Ads by Google Ads by Google

Saini kovana tulafono faasa ai moli faaopoopo i taavale

E le o toe umi se taimi ae faamalosia loa e le Matagaluega o le Puipuiga o le Saogalemu Lautele le tulafono lea ua sainia e le alii kovana, e faasa ai ona toe faaopoopo nisi moli lanu eseese i luma ma tua o soo se taavale e fealua’i i luga o le alatele.

O lenei tulafono na pasia e le Fono Faitulafono i le lua vaiaso talu ai, ma tuuina atu ai loa i le afioga i le matua ia Togiola Tulafono mo sana faaiuga.

I luga o le polokalame a le alii kovana i le faaiuga o le vaiaso na tea nei, na faalauiloa mai ai e kovana Togiola lona sainia o lenei tulafono ma le faanaunauga, o le a mafai ai ona taofia nisi o faafitauli o loo tulai mai i luga o le alatele, lea foi ua tele i ai faasea mai nisi o le atunuu, ona o moli lanu eseese mai nisi o taavale ua fai ma faalavelave i le taimi o le po i luga o le auala.

I se faaopoopoga o le tulafono e faatatau i moli o soo se taavale afi e fealua’i luga o le alatele lea ua pasia ma avea ma tulafono, o loo taua ai le le mafai lea ona toe faia nisi lava suiga e faaaoga ai nisi moli e toe faapipii i moli o le taavale na aumai ai.

E le gata e faasaina ona toe faia nisi faaopoopoga o moli i luma ae faapea ai foi ma moli i tua, e le faatagaina foi le faaaogaina o nisi mea e faatele ai le malolosi o moli o le taavale.

E na o le pau lava lanu e faataga i moli o taavale, o le lanu pa’epa’e pe lanu samasama foi, sei vagana ai taavale e pei o taavale leoleo, taavale mo faalavelave faafuasei, atoa ai ma taavale o loo faaaupegaina mo le faamoemoe e lapataia ai taimi o faalavelave.

Saunoa le alii kovana e faapea, e le o toe umi se taimi ae amata faamalosia loa e le Matagaluega o le Puipuiga o le Saogalemu Lautele lenei tulafono, ma maua ai loa foi ma le avanoa e taofia ai le toe faaaogaina e nisi o le atunuu o ituaiga moli ia e fai ma faalavelave i taimi o le po.

O se tina matua na telefoni atu i le polokalame a le alii kovana i le lua vaiaso talu ai, sa ia faaalia ai lona faasea tele ona o se tasi o po na alu ai e fai lana faatau, lea na toeitiiti ai lava oso ese lana taavale ma luga o le alatele, ona o le sesega o lana vaai i moli o se tasi o taavale sa la fetaui.

Fai mai le tina, na avea lona le iloaina o le auala ma itu na ia taofi ai lana taavale, ae se’i faapasi muamua le taavale lea, ona toe faaauau ai lea o lana malaga.

O se tasi foi o tama e tele ina faigaluega i po sa ia faailoa foi i le kovana le tulaga lava lea e tasi, i le fai lea o moli susulu malosi a nisi o taavale ma faalavelave i luga o le alatele i le po, aemaise lava pe afai e timuga le po.

Na taua e le tootoo lea i luga o le isi polokalame a le alii kovana, o se tulaga faigata tele mo le saogalemu o isi taavale

Na toe faamanino atili e le alii kovana i luga o lana polokalame i le lua vaiaso talu ai e faapea, o i latou o loo faaaogaina ituaiga moli ia ua faasa mai e le tulafono, pau lava le agaga o loo ia te i latou, o le maua lea o viiga mai lanu o moli o a latou taavale, peitai latou te le o lagonaina le tele o le mau igoa ma le mau faamatalaga o loo faia e tagata faasaga ia te i latou.

O le afioga i le alii Senatoa ia Malepeai Setu na faaulufaleina lenei tulafono i luma o le Senate.