Ua lagona i le loto o Loimataoapaula lona toe fia va’ai i ona matua, ua lagona le toe fia fo’i i le aiga moni.  E foliga mai o lona naunau sa i ai i lona fia alu e tafao i Tutuila, ua te’i lava ua le toe i ai. Ua lagona e le teine o se aiga ‘ese lenei aiga o le a o i ai ma lona tuagane. E alu lava fa’amatalaga a Eteuati ma talie ma Minalosa ma lona to’alua, ae ua fa’asolosolo mafaufauga o Loimata i lona aiga. Ua ia misia lona tina i lea taimi.

Ua toe mafaufau nei Loimata i le la fa’amavaega ma lona tina, o se fa’amavaega e le toe fia mafaufau i ai se tasi, ona a o’o i ai ona mafaufauga, e lagona le vaivai o le loto ma le mafaufau. O lea sa ia taumafai ai ina ia fa’ata’atia ‘ese, ae tulimata’i ia se isi lasaga fou mo ia lava. E tasi lava le upu na tautala ane ai lona tina ia te ia, ae e le i tu’ua Samoa mo Tutuila, “Loimata si a’u tama pele, e to’atasi lava oe, e leai lava se isi mea ou te mana’o i ai, ae tau lava o lenei, ia e toe fo’i mai ia te a’u, o le a ou fa’atalitali atu pea mo oe.” Ua taumafai nei Loimataoapaula e fa’agalogalo le tulaga na o’o i ai i le la fa’amavaega ma lona tina, peita’i, e fafagu mai pea i lona loto ma lona mafaufau, ae maise ai, o lea ua tu lau’ele’ele nei i le Motu o Fiafiaga, Amelika Samoa.

O Eteuati, ua na o le pese aleluia e le ano ane lava i a Loimata, ae ua fai fai tala nei i le ave ta’avale. “A Minalosa, fa’apea lava a a’u e le maua i le tou motu ituaiga fausaga o tagata lea e i ai le ave ta’avale, pei lava sa amo popo muamua le ave ta’avale i Savai’i sau ai i le Motu o Fiafiaga.”

Ua ‘ata le tama ave ta’avale ma lulu lona ulu, ae toe tuli tatao ane e Eteuati, “Sa i ai lo’u manatu o tagata e nonofo i le Motu o Fiafiaga, e felesi ma molemole tino, a’o lenei ua pei o se tama na si’isi’i u’amea mamafa. Mikaele, o fea na maua mai ai le ave ta’avale?”

E pei e ‘ene e se isi Mikaele i lea taimi. E leai se tala na tautala ai le ave ta’avale, ae ua na o le ‘ata atu ai ma ia, i tala nei e fai ane e Eteuati. O le mafaufau o le ave ta’avale i lea taimi na fa’apea, “e pei lava e tau fa’a’afa’afa amio a le tama lea na o mai nei ma Mikaele ma Minalosa mai Samoa.”

Na fa’atoa manatua e Eteuati lona tuafafine o Loimataoapaula, ina ua tu le ta’avale i luma o le fale o Mikaele ma Minalosa. Na va’aia e Eteuati le matagofie o le fanua atoa o lo’o si’omia ai le fale, fa’atasi ai ma le toga la’au o lo’o i luma tonu o le fale. Na toe tilotilo atu nei i le isi itu, ma ona iloa atu ai le fale fogafalelua o lo’o tu mai ai, ma e le mamao tele ma le fale o Minalosa ma Mikaele. Na fesili nei Eteuati po’o le fale o ai, ae na tali Minalosa, o le fale o le tama o Mikaele. Ua u’u le gutu o Eteuati ma toe tilotilo atu i le fale ua sili ona matagofie i le va’ai. Na fa’ateia lona tausoga o Minalosa ina ua fa’apea ane le musumusu a Eteuati, “Mina, e muliga fo’i le fale le la e tu mai, i le fale o le teine pe a leva lava.” Ua ‘ata Minalosa ma fa’apea ane i a Eteuati, “Eteuati, e te maua, pe a lelei lou faia’i, ma tu’u au aga na ou te le fia pupula atu lava i ai.” Na toe tali mai Eteuati e fa’apea, “Ioe, Minalosa, se o le faia’i lava ma le atigipo’o, uma mea uma o le olaga nei.” Ua alu nei le talie ma toe fa’aauau le matamataga a Eteuati i le fale fogafalelua o le tama o Mikaele.