Ads by Google Ads by Google

Fuafua se isi nonogatupe e $2 miliona mai Litaea mo le LBJ

Afai ae pasia e le Fono le pili tupe lea na faaulu i le taeao ananafi i maota e lua, e faasoasoa atu ai le aofaiga e $2 miliona, o lona uiga o le a tauaaoina foi e le falema’i o le LBJ seisi $2 miliona e fesoasoani atili ai i le tulaga pagatia o lo o feagai ma i latou i le itu tau tupe.

O le masina na tea nei na tauaao atu ai e le kovana i le pulega a le falemai le nonogatupe e $3 miliona na pasia atu e le Fono, e fesoasoani ai i le tulaga pagatia o loo i ai le falemai i le itu tau tupe.

O lea tupe o lo o nono mai i le Teugatupe o Taui mo Tagata Faigaluega ma le faamoemoe, o le tupe e maua mai i le lafoga o totogi e 2% lea foi ua toe sii i lenei tausaga, o le a totogi ai le nonogatupe lea, ae o le tupe e totoe ai o le a tuu atu sao loa i le falemai e fesoasoani ai i nisi ana faagaioiga.

O le taeao ananafi na taufai fa’aulu ai i luma o maota a le Senate ma le Maota o Sui pili toe faia ai se suiga i le tulafono lea ua maea ona pasia e le Fono ma sainia e le Kovana, e nono mai ai le $20 miliona mai le vaega o le litaea, ina ia mafai ona toe faaopoopo atu i lea nonogatupe le aofa’i e $2 miliona e tuu atu mo le LBJ.

I le maga fou lea ua i luma nei o le Fono, mai le tulafono na pasia ma sainia e le kovana e faatulai ai le nonogatupe e $20 miliona mai le vaega a le Litaea, o loo taua ai le talosagaina o le toe faaopoopo atu lea o se nonogatupe e $2 miliona i luga o le $20 miliona ua maea ona i ai.

Ua taua foi le faaaogaina pea o tuutuuga na sainia ai le nonogatupe e $20 miliona i le va o le malo ma le vaega a le Litaea, e toe faaauau ai le nonogatupe lenei, sei vagana ai le toe faaopoopo o le taimi e toe totogiina ai le nonogatupe.

O aiaiga mo le nonogatupe lea e aofia ai le tuuina atu sao lava o le $2 miliona i se teugatupe e ese mai a le falemai, ina ia mautinoa le alu sa’o i ai o le nonogatupe.

O aiaiga uma ua maea ona faatulaga mo le toe totogiina o le aitalafu muamua i le Litaea, e aofia ai le faatuatuaina o le malo o Amerika Samoa, o le faamau o loo i ai ma faamaoniga e faamau le nonogatupe, faapea ai puna’oa e tuuina atu mo le nonogatupe, o le a faaaogaina uma lava mea ia mo le toe totogiina atu o le nonogatupe fou e pei ona fuafuaina.

O le isi vaega o le tulafono fou lea ua i luma o le fono o loo taua ai e faapea, i totonu o le  lona 5 o aso talu ona tapunia le toe faatupeina o le nonogatupe, o le a faaoo mai e le kovana po o sona sui i le fono kopi uma o pepa o le nonogatupe, e aofia ai folafolaga ma maliliega mo le toe totogiina atu o le nongatupe.

O le Teutupe a le malo na te tuuina atu i le fono ripoti mo le nonogatupe pe afai e manaomia e le fono mai lea taimi i lea taimi.

Afai ae maea ona toe totogiina uma lenei nonogatupe, o le a soloia loa lenei tulafono, ae o le a toe faaaoga isi ona vaega pe afai e toe i ai nisi aiaiga e faia e le malo ma le vaega o le Litaea.

O le masina na tea nei na tuuina atu ai e le kovana lana pili tupe e $8 miliona e fesoasoani ai i le falemai, ma le faamoemoe e nono mai i le Vaega a le Litaea ae faatulaga  le lafoga i totogi e 4%, faatasi ai ma le lafoga e tai $2,000 mo pisinisi uma lava i le tausaga e toe totogi ai le nonogatupe lenei.

Ae i se iloiloga sa faia e le maota o sui ma le pulega a le Litaea i le vaiaso na tea nei, na faailoa ai e le Taitaifono o le Litaea ia Aleki Sene Sr e faapea, e le toe gafatia e le Litaea ona toe fai se isi nonogatupe e $8 miliona ma le malo, aua afai e toe faia se isi nonogatupe, o lona uiga e manaomia nisi aiaiga fou mo le toe totogiina o le nonogatupe lea.

Saunoa Aleki, e na o le $6.5 miliona le tupe e mafai ona nono atu e le Litaea i le taimi nei.

I le faatomuga o lenei tulafono o loo taua ai e faapea, o se mea alagatatau le ave o le faamuamua i le tausiga ma le vaaia lelei o le soifua maloloina o tagata o Amerika Samoa, ma e tatau foi ona mautu tulaga tau tupe ina ia mafai ai ona leleia le faataunuuina o lenei faamoemoe.