Ads by Google Ads by Google

Pasia Senate I’ugafono fa’avae ai le SSIC

Ua pasia e le Maota Maualuga i le taeao ananafi sa latou iugafono e faavae ai se Komiti Suesue a le Senate (SSIC), e gafa ma le iloiloina o mataupu tau tupe ma gaioiga a le malo, lea e le o manino lelei i ai le Fono Faitulafono.

O nisi o mataupu o lo o ta’ua i lenei i’ugafono o le a aofia i le su’esu’ega a le SSIC e aofia gaioiga a le malo ma galuega o lo o faia i totonu o Matagaluega, Ofisa, Komiti ma Komisi e aofia ai ma le tupe o le litaea a tagata faigaluega a le malo ma le faletupe o Atina’e a Amerika Samoa, mo ni pulega e le tusa ai ma le tulafono.

O le fa’ai’uga e fa’avae loa le SSIC na pasia i se talanoaga a le Senate i le vaiaso i ona tua atu, ina ua fa’atulai e le alii peresetene ia Gaoteote Palaie Tofau le manatu, ua tatau loa ona tuuina mai le iugafono e faatulai ai le SSIC lea na faaulu i le tausaga e 2009, peitai sa fai i ai se fautuaga e taoto sei i ai se taimi.

Na fa’amanino e Gaoteote i luma o Senatoa e faapea, e le o manatu e faavae le SSIC ina ia suesue ai se tagata ma tusitusilima po o ai ua sese sana gaioiga, ae o le agaga maualuga, ia mafai ona faamanino ai nisi o mataupu tau tupe e le o malamalama lelei i ai le Fono.

Na lagolagoina uma e afioga i Senatoa le manatu ina ia tuuina mai loa i totonu le iugafono e faapasia ma faavae ina ai loa le SSIC.

I se vaega o le iugafono o loo taua ai e faapea, o le tulaga vaivai i le puleaina o tupe, o loo fai pea lea ma pogai malosi e faavaivaia ai le faatinoga lelei e mafai e le malo o Amerika Samoa e tautua ai ona tagata.

O se faataitaiga e aofia ai tupe e soona faaalu, femoumoua’i o mea tau tupe i le falema’i, atoa ai ma le siisii pea lea i luga o le tau o le ulia  ma le suavai, o tulaga faaletonu i fale ma le siosiomaga, faatupulaia o solitulafono i totonu o le malo, faapea ai ma le taofia o le galueaina  lea o le tamaoaiga ma pisinisi.

O le le tausisi i tulafono talafeagai faapea ai ma le le faaaogaina o faiga tau pulega ina ia mautinoa ai le tausisia o tulafono, ua saga faaopoopo ma unaia ai le galue le faamaoni ma ua avea ma itu ua afaina ai ma alagatupe feterale ma le lotoifale, ma sosolo atu ai lava i solitulafono ma faiga faapiopio.

Ina ia mafai ona faailoa tino tulaga faapenei ma le soona faama’imauina o meatotino atoa ai ma le le tausisi i tulafono, ua a’e ai se tofa i le Maota Maualuga ina ia tagai i gaioiga al e malo, o ana  pulega o galuega, ma mulimulitai i tulaga faapaketi faapea ai tulaga tau tupe uma i le malo, ma le faamoemoe ia mafai ai ona faaleleia auala e faatinoina ai galuega tau tupe, ma toe faafoi le faatuatuaina e tagata o mataupu e faatatau i le malo.

E to’afitu sui o le SSIC e tofia mai e le alii peresetene o le Senate, e aofia ai ma le taitai komiti ma lona sui taitai.

O galuega o le a faatinoina e le komiti suesue a foaia ai le faia o tusi samania o faamaumauga a le malo, faila, faamaumauga, tusutisiga ma isi lava faamaumauga e manaomia mo galuega a le komiti pe a talafeagai ai.

O le umi e nofoia ai le komisi suesue e mo le taimi o le nofoaiga lona 32 a le Fono Faitulafono, sei vagana ua vave faamuta poo le faaopoopoina foi lea o nisi aso pe afai e manaomia.

O suesuega foi a le komiti o le a faaauau pea lava i taimi o tauaofiaga masani a le fono, poo nisi foi taimi e aofia ai ma tauaofiaga faapitoa.

O lenei iugafono o loo saini uma ai afioga i alii ma tamaitai Senatoa.