E to’atele Faipule na o latou fesiligia le alii pule o le Ofisa o le ARRA, susuga Pat Galea’i, e tusa ai o vaega tupe lea ua mafai ona fa’amanuiaina ai le tamaoaiga o le atunu’u, talu ona amata le polokalama a le ARRA, i le 2010.

O le ARRA, o vaega tupe ia sa famatuu mai e le malo tele i setete uma ma teritori e fesoasoani i le toe fa’aleleia atili o le tamaoaiga o vaega ‘ese’ese o le malo tele, e ala i le fa’a tula’ia o galuega fou, fa’atino ma fa’atupe nisi o atina’e, e le o mafai ona fa’atupeina, fa’atasi ai ma le fa’amoemoe ia maua se fesoasoani mo pisinisi tua, atoa ai ma le malo.

O le vaiaso ua mavae, na faia ai se iloiloga a le komiti o le Fa’agaioiga i lalo o le ta’ita’iga a le ta’ita’ifono, le susuga Faimealele Anthony Allen, a le malo a le maota o sui, mo le toe iloiloina o lenei polokalama.

Na taua e Galea’i i luma o le komiti e faapea, talu ona amata mai le polokalama a le ARRA mo Amerika Samoa, e tusa ma le $250 miliona le tupe sa tuuina mai mo le teritori, ma o lea tupe ua mae’a ona fa’aaoga le $150 miliona, ae toe $100 miliona o lo o totoe.

O le tupe o lo o totoe e aofia ai le silia i le $83 miliona lea ua tuuina atu mo le tosoina mai o le uaea o feso’ota’iga mo le kamupani telefoni a le ASTCA, ma le $16 miliona o lo o fa’asoasoa atu i nisi o galuega ma atinae i le atunuu.

O le to’atele o faipule sa latou fesiligia vaega tupe ‘ese’ese o lo o fa’asoasoa atu i polokalama a matagaluega ‘ese’ese a le malo.

Sa fia malamalama foi afioga i faipule pe fia se tupe o lo o alu sa’o i totonu o le tamaoaiga o le teritori mai le tupe atoa lenei, e ui o ia fa’amaumauga e le i mafai ona tu’uina atu e leARRA i luma o le komiti.

Saunoa Vailiuama Steve Leasiolagi e fa’apea, sa tatau ona malamalama i le ripoti a le ARRA, le aofa’i o le tupe o lo o alu i totonu o le atinae o le atunu’u, aofa’i o galuega fou ua maua talu ona amata le a le ARRA, atoa ai ma ni pisinisi fou ua mafai ona fa’atula’i i le atunu’u.

Na fesiligia e Larry Sanitoa tulaga o tupe ua toe faapolokalama ina ua o’o atu i le taimi e tatau ai ona fa’aaoga, ae lei fa’aaogaina lava, lea na ta’ua ai e Galea’i, pe tusa ma le $4 miliona le tupe sa toe faapolokalama mai i le matagaluega o Aoga, ma tu’uina atu ai loa i le Ofisa o Tautua tau Pulega.

Ina ua fesiligia ni tulaga o penefiti e maua mai e tagata i le ASPA tauala mai i le polokalame a le ARRA na taua e Galea’i e faapea, e le o toe umi se taimi e toe faaitiitia pili a le ASPA pe afai ae faaaoga le malosi lea e maua maii le la, e ui e lei vavala mai i le taimi nei, peitai e i ai lona talitonuga e le o toe mamao.

Peitai na saunoa Vailiuama e faapea, “ua oi tagata i le maualuga o le tau o le eletise ma le vai, ae o lea lava e leai se fesoasoani o maua mai i le ASPA.”

I le faaiuga o le iloiloga na manino ai nisi o faipule i le tulaga ua i ai le polokalame, faatasi ai ma fautuaga ua latou tu’uina atu ina ia una’ia pea matagaluega e fa’aaoga tupe ina ia aua nei toe fa’afoi i le malo tele.