Ads by Google Ads by Google

VEVELA TA’ALOGA KIRIKITI

E tu a’e le la i lona tutonu, ae ua mae’a uma ta’aloga faitaulia e lua o le Liki Kirikiti o le sisigafu’a lea e fa’agasolo. Muamua lava na tatala malae ai le ‘au a le Fetulele #2 mai Tula ma le ‘au malosi mai Iliili.

Na muamua tatala le ‘au mai sasa’e, peita’i, e le’i mama le puipui mai a Iliili po’o tamaiti o le Lupelele. Na maua latou ‘ai e 55 e tulia e le ‘au a Iliili #2.

Na amata ona tata mai Iliili ma sa maua ‘ai o lea ta’aloga, ae ua atoa le 9 o pe, ona maua lea o le fa’ai’uga fa’atausala o lea ta’aloga, manumalo ai Iliili #2.

O le ta’aloga na soso’o ai o le ta’aloga fita i le va o le ‘au malosi a Aeto #2 ma le ‘au Fetulele #1, ma o le ‘au lea o lo’o ta’a’alo ai tama matutua i le fa’agatama mai sasa’e. Na mua’i o’o Aeto #2 i le pate, ae talitua’a mai le ‘au a Sasa’e ma sa iloga ai le lelei na’ua o le fa’ate’a lea e masi’i mai ma le Fetulele #1.

Afai fo’i ae ta se polo, e lelei fo’i le sapo ma le talitua. Maopoopo le fa’amoemoe o lea fo’i ‘au malosi i le ta’amilosaga. E na’o le 24 ‘ai na mafai ona taina e tama o le taulaga, ma ua i’u ai ina talitua’a i latou ae le’i taina le 11:00 i le taeao lava ananafi.

O ‘ai uma nei e 24, e na’o le tomua lava na taina ae maua ae le’i maua lava fo’i se pe. Na maua lelei le taimi e fa’ato’ato’a ai le ‘aiga o le 12:00 a le Komiti, ona ua fa’afaigofie fo’i le aso i le vave o ta’aloga e lua i le taeao. Peita’i, o le ta’aloga mulimuli o le aso na fai si fita i le taga’i atu i ai, aua e tau fai lelei uma ‘au.

O le ‘au matutua i le Kirikiti mai Vaitogi le Pisisami ma le ‘au a Sinapati lea sa ta’ita’iamai e le susuga Sale Fagaima, o le au lea ua fai fo’i si a’ave atu o latou tala i le lelei fo’i. Na mua i latou i le pate ina ua mae’a manumalo le latou fa’atonu i le peti ina ia togi le tupe o le latou filigamaea.

O le ‘au a Vaitogi na talitua’a, ma e fa’ato’a maua atu se fa’ai’uga o le ta’aloga i le lomiga a taeao, ona ua tu’ua lea ae se’i maua se tala tusitusia e susuga i Komiti o lea fetauiga matagofie.

O ta’aloga faitaulia e tolu o le aso To’ona’i na te’a na mua’i tatala malae ai le ‘au malosi ma sasa’e  - Le Manu’ula mai Vatia ma le ‘au a Sinapati . Na mua’i tata Vatia ma maua latou ‘ai e 120, peita’i na soso’o ai ma le o’o o Sinapati i le pate, ae latou maua na’o ‘ai e 110, ma manumalo ai le Manu’ula mai Vatia. O le ‘au fo’i lea o lo’o i ai le latou valaaulia fa’apitoa mo le sisigafu’a lona 50 o Samoa Tuto’atasi.

Na soso’o lea ma le fetauiga i le va o Pago Eagles #1 ma le ‘ai malosi a Poloa  le Lega #1. Muamua fo’i tama o le taulaga i le pate ma maua latou ‘ai e 116 na tulia lea e tama o le Lega #1 ma na maua na’o ‘ai e 90. O lona uiga ua fa’amau le manumalo o le Pago Eagles #1 i lea fetauiga mata’ina.

O le ta’aloga faitaulia na fa’atulaga e mae’a ai iviga o lea aso, o le ta’aloga lea i le va o Iliili #1 ma Pisisami #2. Na muamua tata ai Pisisami #2 ma na maua latou ‘ai e 71, ae tata le ‘au a Iliili #1 e na’o le 50 latou ‘ai na maua ai. O lona uiga ua manumalo fo’i le Pisisami #2 i le latou ta’aloga lea.

O le aso Faraile sa fa’ailoa mai na fetaui ai le au a Pisisami #1 ma Mea’ese mai Alofau. O le ‘au lea a le Mea’ese sa matele ina tamua ai le afioga le ali’i Kovana Sili o le tatou malo, peita’i, ua le toe ta’alo lana afioga, ua matele ina tia’i a’oga, ma ua le tofia ai i lana ‘au.

O le a maua atu se fa’ai’uga o lea ta’aloga i le lomiga a taeao, ae fa’afetai lava fa’amalolosi i ‘au uma o tausinio, e matauina lava le la tele o le malae ma taimi fo’i o ta’aloga, ae o uiga lava ia o fa’agatama e saili atili ai le auro o le manumalo.

*******************

O lo o fa’aauau pea ona lagolagoina a tatou tala o le fa’agasologa o le Liki Kirikiti o le Sisiga Fu’a 2012, e le kamupani a le GHC Reid, Inc. “Oloa a Leala” ma le pia a Samoa, le Vailima.