Ads by Google Ads by Google

Toe Savali le Maliu

E le mamao se mea e te sa'ilia ai le Lo’omatua Saina  ua atoa le ono aso o maliu ma sa tu’uina lava o ia i lona pusa oti, ae tete’i tagata o le a o’o i le taimi e amatalia ai ona toe sauniga, e toe o atu e tatala atu le pusa oti, ua leai se oti, ae o lo ’o pateto mai tua i le umukuka o le fale o le olomatua, o lo ’o fai lana mea’ai.

O lenei tina e 95 ona tausaga, o lona igoa o Li Xiufeng, ma sa maua atu e ona tua’oi, ua ta'oto mai ua matua le toe gaoioi lava i lona fale, manatu i latou uma, ua maliu.

O le tala mai, na iloa e ona uso a tua'oi, sa se’e le lo’omatua ma tau lona ulu i lalo, pe tusa o le lua vaiaso na muamua mai, ma ua fa’apea ai lava i latou, o le afuaga la lea ua maliu ai o ia a’o moe.

O le galuega alofa na faia e ona aiga tua’oi, o le sa'ilia mai lea o lona pusa oti, ma tu’u i ai lona tino maliu, ina ua mae’a faia ona lavalava ma tapena lelei ona foliga ae se’i tapenapena e i latou ni mea e faia ai lona toe sauniga ona tanu ai lea.

O le tala mai e ono lelei aso, o tau tapena e nai uso a tua’oi le falelauasiga o si lo’omatua, peita’i, o le aso ua latou tu’upoina o le a faia ai lona sauniga na usupo ane ai i latou e toe siaki Li, peita’i, ua matua segia o latou mauli, ina ua susu’e atu le pusa oti, ua leai se lo’omatua o i ai. O le lo’omatua lenei e nofo i Beiliu, i le itumalo o Guangxi i Fiti lava.

Na fa’alogoina e i latou nei o lo ’o i ai se tasi o pateto mai i le umukuka o le fale o le tina matua, ma e o atu, talofa e, o lo ’o fai mai lana mea’ai. O lana tala, ua leva tele ona moe o ia, ua matua fia’ai lava.

O le aganu’u a Saina, afai ae maliu se tasi e le avea i se falema’i e fa’a’aisa ai, ae tu’u pea lava i lona aiga, i totonu o lona pusa maliu, ae tatala e le lokaina ona e tatau ona o atu uma tagata e fia fa’amavae ma faia a latou fa’amavaega ia te ia, ona fa’ato’a falelauasi ai lea o le ua maliu. O le afuaga lea sa le lokaina ai le pusa maliu o Li, ae sa na’o na tapuni, ae tatala lava mo fa’amavaega, ona o lana aganu’u. O le afuaga fo’i lea e tasi, ua le ‘avea ai o ia i le falemaliu.

O le tala a lenei tina, fa’afetai, ua matua manaia lo’u moega fou, e teu pea se’ia o’o i le aso e alu moni ai loa lana malaga tu’u sa’o i le lagi. O lo ’o soifua mai pea Li i Fiti i le taimi nei, peita’i, ua fa’ailoa mai e foma’i, o le mea na tupu i lea tina matua, ua manatu uma tagata ua maliu, ae le iloa o lo ’o ia maua i le tulaga e fa’aigoa e foma’i, “Oti atifiso” po ’o le oti le tino ae le’i oti le agaga!

Masalo a tatou fa’ata’ita’i i lenei faiga o le tu’u pea o nai a tatou pelega i le fale, e mafai ona toe ola mai i latou ae o lo ’o tatou fa’atalitali atu pea ma le toto’a ia i latou e toe ala mai. Peita’i, o le tala mai ia Li, na mafanafana lava lona tino, e le’i maluluina pe malo, o le mafua'aga lea ua toe ola mai ai o ia. O se tasi fo’i lea o fa’ailo e ao ina nofouta i ai i tatou, afai ae mafanafana pea lava le tino o le tagata, e ao lava ona fa’atali pea, o lo ’o i ai le avanoa e toe ola mai ai.

O le tele o tatou maliu, e ‘ave lava i le falema’i e le’i maluluina, ma e tatau lava ona tatou onosa’i la’itiiti i o tatou aiga, se’i tau 'iloga mai ua amata ona maluluina tino o nai a tatou pele mamae ua maliliu ona fa’ato’a vala’au lea o ta’avale a le falema’i e 'ave ai i le Maota Maliu.

I se tala mai a le foma’i sa toe siakia le tino o Li Xiufeng ua ia fa’aalia ai, “E atoa le isi 10 tausaga e le malaga lava Li i lana malaga ua mae’a fa’atauina ai lona va’a.”

saunia: Leua Aiono Frost