Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea feiloa’i atu ai le tamaitiiti o Fatu isi ona tina fai o Pauline, ma tagi ai lava i luga o lona tau’au, ma ua ‘avea lea ma itu ua fetagisi atu ai uma ma nai ona tei laiti.]

Na umi se taimi o fusi mau e le tamaitiiti o Fatu si ona tina fai o Pauline ma tagi lava, e o’o lava fo’i i nai ona tei ua fetagisi uma atu ai ma i latou i le tagi a Fatu. Ina ua tuana’i ni nai minute o le lauega lea o lo o faia, ona savali atu loa lea o le tamaitiiti ma si’i mai ato o lo o ‘aumai ai le oso o lana malaga, ma tufatufa fiafia atu i nai ona tei ma si ona tina, ao fa’asolosolo lana va’ai i suiga ua i ai totonu o le fale i le manaia o lona teuteuina, e o’o lava fo’i i le tulaga ua i ai nai ona tei laiti ma o latou lavalava, o latou foliga ma mea uma ua matua sui lava i le va’ai a le tamaitiiti o Fatu.

Ui o lea, na te le’i vave  fa’ailoaina i si ona tina fai le pogai o lona toe fo’i atu i se taimi e lei mafaufauina e toe asiasi atu ai i lo latou aiga i Amouta. O le teineitiiti laitiiti lava na muamua fesili ia Fatu pe na fa’afepea ona sau, ona ata lea o le tama tali atu isi ona tei, “Na ou sau i le va’a.” “E te le’i malemo la i luga o le sami i le taimi na e sau ai i le va’a?” o le toe tulitatao atu lea a le laitiiti lea na alu ai le tali e a le aiga ona o le malie o ana fesili, ae o Fatu, na ata mo ni nai sekone ona tali mai lea isi ona tei, “E leai, sa i ai Seila o le va’a e fesoasoani i le pasese ina nei malemo se isi, ou te le’i malemo fo’i.”

Ua le ‘iloga se tala fiafia na fa’amatala e uiga i le fa’amuli, ma o ni isi o ia tala e aofia ai tulaga lelei o tamaiti i le su’ega fa’ai’u o le tausaga, atoa ai ma ripoti o le kuata muamua ma le lua lea ua maua mai, ma o se tala fiafia lea na toe lu’i ai le loto o le tamaitiiti o Fatu, e tatau ona toe vave fo’i e fa’auma lana a’oga ae maise o lea ua i ai nei i le vasega fa’ai’u. O le mae’a ai o tala e fa’atatau i le fa’amuli ma le tulaga sa i ai le aiga i Amouta, na amata tu’u fesili ai loa le fafine o Pauline ia Fatu e uiga i le la fa’amuli ma si ona tama o Pulusi i lo latou aiga i Palisi, ma e le’i i ai lava fo’i se fesili e le’i taliina e le tamaitiiti, peita’i ina ua fesili Pauline po o a mai Pulusi, na nofo ai loa i’ina Fatu ua le gagana. Na toe fesili Pauline ia Fatu po o a mai si ona tama, ae sa na o le nofo lava o le tamaitiiti e le tali, o lea na toe fesili atu ai loa ma Pauline i le tamaitiiti, “Sole Fatu, o a mai si ou tama o Pulusi ma le lua fa’amuli?”, e lei gagana Fatu i se tala sei vagana ai le maligi o ona loimata ma ua le mafai lava ona ia faia se tala i lea taimi ona o lona tagi tele. Na ona maua lava o sina to’a o le tamaitiiti mai le tulaga mafatia o lo o i ai lona mafaufau, ona ia ea atu loa lea i luga ma fa’apea atu isi ona tina fai ma lona aiga, “Ia outou loto tetele, o Pulusi ua uma lona soifua i se fa’alavelave fa’afuase’i.”