Ads by Google Ads by Google

Fautua Ward i se aiga e tausi le filemu

O le tausiga o le filemu ma le nonofo fealofani i le va o aiga e lua, o le autu lea o le feau na momoli atu e le afioga i le alii faamasino o John Ward II i sui o le aiga o Toilolo, ina ua sainia sa latou maliliega ma le malo i le vaiaso na te’a nei, ma fa’amuta ai se fe’ese’esea’iga na tula’i mai i lo latou va ma le aiga o Aniseko.

Na fa’ailoa foi e Ward e fa’apea, ana fa’apea e matuia atu ni manu’a na a’afia ai le isi aiga, e ono matuia foi se fa’asalaga a le fa’amasinoga e tu’uina atu i nisi o i latou.

O se vevesi na tulai mai i le va o le aiga o Toilolo ma Aniseko i Futiga i le vaiaso i ona tua atu, na mafua ai ona loka i le to’ese i Tafuna nisi o ia aiga, na aofia ai tagata e toalima mai le aiga o Toilolo.

O lea vevesi na mafua mai ina ua oso le taavale a Taoipu Toilolo i luga o se ta’ifau a le aiga o Aniseko, ma tulai mai ai loa se misa tele i le va o aiga ia e lua, ina ua toe foi mai Taoipu o lo o faatali atu tagata o le aiga o Aniseko mo ia.

O le vaiaso na te’a nei na taliaina ai e le Fa’amasinoga Fa’aitumalo se maliliega ua sainia i le va o sui e to’alima o le aiga o Toilolo ma le malo, lea e pei ona tali ioe ai Taoipu i le moliaga o le fa’ao’olima i le tulaga tolu, ae o le isi vaega e to’afa e aofia ai Matagisila Toilolo, Linda Toilolo, Allen Toilolo ma Dolly Toilolo ua tali ioe i le moliaga mama o le faatupu vevesi i nofoaga faitele.

Na faatoese Taoipu i luma o le faamasinoga e tusa ai o le mea na tupu, ma ia tautino ai e faapea, na te lei iloaina ua oso lana taavale i luga o se ta’ifau i le taimi na alu atu ai i le faleoloa, peitai ina ua toe foi mai, sa ia vaaia ai tagata o le aiga o Aniseko o loo faatali atu i luga o le auala ia te ia ma ma’a, laau ma a’upega

Na taua e le isi sui o le aiga o Toilolo o Matagisila le tele o se lesona ua aoaoina e le latou aiga talu mai le faalavelave na tupu, ma ua fesoasoani atili ai mo le faaleleia o faaiuga ma mafaufau i taimi e tutupu ai faafitauli faapenei.

Sa faailoa e Matagisila i le faamasinoga, o tagata o le latou aiga e le o ni tagata faatupu vevesi, ae o tagata latou te tausia le filemu, peitai o le faalavelave na tulai mai i lea aso e le masani ai tagata o le latou aiga.

Na faailoa e Ward ia i latou e toalima na molia, e le o se faaiuga sa’o lo latou faia o se faaiuga i lo latou lava malosi, aua o loo i ai leoleo o le latou matafaioi lea o le fesoasoani e faafilemu ni vevesi faapea e tulai mai.

“Ua avea le ta’ifau ma auala ua tulai mai ai le vevesi i le va o aiga e lua, ma e ono mafai ona oo atu i se isi tulaga e sili atu ona matuia,” o le saunoaga lea a le alii faamasino.

“Ae ana faapea e matuia atu ni manu’a na oo ia i latou na aafia, e le na o ni masina e mafai ona loka ai outou i le falepuipui, ae mafai ona ta’i tausaga,” o le saunoaga lea a Ward ma ia fautuaina ai loa i latou ua molia ina ia tausi le filemu i totonu o le latou aiga i soo se taimi.

E ui o lea ua tautino le aiga o Toilolo ua latou aoaoina se lesona taua mai le mea sa tupu, peitai na saunoa Ward, e manaomia lava nisi aoaoga faa faufautua e fesoasoani atili ai ia te i latou, ina ia mafai ai ona taofia i latou mai lo latou toe aafia i faalavelave faapenei i le lumanai.

E tai 30 aso sa manatu le faamasinoga e faasala ai i latou uma nei i le toese, peitai ua faamalumalu lea faasalaga, ae o le a faanofovaavaaia i latou i lalo o poloaiga a le faamasinoga, e aofia ai lo latou totogiina o sala tupe tai $100 a le tagata i totonu o le 30 aso, o se tasi lea o tuutuuga o a latou faanofovaavaaia e tai 12 masina.

Ae talu ai o Linda Toilolo na malaga mai i le pemita 30 aso, ua poloaina ai o ia ina ia ona tuua le teritori ma aumau ai i fafo atu mo le umi e 12 masina o lana faanofovaavaaia.

Ua fautuaina foi e le faamasinoga i latou uma nei ina ia aua nei o latou toe taumafai e faafesootai le aiga o Aniseko i soo se taimi.