Ads by Google Ads by Google

Tauva Afoa-Le’i mo le tofi kovana ma le lutena kovana

O le ofoina atu o le agava’a, tomai ma le ola e tautua ai le atunu’u ina ia mafai ona si’itia le tulaga manuia o tagata uma o Amerika Samoa, o se tasi lea o mafua’aga ua a’e ai se tofa i le afioga i le Aloalii ia Afoa Moega-Lutu, ma le tofa i le to’oto’o ia Le’i Sonny Thompson, e fa’alauiloa lo la fa’amoemoe mo le tausinioga i le tofi kovana ma le lutena kovana, i le palota tele ia Novema 2012.

O taeao ananafi na fa’alauiloa aloa’ia ai e Afoa ma Le’i lo la fa’amoemoe ma i se fa’atalatalanoaga ma le Samoa News na fa’ailoa ai e Afoa e fa’apea, o se tasi o fesili tele o le a fesiligia ai o ia  e le atunu’u, e o’o lava foi i lona aiga ma lana fanau, pe aisea lava ua saga mana’o ai e tauva mo le tofi, ae o lea ua mae’a atu isi tausinioga e lei filifilia o ia e le atunuu.

“O la’u tali i ai, e mafua ona ou  naunau pea ou te tauva i le tofi kovana, ona ou te talitonu e mafai ona ou faia se suiga mo le malo, ou te mafai ona ou fesoasoani e tuuina atu le atunuu i se isi tulaga e sili atu nai lo le tulaga o loo i ai nei, ma ou te talitonu foi o loo i ai le meaalofa a le Atua i totonu ia te a’u, e fai ai a’u ma la’u paga o Le’i ma auauna mo le atunu’u,” o le saunoaga manino lea a Afoa.

O le 5 ai lenei o tausigioga mo le tofi kovana ma le lutena kovana o tauva ai le afioga Afoa, lea e aofia ai tausaga e lua sa la toalua ai ma Lealaifuaneva P. Reid, a’o ia tausinio mo le tofi lutena kovana, ma tausaga e tolu na tauva ai mo le tofi kovana, lea e aofia ai le uluai taimi ma le tofa ia Taeaoafua Meki Solomona, o le taimi lona lua ma le tofa ia Velega Savali Jr, atoa ai ma le faamoemoe e pei ona la faalauiloa ma le tofa Le’i.

Na taua e Afoa ma Le’i, o la fa’anaunauga pe afai e fa’apaleina i laua i le tofi, o le a la filifilia tagata pito sili ona i ai le agavaa ma le tomai latou te vaavaalua i le taitaiina o le malo.

“Afai ma te tulai mai i le tofi, o le a ma filifilia tagata lelei i le galuega, e le faailoaina poo ai oe ae fea le vaega ete i ai, afai lava o loo i ai le agavaa ia te oe, o lona uiga o oe e fetaui mo le tofi,” o le saunoaga lea a Afoa.

“O le faanaunauga lava foi lea o loo ia te i maua, ia mafai ona fesoasoani i le lumanai o alo ma fanau o le atunuu, aua o i latou o loo i ai le lumanai o le malo,” o le saunoaga lea a Le’i.

Na taua e Afoa ma Le’i, ua mafua ona filifili e le isi le tasi la te paga mo le faamoemoe, ona ua lava le masani ma le iloa o le isi i le tasi, e tutusa foi o la faanaunauga mo le faaleleia o le atunuu aemaise ai o le avea ma taitai.

Saunoa Afoa, e mafua ona manuia le taitaiga o le malo pe afai e galulue faatasi tagata uma. Sa ia aumaia se ata faataitai o lona talitonuga lea i vaega o le tino o le tagata (tulou), pe afai e le galulue faatasi vaega uma o le tino, e le mafai ona gaioi le tino, e faapena foi le malo, e le mafai ona manuia pe afai e le galulue faatasi vaega uma.

Na o la taua e faapea, e le o i ai se faanaunauga e fia tauva i le tofi ona o se sailiga  manuia mo la aiga, aua ua mautu ma lelei o la aiga, ae pau le lagona e fia ofo atu le tautua mo le atunuu ina ia mafai ai foi ona manuia aiga uma.

O nisi o mataupu o loo aofia i totonu o le manulauti a Afoa ma Le’i, lea foi ua faamoemoe o le a faalauiloa aloaia i se taimi o i luma, e aofia ai gaioiga mo le faaleleia o le Falemai, tulaga o Aoaoga, Galuega, Faaleleia o le Tamaoaiga, faapea ai ma le atina’eina o le soifuaga mo aso faisoo.

O le afioga i le Aloalii ia Afoa o ia o se loia mo le tele o tausaga o lana auaunaga i le atunuu, ma ua toatele foi i latou ua silafia lenei tamalii i lana tautua.

O le tofa i le tootoo ia Lei e mai le Ofu, Manu’a, le nuu na amata mai ai lona soifuaga aoaoina, ma faaauau atu ai i le aoga maualuga a Samoana ma faauu ai i le 1971. Na malaga atu Lei ma a’o tauina o ia i Amerika i se tasi o Iunivesite i le setete o Illinois ma maua ai lana faailoga o le B.A Science in Education. Sa faaauau lona soifuaga aoaoina i se tasi o Iunivesite i Kalefonia ma maua ai le faailoga o le Master Degree in Human Resources and Management Development.

E 21 tausaga sa tautua ai Le’i i le Air Force a le malo tele, ma malolo litaea mai ai loa i le tausaga e 1993, ao ia umia le tulaga o le Major. (Air Force - Maj).

Ina ua taliu mai o ia i le atunuu, sa avea o ia ma pule i le vaega o le Saogalemu ma le  Soifua Maloloina mo tagata faigaluega a le Kamupani o le StarKist Samoa mo tausaga e 12, a’o lei filifilia o ia e avea ma Faatonusili o le Matagaluega o le ‘Administrative Services’ mo tausaga e 8 seia oo mai i le taimi nei.

O loo tautua foi o ia o se Tiakono mo lana ekalesia EFKAS i Ofu, o ia o le Taitai o le Komiti o le Atina’e, o ia foi o se tasi o tootoo mai Ofu.