Ads by Google Ads by Google

Alofa: Fa'avae ai Aiga— Vaega 121

Na toe alu nei le tali e a le aofia i lea taimi, a’o fa’aauau pea le lauga a Loimataoapaula,  “O le mafua’aga o le mana’o o  lo’u tina e pei ona teu pea i lo’u loto, ona sa tau su’e lisiti o tupe sa maua mai i lana fa’atoaga. O lo’u tuagane matua o Lolesio, o ia o lo’o fai ma teutupe ma failautusi a lo’u tina i le fa’atoaga. E ui lava ina fa’apea o Lolesio o lo’o teutupe ma failautusi, ae e pule lava lo’u tina i tupe ma mea uma, o le fa’atoaga.”

Ua toe alu le tali e a tagata i lea taimi ma tilotilo ane i a Lameko ma Tagiilima ua na o le punou o le lo’omatua ma ona loimata i le fa’alogologo atu i le tala a lana tama ua fai mai nei. O le toeaina, ua na o le moei’ini o ona mata ma ‘ata.

“Ina ua tau su’e lisiti o tupe o le fa’atoaga, na o matou iloa ai ma lo’u tama ma o’u tuagane le ato ta’ita’i lea a lo’u tina, ua atoa le luasefulu tausaga o fa’aaoga, o si ana ato na fa’ameaalofa mai e lona tausoga o lo’o i Niu Sila. Ua motu le ‘au e tasi, fa’apena fo’i le isi ‘au o le ato, ua toe fonofono e lo’u tina i filo, ma ua le iloga se ituaiga lanu o  filo o lo’o i ai. E tele ato ta’ita’i na fa’atau e lo’u tama, ae e o’o mai i le taimi nei, o lo’o ta’atitia pea i totonu o le potu ‘ato ta’ita’i ia, e le mana’o ai lo’u tina.

“Ae ina ua matou talie ma lo’u tama ma o’u tuagane i le ‘ato ta’ita’i lea a lo’u tina, na liliu mai i a te a’u ma fa’apea lana tala, “Ou te fa’atalitali pea, se i maua mai sa’u ato fou, pe a i’u lelei a’oga, ma maua se galuega a la’u tama o Loimataoapaula.”

Na va’aia e tagata le tu a le teine i lea taimi, ua maligi ifo ona loimata i ona alafau. “Mo na i o’u matua pele Lameko ma Tagiilima Tagimaiala, se ua tapu a’u i o’u lagona, ua leai se upu e mafai ona ou tautala atu ai e fa’ailoa ai o’u lagona i lenei taimi, ae tau ia o lenei, ou te momoli atu le fa’afetai, fa’afetai, fa’afetai tele. E le mafai ona galo i le loto a oulua fautuaga ma tima’iga lelei i aso uma o lo’u olaga. Fa’afetai mo la oulua tausiga, fa’afetai mo la oulua tapua’iga, a’o o’u alo atu i a’u a’oa’oga. Ou te alofa pea mo oulua o’u matua pele.

“Mo nai o’u aiga, fa’afetai i la outou tapua’iga, mo le susuga i le Fa’afeagaiga ma le Faletua o lo’o fa’afalelemalu i totonu o le afio’aga, fa’afetai fai tatalo, ua i’u i le manuia le taumafaiga, fa’afetai fa’afetai tele.

“Le mamalu o le aofia, i lo’u ava ma lo’u fa’aaloalo e tatau ai, ou te fa’alauiloa aloa’ia atu ai nai o’u matua pele, Lameko ma Tagiilima, tula’i mai fa’amolemole.” Ua tula’i Lameko ma Tagiilima, ma na va’aia e tagata le savali mai o Loimataoapaula ma feiloa’i atu i ona matua. Ua tau le mafai e le teine ona tu’u ‘ese lona tama i lea taimi, ua fa’apena fo’i i si ona tina. O le ala lea na tu a’e ai i luga le tama o Lolesio ma tau ta’ita’i i luma lona tuafafine.

Ua toe tula’i Loimataoapaula, ma ua fa’alauiloa ai loa ona tuagane ma le Fa’afeagaiaga ma lona faletua o lo’o auai i le sauniga, ae maise o nai ona aiga sa auai. Ina ua ma’ea le sauniga, ma ua o’o fo’i i le taimi e fa’aula ai le au fa’ai’uaso, na fa’ateia le lo’omatua o Tagiilima, ina ua va’ai mai, o alu atu le solo a ona tuagane ma lona uso ma a latou fanau e fa’aula Loimataoapaula. Sa leai se manatu o Tagiilima o le a o’o ane ona tuagane ma lona uso e to’atasi o Malia, peita’i, ua le gagana le lo’omatua i lea taimi. Ua va’ai atu ma le alofa i si ona aiga lea ua taunu’u ane mo le fa’au’uga o lana tama o Loimataoapaula. O le isi itu na toe manatua nei e le lo’omatua, e le i fa’ailoa pe na logo fo’i lona aiga e tusa ai ma le fa’au’uga o Loimata, a’o lenei ua va’ai atu ua o’o mai. Na iloa e le aiga o Tagiilima i tua le aso o le fa’au’uga o Loimata, ona o le atali’i o Lolesio, lea o lo’o a’oga i le A’oga a Sagato Sanele i Moamoa, o ia lea sa fa’ailoaina le fa’au’uga o Loimata i ona matua. Sa nonofo sauniuni pea i ai lona aiga, ma ina ua o’o i le aso o le fa’amoemoe o Loimataoapaula, o lea ua masi’i mai ai le fala si’i gata o le aiga e fa’ailoa o latou alofaga ma pelega mo le fanau a Tagiilima.

E faia pea!