Ads by Google Ads by Google

Manu’a se alii leoleo ina ua tau’ai e ni tamaiti lana taavale

E toa 7 ni alii talavou ua tu’ua’ia i le tau’aia o ni ta’avale leoleo se lua, e aofia ai le ta’avale a se ali’i kapeteni, i le masina o Oketopa 2011, ma manu’a ai le fofoga o le alii kapeteni, ina ua tau se ma’a i le tioata o lana taavale a’o pasi ifo i luga o le ala.

O i latou nei, e aofia ai ni alii ua silia ma le tai 18 tausaga le matutua e aofia ai Vani Atafua, Siaosi Laulu, Benjamin Maybir ma Iosefa  Falealo, atoa ai ma ni ali’i se to’atolu, e i lalo tausaga ma tulaga o le tulafono.

Na te’ena uma e i latou nei tuuaiga faasaga ia te i latou  ina ua tutulai i luma o le faamasinoga faaitumalo i le taeao ananafi, ma ua faatulaga ai loa la latou uluai iloiloga e faia i le faaiuga o le vaiaso nei, lea o le a iloilo ai e le Faamasinoga Faamaumauga a le malo, pe faamaonia sa soli se tulafono, ae poo i latou foi ia o lo o tuuaia i le solia o le tulafono.

E $10,000 ua faatulaga e le faamasinoga e totogi ona tatala ai loa lea o i latou nei e faatalitali ai taualumaga o a latou aamasinoga.

I faamaumauga a le faamasinoga o lo o taua ai e faapea, o le taavale a le alii Kapeteni ia Taase Sagapolutele na muai tau’ai e i latou nei i le aso 28 Oketopa 2011, lea e tusa ma le $1,100 le tau aofa’i o vaega o le taavale sa faaleagaina.

A’o agai atu le ta’avale a le alii kapeteni i le itu i Sisifo o le motu o Tutuila, sa faafuasei ona ia faalogoina le tauai e nisi o lana taavale, na faaauau pea ona alu le taavale a le ali’i kapeteni, ina ua afaina lona foliga i lea fa’alavelave.

O le po o le aso lava lea, na toe tau’ai ai le taavale a le alii leoleo o Liu Chang ma faaleagaina se vaega o le taavale, lea e tusa ma le $950 le tauaofai o vaega sa faaleagaina.

Na taua i faamaumauga le osofaia e i latou ua tuuaia, o le taavale a le alii leoleo o Chang i le vaega lava foi lea na o latou osofaia ai le taavale a le alii kapeteni.

Na faailoa e Chang i leoleo e faapea, ao la i ai ma lana paga leoleo i totonu o le la taavale, sa laua faalogoina le tauai e nisi o le tino o le taavale. Sa alu alu lemu le la taavale ma la vaaia ai ni tamaiti ua tamomoe i le isi itu, i totonu o Nuuuli, peitai la te lei tu tu ai ona o le pogisa o lea nofoaga, aemaise ai sa la manatu e puipui i laua mai le ono aafia i nisi gaioiga e sili atu ona matuia.

Ina ua fesiligia e leoleo i latou uma ua tuuaia i lenei mataupu, na atagia mai ai le tau tuuai e le isi i le tasi le faatinoina o lenei solitulafono.

Na faailoa e nisi o i latou nei i leoleo e faapea, sa faia sa latou tonu ina ia faapotopoto i le nofoaga lea na o latou faatinoina ai lenei solitulafono, ma o latou tauaiina ai taavale a leoleo.

O lo o tuuaia uma i latou nei i moliaga mamafa o le faaleaga meatotino i le tulaga muamua, faatasi ai ma moliaga o le faaoolima faasaga i alii laiti e toatolu.