Ads by Google Ads by Google

Tala mai le Fono Faitulafono

FA’AMALOSIA TULAFONO MOLI O TA’AVALE IA APERILA

O le aso 16 Aperila lea ua faamoemoe le Matagaluega o le Puipuiga o le Saogalemu Lautele e amata fa’amamaluina ai le tulafono lea ua sainia nei e le alii kovana, e faasa ai ona toe fa’aaoga nisi ituaiga moli felanulanua’i i luma ma tua o soo se taavale, e ese mai i moli na aumai ai le taavale mai le fale gaosi taavale.

O lea tulafono na pasia e le Fono Faitulafono i le masina na tea nei, ona o le tele o faasea mai le mamalu o le atunuu i le tele o taavale ua latou faaaogaina ituaiga moli faaopoopo nei, ma e ono tutupu mai ai ni faalavelave i luga o le alatele ona o nisi o taimi e faa faigata ai i isi ave taavale ona o latou iloa manino le auala e mafua mai o ituaiga moli nei.

Na faamaonia e le taitaifono o le Komiti o le Puipuiga o le Saogalemu Lautele i luma o le maota o sui i le aso Faraile na tea nei e faapea, e 60 aso talu mai le aso na sainia ai e kovana Togiola Tulafono le tulafono, ona faamalosia loa lea e le Ofisa o Leoleo.

Saunoa Tuumolimoli Saena Moliga e faapea, e le toe i ai lava se isi alofaga mo soo se taavale na te le usitaia le tulafono lenei pe afai e oo atu i le aso e faamamaluina ai, a’o tumau pea ona faaaoga moli fou e le o faatagaina i le tulafono.

O le mataupu lenei na laga e le alii faipule ia Puleleiite Tufele Li’amatua i luma o le maota o sui i le vaiaso na tea nei, ona o le tele o faasea mai nisi o le atunuu i le vaaia pea lea o taavale ma latou moli lanu eseese o loo feoai i luga o le alatele.

Saunoa Puleleiite e faapea, o lona popolega o loo i ai, ina nei tuai ona faamalosia le tulafono ae tulai mai ai se faalavelave e sili atu ona matuia ae o lea ua maea ona sainia le tulafono.

Na faalauiloa e Togiola i le masina na tea nei i luga o se tasi o ana polokalame, lona sainia o lenei tulafono ona o le manatu ia puipuia ai le saogalemu i luga o alatetele.

Na faafetaia foi e le alii kovana le Fono ona o lenei pili taua, ua mafai ai ona foia se tasi o faafitauli e ono tutupu mai ai faalavelave i luga o le alatele. O le afioga i le alii Senatoa ia Malepeai Setu na faaulufaleina le tulafono taufaaofi lenei.

TAUNUU I LE SENATE LE PILI TUPE A LE ALII KOVANA

O le aso Faraile na tea nei na faatoa faaulufale ai i le Senate le pili tupe a le alii kovana, lea e faasoasoa atu ai le $50,000 e fesoasoani ai i le au football a tamaitai aoga e i lalo o le 19 tausaga i le atunuu, faatasi ai ma le isi $50,000 e faamae’a ai galuega mo le fale Samoa a le malo o loo fausia i le taelega i Utulei, le Siugaula a le Atuvasa.

O le vaiaso na te’a nei na pasia ai e le maota o sui le latou pili e tutusa foi ma le pili lea ua faaulu i luma o le Senate, ma o loo i ai nei i le maota maualuga mo sa latou faaiuga.

O le pili tupe lea a le kovana o loo faamoemoe e faatupe mai i vaega o le tupe e $253,000 lea sa ia teena ina ua faia i ai e le Fono suiga i le Paketi a le malo mo le tausaga tupe lenei 2012.

Na faailoa e le alii peresetene o le Senate i Senatoa e faapea, o lea ua faaulu mai e le kovana lana pili tupe e faatupe i tupe sa ia teena, ae o lea foi o loo i ai le pili tupe na pasia e le Senate e toe faasoasoa atu ai le $253,000 na teena e le kovana mai le paketi a le malo, e fesoasoani ai i le tulaga pagatia o loo feagai ma le falemai a le LBJ.

O pili tupe ia a le Senate ua taoto atu nei i le komiti o Tulafono a le Maota, lea o loo taitaifono ai le Sui Peresetene ia Tulifua Tini Lam Yuen, talu ai e lei faatasi i le aso lea le taitaifono o le komiti a le Paketi ia Lemanu Peleti Mauga, ma le sui taitai komiti ia Alo Dr. Paul Stevenson o loo malaga i fafo.

O le taeao nei lea ua faamoemoe le komiti e faia ai le iloiloga mo le pili tupe lea a le alii kovana.

TELE PEA FA’ASEA I FA’ALETONU O AUALA

O lea ua toe tasi le vaiaso tapunia aloaia le Tauaofiaga lona 3 o le Nofoaiga lona 32 a le Fono Faitulafono, peitai o loo faaauau pea ona taunuu atu i nisi o faipule faasea mai le atunuu i tulaga faaletonu o loo i ai auala i vaega eseese o le atunuu.

Saunoa le alii faipule ia Puleitumalo D. Koko, ua toatele sui o lona itumalo ua valaau atu ia te ia ma faailoa atu o latou lagona le fiafia i le tele o omoomo ma vaega o auala e le o lelei ona fai.

Saunoa Galumalemana Bill Satele e faapea, o nisi o lona itumalo ua latou faailoa le afaina o latou taavale ona o vaega o le alatele o loo faaletonu, aemaise lava pe a leaga le tau.

O le iloiloga a le komiti o Galuega sa faatulaga e fesiligia ai lenei mataupu, ua toe tolopo ina ua le maua se avanoa e faatasi mai ai Inisinia a le Army sa faamoemoe e malaga mai ai le masina nei.

Saunoa le taitai komiti ia Simei Pulu, o le a toe faatulaga le iloiloga a le komiti pe afai ae toe malaga mai Inisinia a le Army i se taimi oi luma.