Ads by Google Ads by Google

Tala mai le Fono Faitulafono

FAATULAGA ASO E AMATA AI GALUEGA KOMITI SUESUE SENATE

O le Aso Gafua o le vaiaso fou, le aso 12 o Mati ua faamaonia mai e le taitaifono o le Komiti Suesue a le Senate, le SIC, o le a amata aloaia ai galuega a le komiti mo ana suesuega i nisi o mataupu o lo o fia malamalama i ai le maota maualuga.

Saunoa le afioga i le Senatoa ia Lualemana Faoa e faapea, ua amata ona galulue le komiti mo le tuuina atu lea o poloaiga ma tusi samania e talosagaina ai faamaumauga o loo manaomia mo a latou suesuega.

O le Falemai o le LBJ i Fagaalu lea ua faamaonia mai e le taitaifono o le a agai muamua i ai a latou suesuega, ina ia manino le tulaga o tupe ma lona faaaogaina e pei ona fia malamalama i ai le maota maualuga.

TOE TOLOPO FAAIUGA A LE SENATE PILI TUPE KOVANA

E lei faataunuuina le palota a le Senate mo le faitauina lona lua o le pili tupe a le alii kovana, lea e faasoasoa atu ai le $50,000 e faamaea ai le fale Samoa i Utulei, ma le $50,000 e fesoasoani ai i le au football a le fanau, ina ua pasia le mau na faatulai e le alii Senatoa ia Lemanu Peleti Mauga e toe tolopo ai le palota a le maota.

O le Sui Peresetene ia Tulifua Tini Lam Yuen na faatulaiina le mau e tuuina atu le pili e pasia mo lona faitauga faalua, ma maua ai loa le avanoa o le alii peresetene ia Gaoteote Palaie Tofau e fesiligia ai le afioga Tulifua, poo fea le alagatupe o loo faamoemoe e faatupe mai ai le pili tupe lea a le kovana.

Na taua e Tulifua, o loo fuafua le kovana e faatupe mai le pili i le vaega tupe e $253,000 lea sa ia teena mai suiga a le Fono mo le Paketi a le malo 2012, peitai na saunoa Gaoteote e faapea, o lea ua toe pasia e le Senate lana pili tupe e $253,000 sa teena e le kovana mo le LBJ, ma faaleaoga ai le malosi faakovana na te teena ai se pili e pasia atu e le Fono.

Talu ai e lei auai le  taitaifono o le komiti o le Paketi a le Senate ia Lemanu i le aso na faaulufale ai le pili tupe lea a le kovana, na tofia ai e le peresetene le komiti a Tulifua mo le faatulagaina o se iloiloga, peitai e lei faia se iloiloga a le komiti sei vagana ai le faaiuga ina ia tuu sao atu loa le pili e fai i ai le palota a le Senate.

Na tulai Lemanu ma talosaga ina ia toe faaui mai i tua le mau e palota ai le pili i lona fautauga faalua, ona o loo i ai le iloiloga ua faatulaga mo le aso Tofi o le vaiaso nei, lea o le a fesiligia ai molimau a le malo e uiga i le pili tupe lenei.

Saunoa Lemanu, ua ia tauaaoina se tusitusiga mai le Ofisa o le Initeria e faatatau i le faamatuuina mai lea o se vaega tupe e $39,900, ma le faaupuga o loo faaagaaga mo le taelega i Utulei, ma e le iloa pe o le vaega tupe lea ua faamoemoe e faamaea ai galuega o le fale Samoa o loo fausia pe leai foi.

E ui o lea e lei faia se faaiuga a le Senate i le latou pili tupe mai le kovana, o le vaiaso na tea nei na pasia ai e le maota o sui la latou pili tupe e faasoasoa atu ai le $50,000 e faamaea ai galuega o le fale Samoa, ma le $50,000 e fesoasoani ai i le au football a tama aoga.

SAUNI SENATE FESILIGIA PULEGA LBJ

O le 8:30 i le taeao nei lea ua faamoemoe le komiti o le Soifua Maloloina/LBJ latou te fesiligia ai le pulega o le falemai o le LBJ, ona o nisi o mataupu ua tulai mai o loo fia malamalama i ai afioga i Senatoa.

O ia mataupu e aofia ai le fuafuaga a le falemai e faaitiitia itula faigaluega a tagata faigaluega, faapea ai ma aiaiga o le nonogatupe lea ua maea ona latou sainia ma le malo.

O atugaluega o le Senate ua faavae ai lenei iloiloga, ia latou malamalama lelei i aiaiga uma o le nonogatupe e $3 miliona lea na pasia e le Fono mo le falemai, ina nei i ai nisi lavelave e faaopoopo atu i ai e le malo ae lei pasia e le Fono.

E le gata foi i lea, o loo fia malamalama foi le Senate i le mafuaaga o le a toe faaitiitia ai itula faigaluega a tagata ao lea ua pasia le $3 miliona e fesoasoani ai i tulaga pagatia tau tupe o loo latou feagai.

Saunoa le taitai komiti o le falemai a le Senate ia Galeai Tuufuli e faapea, e leai se mea o le a pagatia ai fua tagata faigaluega a le falemai e tauamo le faafitauli tau tupe o loo  feagai ma le falemai, ae mafua mai o le faatamala o le malo i le le totogiina atu o tupe sa tatau ona tuu atu e fesoasoani ai i le falemai.