O le mea moni, “E anoanoa’i taleni i Lupelele.” O se fa’ai’uga lea a le vasega o malo fa’aaloalogia, matua ma sui o le SPED ma le DOE sa latou maimoaina le si’ui o le Vaiaso Fa’apitoa mo e I ai afaina tumau o le tino ma le Mafaufau i le A’oga i Lupelele, Iliili.

O le vasega o Ali’i Faipule o le Itumalo Tualauta, lo la va’a se’elua, sa avea ma sui fa’apitoa o le Malo e maimoaina le fa’amoemoe na afua ai ona fa’amau fa’ailoga ma saili ni taleni e avea ma sao o Lupelele i le Masina lenei e fa’apitoa mo tapenaga ma galuega faia mo e uma e i ai afaina tumau o le tino ma le mafaufau i le tatou atunu’u.

“O se sao ua iloga le lelei tapena, ma e fa’afetaia ai le pulega a le SPED i Lupelele nei, le faletua o Frances Le’au ma le vasega o tama’ita’i faia’oga uma ua i ai!” O se saunoaga fa’apitoa lea a le tina o Papali’itele Fa’anati ma Jeanette Vasai mai le Ofisa autu SPED i Faga’alu.

O le sailiga taleni na tapena i ai le Frances ma le vasega o faia’oga e to’aiva i Lupelele, i ona vaega e lua, Galuega Fa’atino i le Arts ma le Tauvaga Pese i Siufofoga lelei. Na fa’atautaia nei tauvaga i le vaiaso ua te’a, i le aso Lua ma le Aso Lulu, ae o le aso atofa ananafi mo le laugatogi, ma fa’aalia ai loa taleni ua maua i lenei sailiga, i luma o e na vala’aulia fa’apitoa.

“O le taumafaiga lenei, sa aofia fa’atasi le fanau a’oga lautele, le fanau fa’apitoa ae maise o faia’oga, e fa’ailo ai lo latou galulue fa’atasi, e le fa’a’eseina ai se alo ua i ai ni mana’oga fa’apitoa tau le tino ma le mafaufau.” O se fa’apupulaga lea a Frances i lea itu o le taumafaiga.

O le fa’atulagaga lenei o le tauvaga o Ata na fa’atino: E tolu Vaega sa fa’atulaga ai: Fanau Laiti:

Tulaga 5 o Anastasia Afoa ma Toetu Sapakuka na vaelua le la’ua lea tulaga. Tulaga fa na maua lea e Jessica Wells, tulaga tolu na maua e Isa’ako ae tulaga lua na maua e Serina. O le na manumalo o Sky.

I le vaega matutua i le Galuega Ata fa’atino: Tulaga lima ai Annie Seuseu, tulaga fa e to’atolu lelei sui na mauaina: Solomona Gauta, Jessie Faleafine, Wilson Reid. I le tulaga tolu na tula’i mai ai Melody Iosua ma le tulaga lua o Pearl Tautolu ae tulaga muamua ai Siaumau Maui.

I le vaega lona tolu o ata fa’atino sa tauva ai faia’oga ma ua maua ai tulaga nei: Tulaga tolu o Lovine Isaia, tulaga lua ai le tama’ita’i o Magdaline Hakalo ae maua le tulaga muamua ai Nofo Ulufale i le ofu atoa na su’ia mai pepa i’ila lanu uli ma le pa’epa’e, ae sa siou mai e le tama’ita’i o Maggie.

I le vaega o le Musika, na fa’atulaga ai fo’i i vaega e tolu: Ta’ito’atasi; Ta’itoalua ma le Aufaipese To’atele.

I le vaega o solo na tulaga lima ai Silia Luapene na tutusa ma Vilai Ieremia. Tulaga fa na tutusa ai fo’i Pearl Tautolu ma Toa Solaita, Tulaga tolu sa tutusa ai Bruce Gase ma Semeatu Tauatama. O le tulaga lua na tutusa ai Rachael Sakaria ma Sautia Savini, ae o le tulaga muamua na maua lea e le susuga Gideon Sione i lana pese o le YOU Are the Love of My Life!

O le vaega o Duets sa mafai ona maua le tulaga lima e Hilary Simaika ma Ana Mulitalo; Tulaga 4 sa maua lea e Melody & Ms. Isaia ma le aufaipese to’alua a Emmeleka & Lionel Ausage. Tulaga tolu na maua lea e Samantha & Saipele Ausage ma Peter Tusi ma Josephine Saelua.

Tulaga lua na maua lea e Grace Sione ma Julia Tufele i le la’ua pese “You Are Beautiful” Peita’i o le tulaga muamua na maua lea e Deborah Meleisea ma Rejoice Toalepai.

 I le vaega o Aufaipese, na maua lea fa’ailoga i lona tulaga muamua e le Aufaiepse e ta’ita’ia lea e Lamatia, o se atali’i fa’apitoa, ma sa le a’oga o ia i le aso ananafi.

I le vasega o aufaipese a faia’oga, na maua ai le tulaga muamua e Arieta ma Makerita Lam Yuen , ae o le tulaga lua sa peseina ai le “Ta’elega i Petesa” e le tama’ita’i lalelei faia’oga o Helen Ma’ae Mata’utia, ae o lea pese, sa talosagaina ai e le tagata se ta’elega e toe fa’aleleia ai tino ua afaina i ma’i ma tiga tumau, o se sini lea o le polokalama o le SPED, ma e to’atele lava lana aufaigaluega i tina, aua o i latou lava e nafa ma tiute fai mo fanau, e auau fo’i i e na latou fanaua ma tiga tumau o le tino ma le mafaufau.

O le auau o le fa’amoemoe, ia mafai ona tatou ola fa’atasi, ma tausoa fa’atasi ma le fanau o latou tiga tumau o le tino ma le mafaufau, ona o afaina tumau ua latou o soifua ai, a’apa atu ma fesoasoani i se mea lava e te mafaia, a’o se pese fo’i e fa’anofo filemu ai sona tiga, o e saunia mai lou loto, ua sili lea ona fa’afetaia.

O le fanau e a’oa’oina i Lupelele, o i latou o fanau fa’apitoa, e to’a 44 ma faia’oga e to’a 10 ma sui o le pulega e to’alua, sa latou malaga uma i le tifaga i le aso Tofi, ae fa’ai’u i le ‘aiga tele i le Carl’s Jr. i le aso Tofi, o se fa’ailo lea o le alolofa o le aufaigaluega uma a le SPED i Lupelele mo latou i lenei tausaga, ma le masina fa’apitoa mo i latou. Ua moni ai le mau, “O lo’o faula’i taleni i Lupelele ae maise le taleni o le alofa ma le fa’asoa atu!”