Ads by Google Ads by Google

Leai se fa’ai’uga Maota Sui $2 miliona na pasia Senate mo le LBJ

Ua toe taoto atu nei i le Komiti o le Litaea a le maota o sui le pili a le Senate na pasia e le maota maualuga i le aso Lulu na te’a nei, mo le toe faia i ai o nisi o gaioiga a’o le’i toe tu’uina atu i luma o le maota mo le faia i ai o sa latou faaiuga, ma ua manino mai ai o le a le maua e le falemai se isi fesoasoani tau tupe mai le Fono sei vagana ua valaau e le alii kovana se fono faapitoa ona faatoa mafai lea ona maua se isi avanoa e toe iloilo ai e le Fono le pili tupe lenei.

E le o mautinoa pe o le a aofia ai i mataupu e talanoaina e le Fono le pili lenei e $2 miliona, mo le fono faapitoa a le kovana lea ua faamoemoe e amatain ai le itula e 10:00 i le taeao nei.

E fa mataupu o loo aofia i le kalena o le fono faapitoa a le alii kovana, e pei ona ia faailoa i sana tusi sa tuuina atu i taitai o le fono i le vaiaso na tea nei.

Ae o le faaiuga a le maota o sui ina ia toe taoto atu le pili i le komiti, sa faia ina ua maea ona faitau faalua le tulafono lenei i luma o le maota i le taeao ananafi, i le maea ai lea o  se iloiloga sa faatautaia e le komiti o le Litaea a le maota o sui, lea na talanoaina ma fesiligia ai sui o le Vaega a le Litaea, pe tala feagai le toe faaopoopo o le isi $2 miliona i luga o le nonogatupe e $20 miliona a le malo o loo i ai i le taimi nei.

O le tali a le taitaifono a le Litaea ia Aleki Sene Sr i luma o le komiti a le Senate, sa ia faailoa i ai le lagolagoina lea e le Litaea o le toe faaopoopo o se isi $2 miliona i luga o le nonogatupe o loo i ai.

Na pasia e le maota o sui ananafi le mau na faatulai e le afioga i le alii faipule ia Puleleiite Tufele Li’amatua Jr, ina ia toe taoto atu i le komiti le pili a le Senate e faasoasoa atu ai le $2 miliona mo le falema’i, se’i toe fai i ai se isi galuega a le komiti.

Saunoa Puleleiite, e le faigofie le pili tupe lenei ona o nisi nei o mataupu e ao ona matua iloilo toto’a lelei e le maota.

Na faalua e  faipule le mau ma tuuina atu loa e le fofoga fetalai le fesili, ina ia siilima uma faipule e lagolagoina le toe taoto atu o le pili i le komiti, ina ua maea ona faitau e Savali Talavou Ale le palota, sa ia saunoa ai e faapea, ua fulisia le maota ina ia toe taoto atu le pili i le komiti, peitai na tulai le alii faipule ia Tapumanaia Galu Satele Jr ma saunoa e faapea, e lei fulisia faipule i le palota e iloa ai pe toe taoto atu le pili i le komiti, e na o le toalima faipule na sii o latou aao e lagolagoina ai le mau.

Saunoa Savali Talavou Ale, sa manino lava le palota ina ua ia faatulai le fesili, na fulisia le maota ina ia toe taoto atu le pili i le komiti.

Ae na toe saunoa Tapumanaia e faapea, sa i ai lona faanaunauga e maua se isi fesoasoani tupe mo le falemai, ina ia fesoasoani ai i le tulaga pagatia tau tupe o loo feagai ma i latou, peitai o lea ua atagia mai i le faaiuga ua faia, o le a le maua e le falemai lea fesoasoani tupe.

O le agaga o le maota o sui e pei ona taua i le taimi o le latou iloiloga, e tatau ona i ai se alagatupe e faatupe ai le toe totogiina o le $2 miliona lea ua manatu le Fono e tuu atu mo le falemai.

O le pili lea na pasia a le Senate i le aso Lulu na tea nei, o loo taua ai le faaauau pea lea o lafoga i luga o ava malosi ma le pia e toe totogi ai le $2 miliona lea o le a toe faaopoopo i le nonogatupe pe afai e talia e le fono ma le faamoemoe, e 10 tausaga le umi lea o le a totogi ai le nonogatupe lenei.

Na saunoa le sui fofoga fetalai ia Talia Faafetai Iaulualo ma ia taua lona lagolagoina o le pili a le senate lea ua pasia, ona o loo manino mai ai alagatupe e toe totogi ai le nonogatupe, peitai e le o le finagalo lea o le alii faipule ia Larry Sanitoa.

Saunoa Sanitoa, e le o manino lelei i le tino o le tulafono pe fia se tupe o le a maua mai e le malo i le lafoga lea ua faaee, ma e i ai lona popolega e ono faaee atu le mamafa o lenei avega i luga o tagata faatau.

Na lagolagoina foi e  Taotasi Soliai le finagalo o Sanitoa, i le ono faaee lea o le isi vaega i luga o tagata faatau, pe afai e pasia le lafoga i le ava malosi ma le pia e pei ona fuafuaina i le tulafono lenei.

Na lagolagoina e Puleleiite finagalo o afioga i alii faipule, i le ono avea lea o le toe faaee atu o se isi lafoga ma itu e toe faaee ai se isi avega i le atunuu.

O le taimi nei, e lua nonogatupe a le malo sa faatupe mai i Teuga Tupe a le Litaea o loo tau totogi i le taimi nei, o le nonogatupe e $10 miliona na fai i le 2006 ma le nonogatupe e $20 miliona na fai i le 2007.

O le taimi nei, e lei taitai afa le toe totogiina o nonogatupe nei, e pei ona taua i se ripoti sa tuuina atu e le Vaega a le Litaea i luma o le Senate i le vaiaso nei.