Ads by Google Ads by Google

Fa’ateia Senate i le ripoti i le falepuipui i Tafuna

O le ripoti lea na faasalalau e vaega faasalalau i leitio ma nusipepa, faavae mai lea i le molimau a le alii pule o le Ofisa Faanofovaavaaia i luma o le Faamasinoga Maualuga, i le tulaga o loo i ai le toese i Tafuna i le taimi nei, na faateia ai nisi o Senatoa ma lagalaga ai o latou finagalo e uiga i lenei mataupu.

Saunoa Senatoa Fonoti Aufata, afai o le tulaga lea o loo i ai le toese i Tafuna i le taimi nei, o le gaosi lava lea e pagota o a latou pia i totonu, faaaoga fualaau faasaina atoa ai ma le leai o se avanoa e ono mautinoa ai le a’oa’oina e se tasi e loka ai o se lesona taua, o lona uiga ua tatau i le Fono ona silasila toto’a i lenei mataupu.

Saunoa Fonoti, talu ai o lea ua toe tasi le vaiaso maea galuega a le Fono, e le tatau ai ona avea lea tulaga ma itu e taofia ai le faaauauina pea lea o se suesuega e uiga i lenei mataupu.

Sa ia talosagaina le afioga i le alii Senatoa ia Mauga Tasi Asuega ina ia silasila toto’a i le faafitauli lea, ma faatulaga se iloiloga sei toe fesiligia ai ripoti na afua mai i le fale faamasinoga.

O le afioga i le Maoputasi ia Mauga,o ia lea o loo taitaifono i le komiti o le Puipuiga o le Saogalemu Lautele ma le Lotoifale a le Senate.

O le molimau a le afioga ia Tauiliili Silivelio Iosefo na tuuina atu lea i luma o le faamasinoga i le vaiaso na tea nei, i le taimi na faia ai iloiloga a ni alii pagota se toalua o loo tuli ni a laua faasalaga i le taimi nei.

O i laua ia e aofia ai Junior Tupolo Hodges, lea o loo tuli sona faasalaga e 40 masina ina ua tausala o ia i lona umia faasolitulafono o aisa ma le faamoemoe e tulei ma faatau atu i isi tagata, ma Leanava Sevaaetasi lea o loo ia tuliina le 28 masina ona o le moliaga o le talepe fale ma le faaleaga meatotino.

Saunoa Tauiliili e faapea, e le gata o loo faaaoga e pagota fualaau faasaina i le toese, ae o loo latou gaosiina foi le pia i totonu o le falepuipui, ma o se itu na maofa ai ina ua faia ni suega i nisi o pagota  ma faamaonia ai o loo latou faaaogaina fualaau faasaina o le mariuana ma le pauta oona o le aisa.

Ae mo alii pagota ia e toalua o Hodges ma Sevaaetasi, sa maua i o la tino le fualaau e taua o le ‘oxydone’, lea foi e aofia i le lisi o fualaau faasaina, peitai sa faataga i ai e se fomai mai le LBJ la te faaaogaina ona o vaega o la tua sa faalogoina le tiga.

Na faailoa e Tauiliili i le faamasinoga e faapea, ao ia tapenaina le ripoti mo se tasi o alii pagota lea ua faamoemoe e faia sana iloiloga i le masina nei, sa faailoa atu e nisi ia te ia o le alii pagota lea o loo taofia i lalo o se puipuiga faapitoa i le toese mo le 20 aso, ina ua maua o ia ma nisi o pagota o loo inu a latou pia e taua o le ‘homemade brew’.

I lana molimau na taua ai e Tauiliili e faapea, sa leai sona manatu e mafai ona gaosi le pia lea i totonu o soo se falepuipui.

Talu ai o le faafitauli e pei ona taua, na talosagaina ai loa e Tauiliili le faamasinoga ina ia tatala Hodges ma Sevaaetasi i lalo o lana vaavaaiga, mo le mataituina lea o lo la usitaia ai o tuutuuga a le faamasinoga e ao ona la usitai i ai, ona e laititi lava le avanoa e ono mafai ai ona maua se fesoasoani mo i laua ao i ai i le toese.

Ua taoto atu nei i se faaiuga a le faamasinoga le talosaga a Tauiliili mo sa latou faaiuga, ae ua toe taofia nei Hodges ma Sevaaetasi i le toese i Tafuna.