Na taua e le taitaifono o le Komiti Faafoe a le Vaega o le Litaea, i le iloiloga a le komiti o sui i le aoauli ananafi, e le lava se tupe o i ai i teugatupe a le litaea, e faatupe ai le pili tupe lea ua fa’aulu e le kovana, e nono mai ai le $8 miliona, e fesoasoani i le tulaga mafatia o lo o feagai ma le falemai o le LBJ.

Na taua e Aleki Sene Sr e faapea, e na o le $6.7 miliona le tupe o lo o mafai e le Vaega a le Litaea, ona nono atu i tua i le taimi lenei, pe afai e finagalo i ai le fono.

Na avea le molimau a Sene ma itu na manatu ai loa sui o le komiti, e sili ona fa’amuta le iloiloga, aua o lea ua manino i le uluai saunoaga a Sene, le autu tonu o le pili tupe e pei ona fuafua mai e le alii kovana ia Togiola Tulafono.

O isi sui na auai i le iloiloga, na aofia ai le susuga ia Taafua Filisouaina, le pule o le ofisa o le Litaea, o le Teutupe a le malo ia Magalei Logovii ma le Faatonusili o le Ofisa o Lafoga ia Melvin Joseph.

O le iloiloga na faatautaia e le komiti o le Litaea a le maota o sui, i lalo o le taitaiga a le taitaifono ia Puleleiite Tufele Li’amatua.

Saunoa Sene, e le o malamalama lelei le Vaega o le Litaea i le ‘a’ano moni o le pili tupe lea ua fa’aulu e le alii kovana, e le gata i lea, e le o manino le maualuga o le pasene e toe totogi mai ai le nonogatupe, ae le o iloa foi pe o le a le umi lea o le a toe totogi mai ai.

Saunoa Sene, afai o le finagalo o le alii kovana e fa’apipi’i lana pili tupe fou lea i le isi nonogatupe ua maea ona pasia e $20 miliona, o lona uiga e tatau ona toe sui atoa le tulafono lea ina ia mafai ai ona faaofi le $8 miliona i totonu o le nonogatupe e $20 miliona, ma toe fai nisi suiga i aiaiga o le tulafono e aofia ai ma le tatau lea ona maea le totogia mai o le nonogatupe lea o le a toe faaopoopo i le taimi lava lea sa faatulaga e maea ai ona totogi le $20 miliona.

Na faamaonia e Sene Sr i luma o le komiti le lagolagoina lea e le Vaega a le Litaea o le faafitauli ma le manaoga tau tupe o loo feagai ma le falemai, peitai i le vaavaai atu ai i le pili tupe a le kovana, e atagia mai ai le ono i ai o se faafitauli pe afai ae pasia.

Sa ia faailoa i le komiti e faapea, afai e finagalo i ai le fono e talia le pili a le kovana, e manaomia nisi meatotino a le malo e aumai e faamaonia ai le nonogatupe fou lea e $8 miliona, e pei foi ona faia i le nonogatupe e $20 miliona, e ui e talitonu lona mafaufau ailoga o toe totoe nisi mea totino a le malo ona o lea ua maea ona tuuina atu e faamaonia ai le nonogatupe muamua.

E lei maua se avanoa e saunoa ai le Teutupe ma le Faatonusili o le Ofisa o Lafoga, ina ua pasia loa e le komiti le mau na faatulai e le Sui Fofoga Fetalai e faaagafua ai molimau ae alo le komiti mo sana faaiuga.

Saunoa Talia Faafetai Iaulualo, e le toe manaomia e le komiti se isi molimau o lea ua manino le molimau a le Vaega a le Litaea e uiga i le pili taufaaofi a le alii kovana.

Sa ia taua foi e faapea, o alagatupe ia o loo aumai i le pili e faatupe ai le nonogatupe, o alagatupe e lei pasia e le fono.

O le pili tupe a le kovana lea ua i luma o le fono, o loo ia faamoemoe e faatupe mai i alagatupe e lua e lei pasia e le Fono.

O le isi alagatupe e aofia ai le faaee atu o lafoga tai $2,000 e totogi e pisinisi uma i totonu o le tausaga, ma le faaeeina atu lea o le lafoga i totogi e 4% e ui o lea foi ua pasia e le fono le tulafono e toe faaopoopo ai le lafoga i totogi e 2%, e totogi ai le nonogatupe e $3 miliona lea ua tuuina atu mo le falemai.