loia i le faamasinoga mo se faasalaga  mama mo ia, e pule le faamasinoga pe talia pe teena ia faafinauga.

Ua ia iloa foi, el e mafai ona toe suia lana tali ioe ua tuuia atu pe afai e tuuina mai se faasalaga a le faamasinoga e le tau ai lona loto.

O loo taofia pea Pahe i le toese i le taimi nei e faatali ai le aso e lau ai lona faasalaga, e le o manino foi le mafuaaga ua ala ai ona faanatinati lenei maliliega ma le malo.