Ua le tautala Loimata ua na o le punou ma ‘ata i lona tuagane, “Eteuati, fai fa’alelei mai au fika na, ou te toe vala’au nei lava i a Tama ma Tina, ona maua ai lea o lou iuga.” Ua savali atu nei Eteuati ma saofa’i ifo i talane o Loimata. Ua galo tala ma timaiga na fai ane e lona tina ina ia va’ai lelei Loimata, a’o lea ua va’ai atu nei, o le a sisi lava le la o le va’a o Eteuati latou e le toe popole i se mea e tasi pe lua.

Ua feiloa’i fiafia nei le malaga ma le tama o Mikaele i lea afiafi, ua taumamafa fiafia i le oso na o mai ma le malaga mai Samoa. O se va’aiga matagofie na iloa nei e Loimataoapaula ma Eteuati, ina ua ulufale i totonu o le fale foga falelua o le tama o Mikaele. O tua o le fale lenei o lo’o i ai le isi fale, ma o le fale lea e tu’u uma ai pasi a le toeaina. O le isi itu, o lo’o i ai le faleinisinia e fai ai uma galuega mo le fa’aleleiga o pasi. Ua mautu mea o le aiga, e pei ona fa’ailoa e Mikaele i a Tagiilima.

Ua le ‘emo mata o le tama o Mikaele i a Loimataoapaula, ona i le va’ai a le toeaina, o se tama’ita’i ua sili ona lalelei. O lona lauulu fo’i, e fa’asasa’o e gata i ona tuli, ma ona foliga e le ai lava ni vali po’o nisi mea e ona tatau ona tu’u ai. Ua fa’asolosolo mafaufauga o le toeaina i lona to’alua le tina o Mikaele. Ae a tau loa le mafaufau o le toeaina i le mafua’aga na alu ‘ese ai lona to’alua, ua toe toe a maligi ona loimata.

O le ala lea na vave ai loa ona toe fa’apea ane i lona atali’i, “Mikaele, o le a le umi o le tafaoga a Loimata ma Eteuati?” Na tu’u nei i lalo le ipu vai a Mikaele ma tali ane i lona tama, “E lua vaiaso lea e tu’u mai e matua o Loimata ma Eteuati e tafafao ai, ona toe fo’i ai lea i Samoa.”

“O, ia manaia o le na e umi le la tafaoga, ae o taeao pe a aulia, matou te o ai e fa’amatamata i Fagatogo, ona matou toe o mai ai lea.” Ua le tautala Mikaele i lea taimi ona e le i faia se la tala ma Minalosa i fuafuaga e fai i le aso e soso’o ai. Ae na ona tali ane i lona tama, e onosa’i e i ai mea e tatau ona o i ai latou taeao, ae a ma’ea, ona fai lea o se fuafuaga e tusa ai ma lona mana’o. Ua fa’apea lava ona fai, ina ua uma le taumafataga o le afiafi, ua toe fo’i ane nei i le fale o Mikaele ma Minalosa lea o lo’o api ai le malaga mai Samoa.

“Minalosa, se fai atu fo’i la’u tala malie, o fea o i ai le tina o le aiga?” Ua ‘ata Minalosa ma tu’u lona lima i lona gutu e fa’asino i a Eteuati e ‘aua le pisa. Ua fa’amimini tauau o Eteuati i lea taimi ma moei’ini. Na iloa loa e Eteuati ua alu i fafo Mikaele, oso atu loa ma lana fa’amatalaga i a Minalosa, “O le itu ua ou fesili ai Mina, ona afai ua leai se tina o le aiga, ona oulua fa’amuli atu lea ma Loimata, ae se i alu Cindy Rose e fa’afiafia le toeaina i lenei afiafi, le afiafi sa tulia o tamali’i, fa’apea fo’i le taualaala o fale’upolu o tofiga, ma ponao’o o le atunu’u, e a, e magaia le ga.”

Ua alu nei le talie a Minalosa ma Loimataoapaula i lea taimi ma a’apa ane Minalosa i le aluga sa i ona talane ma togi ai Eteuati. Na tu a’e nei i luga Eteuati ua tu’u ona lima i ona puimanava ma matele fa’atopetope i tua ma ‘ata. Ua nofo nei Loimataoapaula ma ona mafaufauga e fa’apea, afai ua maua e le tama o Mikaele se fale ua sili ona matagofie i le va’ai ma isi mea uma, aisea ua le maua ai e o’u matua?”

Ua maua le tali o lana fesili, ua maua fo’i le fa’aiuga o le a ia faia, o a fo’i tiga o le a o’o i ai, ae maise ai o nai ona matua o lo’o fa’atali mai i Samoa, ae ua ia lagona ma ua mautinoa i lona loto, le tulaga e ao ona ia faia, ina ia maua ai e lona tina sana ‘ato ta’ita’i manaia ma so la fale e pei o le fale o le tama o Mikaele.