MISA LE EKALESIA INA UA LE SA’O RIPOTI TUPE

E le’i umi na amata le fonotaga a se tasi o Ekalesia Kerisiano i le isi pitonuu o Tafuna i le aso Tofi na te’a nei, ae amata loa ona lagalaga saunoaga a ni isi o sui o le Ekalesia, ina ua maua le ‘au o le paipa, e le o le tupe uma na maua i le sa'iliga tupe a le 'aulotu na alu i Niu Sila o lo o sau i le ripoti a le ta’ita’i malaga.

Na ona manino lava i le ripoti o le tupe e le o le seleni atoa lea na maua i le malaga, amata loa ona lagalaga manatu o ni isi o le 'aulotu, ma fa'ai'u ai loa i le tau vaovao o fusu'aga ona o le tiga tele o loto o tagata 'aulotu sa fa'amuli atu, i le le sa’o o fa'amaumauga a le ta'ita'i malaga ma lana komiti i le tupe atoa sa tatau ona maua.

Ona o le loto tiga o sui e to'alua o le ekalesia na o la'ua momoliina maia lenei mata'upu i le nusipepa, na o la manatu ai o le a leai se vaega e natia o le vevesi na tula'i mai, ae o le a fa'alauiloa uma ina ia iloa ai e le atunu'u uiga le sa’o o lo o faia e ni isi o le 'aulotu, peita'i na fa'ai'u le la molimau i sa la'ua tu'u alalo, ina ia natia i fatu alavai le fa'alauiloaina o le igoa o le ekalesia, ina nei avea le le fa'amaoni o le tagata ma itu e mamasagia ai le lotu a le Ali'i i le lalolagi.

Na ta'ua e se molimau fa'atuatuaina i  le Samoa News e fa'apea, e fa masina na malaga ai le 'aumalaga e to'a 18 a le 'aulotu i Amerika, mo le fa'atinoina lea o galuega ta la'au e fesoasoani ai i le fausiaina o se  falelotu fou, ae maise ai o ni isi o manaioga e pei o se fale o le faifeiau, faiapea ai ma le faialeleia o le lotoifale o le ekalesia.

E le'i fa'ailoa e molimau pe fia le tupe atoa sa tatau ona maua i le malaga na alu, pau le la molimau, e $12,000 le tupe e le o aofia i le ripoti a le ta'ita'i malaga ma lana komiti, ae o lo o aofia i le ripoti a isi sui e to'atolu o le 'aumalaga sa latou i ai fa'atasi.

“O le ka'ika'i malaga a le 'auloku o le isi fo'i kama makua ua loa kausaga o kaukua i le ekalesia, sa avea fo'i ma ka'ika'i i gi isi o komiti kaua a le 'auloku peita'i e fou mea ia ua kula'i mai ai e pei oga ku'uaia ai o ia i le  malaga ga alu,” o le tomumu lea a le isi o molimau i le talanoaga ma le Samoa News.

O le itu e malie ai le fonotaga a le Ekalesia, na ona vevesi lava o le fonotaga, va'aia loa le vaeluaina o le 'aumalaga, o le isi vaega ua 'au i le ta'ita'i malaga ma le komiti, ae o le isi 'afa o le malaga ua latou lagolagoina isi toeaiina e to'atolu ia sa tu'uina atu fo'i a latou ripoti i luma o le 'aulotu, ona tau ai lava lea o le 'aumalaga, ua lau e le ta'ita'i malaga ma lana komiti le tau fa'aleaga o le isi vaega ma lo latou faia fua o lea ripoti lea ua mafua ai ona tu'u fesili le 'aulotu, ae o le isi itu ua latou lau le 'aitupe o le ta'ita'i malaga ma lana komiti, atoa ai ma tu'uaiga fai mai sa lafo lafo mai e le ta'ita'i malaga ma lana komiti tupe i o latou aiga ao i ai i Amerika.

Fai mai le molimau, o le mea lea ua tupu, ua tu'u atu e le faife'au le avanoa i itu e lua ina ia  tu'u atu ai i luma o le isi fono lea o le a vala'auina i le aso Sa nei fa'amaoniga o tu'uaiga ia ua lafo e le isi itu i le isi itu, e aofia ai lisiti o tupe sa lafo mai i aiga o le 'auali'i ia na ta'ita'ia le malaga, fa'apea ai se fa'amaonia au'ili'ili o tupe sa maua e le 'aumalaga ao i ai I Amerika.

Na ta'ua e molimau e fa'apea, e le o i ai se fuafuaga a le ekalesia e tu'uina atu la latou mata'upu i le ofisa o leoleo, ona o le malaga sa alu e sa'ili mai ni tupe e fesoasoani i le fausiaina lea o se malumalu fou, ae afai e fa'amaonia sa faia ni gaoioiga fa'aalatua ma fa'aaoga ai tupe sa maua a le ekalesia i le malaga, e ono faia se fa'ai'uga a le ekalesia e fa'amalolo ai tofiga a i latou nei pe afai e fa'amaonia.

Fai mai molimau, o le 5 ai lenei o tausaga talu ona fai sa'iliga tupe a le 'aulotu peita'i e le'i toe tu lava se falesa.

“Sa fai fo'i saoga kupe a makafale i masiga ka'ikasi peika'i e foliga mai e le o maua lava se aka magigo o le kala i le kupe a le ekalesia,” o le tomumu lea a le isi molimau fa'atasi ai ma lana fa'amatalaga e fa'apea, afai loa e mae'a le isi fono ae fa'amaonia ua 'ai le tupe, o le a fa'ailoa Ina igoa o le 'au 'ai tupe a le ekalesia, fa'atasi atu ai ma le igoa o le 'aulotu, ae ua sili ai ia la'ua le liu lotu leaga e le 'ai afu tagata e sa'ili mo le malo o le Ali'i.