Ads by Google Ads by Google

MALOLO LE ‘AU #2 A PAGO PAGO...

E i ai le mea malie lea ua maitauina i le Liki Kirikiti o le Sisiga Fu’a 2012, lea o lo o fa’agaasolo nei i le paka i Faga’alu, o faiga a tama ia e ta lelei i isi 'au, pei o tama o Roma o le 'au a le Mea'ese, Fala a tama o le Lega, o JR Sitau, Loia ia ma Patele Asalemo a le Mosi'ula.

O Kuresa ma Filipo o le Sinapati, Ava ma Marcus a le Pisisami, ma tama o Uale, Palemia, JR, Logi, ia ma isi tama na, aemise ai lava le 68 'ai a Roma, 60 'ai a Fala, 48 'ai a JR Sitau.

O 'ai ia na maua mai i nai 'au laiti a isi alalafaga, i te'a lava lea e ta’ei loa, so'ona fai loa lea.

Leai se mea e igoa o le tama fou po o le tama tuai, o le kirikiti lava o le kirikiti, e tutusa uma tagata, ae toe pau le mea lena e maua ai, o le le iloa fai togafiti e pe ai le tagata la ta mai.

O mea la e 'ese'ese ai tama matutua ma tama laiti, e o'o ina taui te'a a le 'au laiti, ia ua leiloa se mea e fai, a'e o tama matutua e taia loa ona alu 'ese ae tu'u mai le isi fa'ate'a.

O ta'aloga uma ua uma tu, o le faiga lena o le mea, na ona taia lava le te'a, ona sui mai loa lea o le isi fa'ate'a, ae le pei o le mea lea e fai e 'au laiti, e fai lava ina fa'alogo atu le fa'ate'a ua sau le musu.

Ua mae’a ta'aloga a le Pago 'Eagle' #2, ina ua atoa le fa o a latou faiaina, ia ua latalata atu i ai le Lupelele #2 ina ua tolu (3) a latou faiaina, e fa'apena fo'i le 'Lega' #2 mai Poloa.

E fa'apena fo'i  le Pisisami #2 a Vaitogi, ua latalata ina mae’a a latou fo’i ta’aloga, vagana ai le Tama o le Mua'au, lea e lelei lava a latou ta'aloga.

LEGA #1 (3-1) vs EAGLES #2 (0-4)

Ua malolo nei le ‘au #2 a le Aeto mai i Pago, ina ua faiaina i le latou ta’aloga ma tama o le Lega #1, mai i Poloa.

Ae o le ta'aloga lea semanu lava e toe maua e Fala ia 'ai a Roma lea e ta'alo mai i le Mea'ese.

E atoa ane le 100 o 'ai a le Lega, ua atoa lelei lava le 60 'ai a Fala, ana alu atu i totonu i le sui-tamua, semanu lava e afaina le 68 a Roma i le 'ai silia o lenei tausaga.

Le mea lava lea e fai atu ai i kapeteni o 'au laiti nei, o le tu'ufau o fa'ate'a, e fai atu lava ua le iloa e le fa'ate'a po'o lea le isi te'a o le a fai, ae o le la e fai lava.

Na ta ta le 'au a le Eagles na'o le 54 'ai na maua, ana maua e 'au laiti nei le mea na fai e tama matutua, atonu lava e fai ni finauga ma 'au matutua.

FETULELE (2-2) 96 'ai, 19 pe. vs MEA'ESE (2-2) 66 'ai, 19 pe.

O le fetauiga lava lea na su'e po o ai le tolu a le Fetulele ae tumau le Mea'ese i le tasi. Ae o le lelei o le talitua’a a le Fetulele na fiu ai le Mea'ese i le amataga o le tataaga o le latou 'au.

E o'o mai i le afa o le 'au a le Mea'ese ua sa'o lima a fa'ate'a, lena na vave o ai i lalo le 'au ta-ta.

Sa ta ta muamua le Fetulele ma maua ai 'ai e 96, ona tuli loa lea e le Mea'ese, ma sa manatu lava le 'au matamata ai e le uma le 'au a le Mea'ese.

Sa manaia lava le tuliga na fai, se'i o'o mai i le ono o pe, ae ua 30 'ai, o i'ina la na sui ai le fa'asologa o te'a, e fesuisuia'i lava ana fa'ate'a i taimi uma.

Na o'o loa ina ua maua le 'au fa'ate'a a le Fetulele, o Fa'afetai ma le ulupo'o Tanielu, o i'ina la na vave ai loa pe a le Mea'ese ma uma loa le ta'aloga matagofie.

O Filemu 19 'ai, Gafa 18 'ai ma Fa'afetai e 11 ona 'ai ma isi tama e i lalo ifo o le sefulu 'ai mo le Fetulele.

O le Mapuni na 19 ona 'ai, ma Situlia e 13 'ai ma Fono e 11 'ai ma le 'au a le Mea'ese.

TAMA O LE MUA'AU (2-0) 54 'ai, 3 pe. vs LEGA #2 (3-0) 53 'ai, 19 pe.

E pei lava na a'o le te'a a Logi ma Uale i le 'au o le Lega, e fai o le sa'o o te'a a Logi ae o le fa’ata’avili mai a Uale, ia na o le maua ai lava e se'e o le 'au ta ta a le Lega #2.

Ma o'o loa i le taimi na tuli 'ai ai le 'au o le Mua'au #1, o le tama o Palemia lea ma ta umaina ia 'ai a le Lega #2 ma le tama o Ulala, ma fai lava ona o le loto o le komiti o le Fu'a 2012.

Ia e fa'amalulu atu ai i le Lega #2, pe'a fai ua mao atu so'o mea lava a le 'au a Mua'au ia te outou i le aso Toana'i, e lelei fo'i e vave ai ona sui mai i le Tausaga fou pe a aulia.

Toe taumafai mai mo le tausaga lea, atonu e o'o atu i ai ua i ai se suiga, fa'amalolosi ma toaga e ta le polo.

MANU'ULA (2-1) 57 'ai, 4 pe. vs LUPELELE (0-3) 56 'ai, 19 pe.

O le ta'aloga lenei na fa'atope e le komiti le uiga, e o mai i luma o le fale o le komiti le 'au a le Manu'ula ua uma o vili le tupe e le komiti.

O le iuga na fai mai ai le kapeteni o le Lupelele, e uma loa ona ta ta e vaai atu le Manu'ula ua savali i le pasi.

Ae faigata ona o Peresetene o le Maota Maualuga, le Afioaga i le Tamaita'i, Gaoteote Palaie, lena na toe fa'amanaia ai le ta'aloga.

O le 'au lenei a le Manu'ula, o le faiga lava lea o le 'au lenei, e foliga mai e le manaia lava o latou 'au i le amataga, ae 'emo ane le ata, ua ofi atu i le to'afa maululuga i le taimi o le su'ega siamupini.

E manaia le matamata ma se fagu Vailima ua uma ona ligi i totonu o se fagu pau, ae leai lena e sili ai lou onosa'i se'i e taunu'u i le fale.

Ona e pule lava lea o oe ia i le ituaiga e taumafa ai lou Vailima, ina i se ipu malamala pe inu fo'i i le fagu.

O lo'o fa'atauina e le Oloa o Leala, GHC Reid i Tafuna, o le e sapasapaia tala o kirikiti o le Fu'a 2012.