Ads by Google Ads by Google

To’atama’i le Fofoga Fetalai i le le auai o molimau

“AUA NE’I TOE AUMAIA NI AU FOLAFOLAGA FAAPENA I LUMA O LE MAOTA”

Na fa’aalia le le fiafia o le Fofoga Fetalai, o le Maota o Sui, le tofa Savali Talavou Ale, ina ua tula’i le ali’i faipule mai i Swains, le susuga Alexander Eli Jennings, ma fa’alauiloa i luma o Faipule, se tali mai i se tasi o molimau na o’o atu i ai se fanoga a le maota, ina ia auai i se iloiloga sa fia fa’ataunu’uina.

Na ta’ua e Jennings, o le mafua’aga ua le taunu’u ai sana iloiloga sa fuafua ma le sui o le U.S. Coast Guard ma le Pulega o Uafu ma Taulaga, ona e vala’au atu ia Lt. Steven Caskey mai i le Coast Guard, ae tali mai le ali’i lutena, e le mafai ona auai mai i le iloiloga se’i vagana ua fa’ataga mai o ia e le loia.

E le’i ma’oti i le folasaga a Aleander, po o ai le loia lea na saunoa ai Lt. Caskey.

“Sa ou faafesootai le alii loia peitai sa fai mai ia te au, e ta’u muamua atu mataupu o le a talanoaina i le iloiloga ona faatoa tuuina mai lea o lana faaiuga pe mafai ona sau Lt. Caskey i le iloiloga pe leai,”  o le saunoaga lea a Jennings, o ia foi lea o le taitaifono o le komiti o Femalagaaiga a le maota o sui.

E le’i mae’a lelei le saunoaga a Jennings, ae fa’asalavei le Fofoga Fetalai ma lona si’ufofoga ua si’isi’i i luga, “Aua nei toe aumaia ni au folafolaga faapena i luma o le maota, ou te le toe fia faalogo i ni au folafolaga e faapena lau afioga, afai ua ave lau poloai i molimau e o mai i le iloiloga, e leai se mea e tau toe tusi mai ai e faailoa atu mataupu o le iloiloga, pau lava le mea e fai, ia ave i ai le poloai ma fai i ai e o mai i le iloiloga”.

O le iloiloga lea na fuafuaina, o le talanoaina lea o le tulaga i femalagaaiga i le va o Manu’a ma Tutuila.

E fa’afa (4) ona ta’ua e Savali le fa’a’upuga lea, “aua nei toe aumaia ni au folafolaga faapea i luma o le maota”.

“Soo se taimi e tuuina atu ai faatonuga a outou afioga o taitai komiti, i molimau, e tatau ona latou faautagia mai, ae le o le taumafai e toe fesiligia le malosi o lo o ia outou afioga i taitai komiti ma sui o komiti taitasi,” o le saunoaga lea a Savali.

Sa ia saunoa foi e fa’atatau i le taua tele o le mataupu sa fuafua i ai le iloiloga mo femalagaaiga i Manu’a, peitai o lea ua fa’aletonu ma le taunu’u ona o le le auai o molimau.

“A toe valaaulia ni molimau, pau lava le faamatalaga e fai i ai ia oo mai i le taimi o le iloiloga, ae aua nei toe fesiligia mai auala e faatino ai galuega a le maota,” o  le saunoaga faaiu lea a Savali, ae o le taimi foi lea ua toe alala i lalo le alii faipule ia Alexander e ui e lei maea lana saunoaga.

O le itula e 11:00 i le taeao o le Aso Tofi o le vaiaso fou, lea ua fa’amoemoe e fa’ataunuuina ai le iloiloga lenei, peitai o le a le aofia ai Lt. Caskey, sei vagana ai le Faatonusili o Uafu ma Taulaga ia Matagi Ray McMoore ma le sui o le kamupani va’alele a le Inter Island ia Aleki Sene Jr.

O lea iloiloga o le a fesiligia ai mataupu e pei ona fesiligia e faipule mai Manu’a, i le mafuaaga e ala ai ona le toe lele le vaalele o le Segaula i Ofu Manu’a e fesoasoani i manaoga o tagata i tulaga o femalagaaiga.

Saunoa le afioga i le alii faipule ia Toeaina Faufano Autele, o le faafitauli o lo o tulai mai i Manu’a, e na o le isi vaega o le itumalo o loo maua le tautua a le kamupani vaalele o le Inter Island ae le o maua i Ofu ma Olosega, e ui o lo o i ai se manaoga tele i lea itu o le itumalo.