Ads by Google Ads by Google

7 Maligi Maliliu - Feto’ai Helikopa

O ituaiga o Helikopa o le Cobra ma le Huey lea e fa’aaogaina e Maligi  i atunu’u uma o le lalolagi, ua fetaui le lua ma ua maliliu ai le to’afitu o ali’i malini sa i ai i luga. O lea fa’alavelave sa tupu lea i Arizona, e tusa ai ma le fa’amatalaga aloa’ia mai a le ofisa 'autu o le Maligi i lea setete.

Ua fa’ailoa mai, o le esikegi lea sa tupu i luga o le ea i luga a’e o le a’ai o Yuma a’o faia se fa’ata’ita’iga  a le US Marines. Na tupu fo’i lea fa’aletonu i le po o le aso Lulu na te’a nei, ma o lo ’o fa’atautaia se su’esu’ega i lea fa’alavelave ua maumau ai le soifua o nei fitafita a le Maligi a le Malo tele.

O maligi uma lava e feoa’i i le ituaiga lea o le Cobra ma le Huey, o se vaega lea o Maligi ua aofia i le 3rd Marine Corps ma e fa’amautu i latou i Miramar i Kalefonia i Saute.

“Na fetaui va’a helikopa nei e lua i le fa’ata’usi’usi’uga lava o le Yuma Training Range Complex” O se tala lea na tu’uina mai e le Marine Corps.

O le a taofia pea suafa o i latou uma ua maliliu se’ia mae’a ona fa’atautaia gaoioiga e tatau ona fa’atino e le Maligi Koa i le taimi nei, ua fa’amanu’alia ai ni isi a’o fa’atautaia koleniga, pe o le fa’atino fo’i o latou tiute masani i le vaega 'au.

Ua fa’ailoa mai e se tasi 'iloga o le nofoaga fa’apitoa lea i Miramar, “E ala ona faia fa’ata’ita’iga uma nei i lea nofoaga, ona e talitutusa lelei le ituaiga o nofoaga i lea itu o Kalefonia ma le va’aiga i Afakanisitana.” O le ituaiga su'esu'ega lea, e tautau e faitau masina o faia lava, ona fa’ato’a fa’alauiloa fa’apitoa mai lea o sona atoaga.

Lauina I’uga o Pres. Hosni Mubarak Iuni 2 - Aikupito

O le afioga le Fa’amasino sa ia fa’afofogaina iloiloga uma o le fa’amasinoga o le sa 'avea ma Peresetene o Aikupito  Hosni Mubarak, ua ia fa’ailoa mai o le a ia taua’aoina aloa’ia mai le fa’ai’uga o lea ali’i ta’uta’ua ia Iuni 2, 2012.

I le toe aso lava o le ono masina sa fa’atautaia mai ai lenei fa’amasinoga, na fa’ato’a te’ena ai lava e le ali’i peresetene Mubarak sona avanoa e saunoa aloa’ia ai mo le fa’afofoga’aga a le fa’amasinoga. O le ali’i sa 'avea ma Minisita o le Initeria o lea Malo, o lo ’o i ai fo’i lona fa’amasinoga o lo ’o fa’aauau pea, sa ia tu’ua’ia mai ni isi mai fafo ua mafua ai ona fasiotia ni tagata sa faia latou solo tete’e ia Fepuari 2011.

O ia lea fa’atasi ai ma le ali’i peresetene o Mubarak, ua la’ua te’ena uma nei moliga e fa’asaga ia i la’ua i le fa’amasinoga, e fa’apea ai o i la’ua nei sa fa’atonuina ina ia fasiotia tagata sa faia le solo tete’e. O le solo tete’e lava lea na mafua ai ona fa’atula’i 'esea fa’amalosi Mubarak mai le 'avea ma Peresetene o lona malo, ae ua aga’i atu ina silia ma le 30 tausaga o 'avea pea o ia ma Peresetene o Aikupito.

Ua fa’ailoa mai fo’i e tusa ma le itula ma le ‘afa sa faia ai se fa’apupulaga au'ili'ili a le ali’i Minisita o le Initeria Habib al-Adly i le fa’amasinoga i lona toe aso o lona iloiloga, o le aso Lulu lea na te’a nei. Ina ua fa’ailoa atu ia Mubarak lona avanoa mo sana saunoaga i le fa’amasinoga, ae sa ia fa’ailoa ane i le fa’amasinoga, “E leai sana tala e fia faia!”

I fafo atu o le fale fa’amasino, sa mumu mai tagata ma vala’au mai, e tatau ona fa’ao’o le oti i le ali’i sa 'avea ma latou peresetene mo le silia ma le 30 tausaga, peita’i, sa vave le vaovao mai o nei tagata e le vasega o leoleo.

O le moliga o le ali’i sa 'avea ma peresetene Mubarak, ua 'iloga ai le to’atele na’ua o i latou sa fasiotia i au'upega malosi, masalo o ni isi sa fa’ataunu’uina nei fa’atonuga o ni isi o fitafita mai fafo, peita’i, o le sa ia fa’atonuina lea faiga ina ia fa’ataunu’u, e ao lava ina pa’u atoa i ai lea toto masa’a.

Ua na’o le 3 masina e va’ai toto’a ai le vasega o fa’amasino i fa’amaumauga ua mae’a tusia ma fa’amauina i ni tusi mafiafia, a mae’a loa ona latou iloiloina atoa nei fa’amaumauga ma tu’ua’iga, ona latou faia loa lea o le fa’ai’ugatonu mo le ali’i sa 'avea ma peresetene o Aikupito ma ni isi o lana autaupulega ia Iuni 2, 2012.

O le to’alua lea sa 'avea ma ta’ita’i o le Malo o Aikupito, fa’atasi ai ma le to’aono o ni ali’i leoleo, ua fa’ailoa mai, e tauau e fa’ao’o ia i latou le fa’asalaga o le Oti, pe a o’o mai lea aso lautogia mo le lauina o lo latou i'uga.

O lo ’o i ai atali’i e to’alua o Mubarak, o le tasi e tauau e soloa’i i lona tama, le ali’i lea o Camal ma le ali’i la’itiiti o Alaa ma o lo ’o i ai fo’i moliga e fa’asaga ia i la’ua nei ma na fa’ae’e fa’atasi lava nei moliga i le taimi o vesiga lea e molia ai fo’i lo la’ua tama.

O lo ’o i ai fo’i ma se faipisinisi lauiloa o lo ’o molia fo’i i lenei lava fasiotiga tagata, o le ali’i lea o Hussein Salem. O i latou uma nei, o lo ’o latou te’ena nei moliga uma lava e fa’asaga ia i latou i le fa’amasinoga maualuga. Ona o tulaga o le soifua maloloina o Mubarak, o lea sa taofia ai lava o ia mo togafitiga i le falema’i a le Militeri talu mai lava le amataga o lenei fa’amasinoga i le tausaga ua mavae.

O se tala mai loia na tutula’i mo le vasega o i latou na fasiotia, sa latou fa’ailoa mai, e le afaina lea tulaga, ua mae’a saunia le tulimanu o le Falepuipui i Tura, Kairo mo le fa’aafio atu o le sa 'avea ma peresetene o lo latou malo mo le 30 tausaga.

 saunia: Leua Aiono Frost