Ads by Google Ads by Google

Malolo le Fono Faitulafono mo le 2 vaiaso

E lua vaiaso lea ua faamalolo ai galuega a le Fono Faitulafono, ona fa’ataunu’u ai loa lea o le Fono Faapitoa na valaauina e le alii kovana, mo le talanoaina o mataupu ia ua finagalo le alii kovana faapasia e le Fono mo le falema’i, atoa ai ma le faamaonia o totino o Komisi o le a ia tofia.

O le itula e 10:00 i le taeao ananafi na nofoia ai e maota e lua le fono faapitoa a le alii kovana, ma pasia ai loa le i’ugafono e faamalolo ai le fono mo le 2 vaiaso, ae se’i maua se avanoa e toe feutana’i ai taitai o le fono ma le alii kovana e uiga i lana fono faapitoa.

I le maota o le Senate, e na o le toa 11 afioga i Senatoa na auai i le taeao ananafi, ma o isi na laei atu i laei masani o le fusiua ma le pelaue, ae o isi na laei atu na o latou aloha e leai ni pelaue ma ni fusiua.

Ae mo le maota o sui, e toa 16 faipule na faatasi atu, lea foi sa o latou laei atu i laei masani mo taimi o tauaofiaga a le fono.

Na faafetaia e le peresetene o le Senate ia Gaoteote Palaie Tofau afioga i Senatoa i lo latou faamalolosi atu i le fono faapitoa a le kovana, peitai e i ai lona talitonuga, e tatau ona faia se malologa a le fono mo le lua vaiaso, ina ia maua ai se avanoa e feutanai ai taitai o le fono ma le alii kovana, ma ia taua ai le sauni o le Fono e tuuina atu sana iugafono i le kovana e faailoa atu ai lana malologa mo le lua vaiaso, ae toe a’e mai i le aso Gafua, 26 Mati mo le toe faaauauaina o galuega mo le fono faapitoa e 30 aso le umi.

E ui e le’i i ai se i’ugafono na tolaulauinai luma o le Senate, ae na pasia lava e afioga i Senatoa le mau e tuuina atu ai i se taimi le iugafono i le kovana, e faailoa atu i ai le faaiuga a le maota, o le tulaga lava foi lea e tasi na faia e le maota o sui, ina ua maea ona talanoaina e le maota le mataupu e uiga i le fono faapitoa ma le malologa e lua vaiaso.

Na faia se malologa puupuu a le maota o sui ae sei talanoa ma fetufaai afioga i faipule i le mataupu e uiga i le malologa.

Na faafetaia e le tofa Savali Talavou Ale afioga i faipule ona o le mafai ona o latou tali mai e tusa ai o le fono faapitoa ua valaauina.

Sa ia taua, e ui e lei lava se taimi na faia ai fesootaiga mo le fono faapitoa, ae o lea lava ua tali mai afioga i faipule, ma ua atagia mai ai lo latou naunau e tautua ma saili ni auala e fesoasoani ai i le atunuu ma le falemai.

Na faailoa e Savali i faipule mataupu o le fono faapitoa ua tuu atu e le kovana e galulue i ai le fono, O ia mataupu e aofia ai le $10 miliona ua manatu le kovana e tuu atu mo le falemai, o le $8 miliona e nono mai i le Vaega a le Litaea ae tuu atu foi mo le falemai, o le talanoaina o le pili e tuu atu ai le falemai i lalo o le malo, atoa ai ma le faamaoniaina lea o komiti ma komisi o le a tofia mo nisi o ofisa ma faalapotopotoga a le malo.

Saunoa Savali, e lei faigofie le mataupu ina ua fetufaai ma le alii peretene o le Senate, peitai o le agaga maualuga, e tatau ona maua se fesootaiga ma le alii kovana e uiga i lenei mataupu.

Na fesili le alii faipule ia Vaamua Henry Sesepasara pe i ai se tulafono e aiaia ai tulaga o fono faapitoa e valaauina e le alii kovana.

Saunoa Vaamua, o le po o le aso Sa na faatoa ia mauaina ai le telefoni e uiga i le fono faapitoa ua valaauina e le kovana.

Saunoa Savali, o loo i ai i lalo o le Faavae le malosi o le kovana na te valaauina ai le fono faapitoa, peitai e ao lava ona feutanai muamua ma taitai o le fono ina ia faatulaga ai se taimi talafeagai ma malilie faatasi i ai taitai o le fono mo le fono faapitoa.

Ae na taua e le afioga i le matua ia Togiola Tulafono i luga o lana polokalame i le faaiuga o le vaiaso na tea nei e faapea, ina ua ia maua se tala mai lona ofisa ua malolo le fono faitulafono i le aso Faraile na tea nei, sa ia taumafai ai loa e fesootai atu i taitaifono e faailoa i ai le fono faapitoa, peitai na fiu e fesootai atu i le telefoni ua taape uma i le fale.

“O le ala lena na ou tusia ai loa se tusi ma auina atu i le Fono Faitulafono, ina ia faailoa i ai le fuafuaga e uiga i le fono faapitoa, ma o le faaaliga ua oo mai ia te a’u, sa maua e taitai o le fono le fesootaiga sa ou tuuina atu i ai,” o le saunoaga lea a le alii kovana.

I le maea o felafolafoaiga a le maota o sui, na latou pasia ai loa foi le iugafono e ui e lei i ai se iugafono, e faamalolo ai le fono mo le 2 vaiaso.