Ua fa’ailoa e le Senate lo latou te’ena o se taumafaiga a le maota o sui ina ia sui tausaga e fa’aipoipo ai se tama’ita’i e ala i lo latou te’ena o le pili na pasia e ali’i faipule i le vaiaso na te’a nei.

O le tulafono o lo o i ai, e mafai ona fa’aipoipo le tama’ita’i i le 14 o ona tausaga, pe afai ua tula’i mai ai se fa’afitauli ia te ia pe ua ma’itaga fo’i, ma ua malilie ona matua e nonofo ma le ali’i na ma’itaga ai, peita’i fai mai faipule, ua maulalo tele ia tausaga, ae tatau ona tu’u i le 18 tausaga ona fa’atoa mafai lea ona fa’aipoipo le tama’ita’i.

Ina ua taunu’u atu i le Senate le tulafono lea, na faia ai se fa’ai’uga a le maota maualuga ina ia fa’atumau pea le tulafono i le tulaga o lo o i ai, ina ua mae’a ona o latou fesiligia ni isi o molimau e fa’atatau i le tulafono lenei.

Saunoa le afioga i le ali’i Senatoa ia Lualamana Faoa, e le talafeagai suiga a faipule i le tulafono lenei, pe afai e tula’i mai se fa’afitauli i se teineitiiti e 14 tausaga po o le 15 fo’i.

“O lona uiga e fa’atalitali lava le teineitiiti se’i atoa lona 18 tausaga ona fa’atoa fa’aipoipo lea, a’o lea ua malilie ona matua e nonofo loa ma le tama lea ua ma’itaga ai, o se tulaga e le talafeagai lea tulaga,” o le saunoaga lea a Lualemana.

Ae na ta’ua e le Fa’atonusili o le Matagaluega o Tupulaga Talavou ma Tama’ita’i ia Leiataua Leuga Turner, afai e fa’aipoipo le tama’ita’i i le 14 o ona tausaga  ma ‘avea o ia o se tina mo se fanau, e le gata o le a le maloloina olaga o le fanau e tutupu mai ia te ia ona o le laitiiti o lona olaga, ae o se aiga fo’i e le umi lava ae toe malepe lona aiga, leaga e le’i sauni lona mafaufau e ‘avea o ia ma tina.

I le tele ai o tausaga talu ona tautua Leiataua i matagaluega a le malo e a’afia ai tulaga o mata’upu tau i tupulaga talavou, tina ma tama’ita’i, sa ia fa’asoa ai i luma o le komiti a faipule e fa’apea, fa’atoa tapena lava ma sauni lelei le tama’ita’i e ‘avea ma tina o se fanau ma se aiga, pe afai e 21 ona tausaga le matua.

Na fautua malosi Leiataua i le komiti a le maota o sui ina ia silasila toto’a i le tulaga o lo o i ai le 14 tausaga, o se matua talafeagai lea e fa’aipoipo ai se tama’ita’i.

O ni isi o fautuaga sa tu’uina atu i luma o le komiti a le maota o sui, e aofia i le tatau lea ona fa’ataua suiga i tausaga e fa’aipoipo ai se tama’ita’i.

Na ta’ua fo’i e le susuga Rev.Dr. Sekuini Seva’aetasi lea fo’i sa molimau i luma o le komiti e uiga i lenei tulafono, e taua tele le ‘avea o se tama’ita’i ma tagata matua fa’atoa mafai lea ona ‘avea o ia ma tina o se fanau.

Fai mai le molimau a le ali’i faife’au, e fa’ataua fo’i i le galuega fa’akerisiano le tatau lea ona tapena le tama ma le teine e ‘avea ma tama ma tina mo se fanau i le taimi tatau ma talafeagai.

Ae ina ua fesiligia e le Samoa News ni isi o matua e uiga i lenei tulafono, na ta’ua ai e se tasi ua 56 tausaga o lona soifua mai Nu’uuli e fa’apea, e le mafai ona saisaitia i lalo o le tulafono tulaga o fa’aipoipoga, ae maise lava pe afai ua tula’i mai se fa’afitauli i se tama’ita’i ma ua malilie fo’i matua o le tama’ita’i e fa’aipoipo loa le la tama ma le ali’i na ma’ito ai o ia.

Ae na saunoa le ali’i faipule ia Toeaina Faufano Autele e fa’apea, o le malilie o matua e fa’anonofo le la tama teine ua ma’itaga i le ali’i na ma’itaga ai, tusa lea ua toe fa’aopoopo atu le isi sese i luga o le isi sese, ona atili sese ai lava lea o le mea ua fai.