Ads by Google Ads by Google

Alofa: Fa'avae ai Aiga— Vaega 130

Talimalo le aiga o Mikaele i le malaga mai Samoa

O le sa pele i le loto, ua mou malie ‘ese atu i le va’ai. Ua na o le toe fia va’ai atu i ai ae ua leai se tasi e toe nofo mai. Ua lagona ai le matuitui ma le tiga o le nofo valavala ma le va i vasa.

Talu ona tu’ua e Loimata ma Eteuati lo latou aiga, ua va’aia e Lameko le suiga ua i ai Tagiilima. O lona fiafia ma lona naunau i le fa’atinoina o le fa’atoaga fa’apea ma mea o le aiga, ua le toe maua. O lona fiafia fo’i e talatalanoa ma ia ma le fanau, ua le toe va’aia tulaga ia. Ua o’o fo’i i le latou mafutaga fa’aleaiga lea sa masani ona fai i afiafi o Aso Sa ta’itasi, ua te’i lava ua motusia. Ua le toe atoatoa le fiafia sa o latou maua a’o mafuta fa’atasi ma le fanau, ona o lea ua to’esea mai le to’alua, ae ua totoe nei na o Lolesio ma Emani. 

Ina ua tu lau’ele’ele le va’alele i Tafuna Amelika Samoa, ua fou i le va’ai a Eteuati ma Loimata lenei mea ua taunu’u mai i ai. Ua fiu e tau autilo ni fale e pei o Samoa e fa’asolosolo ma putuputu fale.  Na ona tu lava o le va’alele, fa’apea ane loa Eteuati i lona tuafafine, “Mata, e ‘ese lava lenei motu i la’u va’ai, o lea e sili mamao atu ai si o tatou motu, e mo’i lava e lima vaivai, ae se i e va’ai atu ia i le malae va’alele.” Ua ‘ata le teine ma po le lima o lona tuagane ma fai ane i ai e ‘aua le pisa.  “Mata, fa’alogo lelei mai lava oe le tuafafine e pele i lo’u loto ma lou mafaufau. ‘aua ne’i e toe fa’aigoaina a’u i a Eteuati, ua e iloa, vala’au mai a’u i a Cindy Rose, ua e fa’alogo mai.”

E leai se tali a Loimata na tu’u ane i lona tuagane i lea taimi, ae ua mata’i uma e le teine le malae va’alele. O se tama’ita’i e lalelei i le va’ai, o se tama’ita’i e le tau su’e sona to’alua pe a mana’o i ai. O ona uiga ma lana tautala, ua matua’i simu lava, ai fo’i o le mea lea e faigata ai i si ona tina ona tu’u e alu.

A’o le i alu ‘ese le malaga a Loimata ma Eteuati ua uma ona fautua ma a’oa’i  i ai lo la tina, ma ua le toe i ai lava se isi mea na misi i le tautalaga ma le tima’iga a le lo’omatua o Tagiilima i lana fanau.

O se fa’amavaega ua sili ona faigata i a Tagiilima, ae sa ia va’aia le loto tele o Loimata ma lona fiafia. O lea sa fautua pea i ai Lameko, ina ia ‘aua nei manatu tele i lea itu e vave ona maua ia i ma’i o le tino, a le o le na fo’i o lona mafaufau. Ua alu nei le ta’avale i le aiga o Mikaele lea e nonofo ai nei ma Minalosa i Tutuila, Amelika Samoa.  E leai se mea e le i o’o i ai mata o le tama’ita’i o Loimataoapaula, a’o lona tuagane, ua na o le fai nei o ana tala, ma tali e ai ma Minalosa ma lona to’alua, ae maise o le ave ta’avale, lea na alu ane i le ta’avale a Mikaele ma Minalosa e au mai i latou mai le malae va’alele. Na fa’apea mafaufauga o Eteuati i lea taimi, “E, ua maua le sa’olotoga o le olaga, ua leai se tasi e toe fa’alavelave mai i lo’u olaga taumafai.” O ona mafaufauga ia, na toe manatua vave ai e le tama ia ona matua, ae maise o si ona tina o Tagiilima.

E faia pea