Ads by Google Ads by Google

Ta’aloga Afeleti a le Fanau A’oga Maualuluga

O se taumafaiga e mafai ona fa’ateleina le aoga i le fanau, pe afai e sapaia e le to’atele, le taumafaiga a fanau a’oga i a’oga maualuluga o lo tatou malo, ina ia tutu’u i tu’uga tamo’e ma isi ta’aloga afeleti lea e fa’atautaia i lenei vaitaimi.

O aso Gafua ta’itasi ma aso Lulu ta’itasi sa amatalia mai ai ona faia tu’uga fa’aa’oa’o, ina ia mata’i e le fanau tauva, po ’o fea le tu’uga e fia tauva ai. O se mea lelei, e leai se muta’aga o ituaiga tu’uga e mafai ona e tauva ai, e tasi le tamaitiiti, ae tolu pe fa isi tu’uga o le afeleti e mafai ona ta’alo ai.

“E tatau ona silafia e i latou o lo ’o fa’auluulu i Ta’aloga a A’oga Maualuluga ta’itasi, e le fa’apea e ao ina atoa se to’a 20 o fanau a’oga i lana 'auta’a’alo Afeleti, e te mo’omia lava na’o se to’alua pe to’afa, pe afai lava o le a e sa'ilia patino na’o tamaiti e saoasaoa ma lelei tino mo lea ituaiga o fa’agatama.” O se saunoaga lea a Mahuka mai le DOE ASHAA - Athletics Department.

O le tausaga nei e na’o le to’a 4 a’oga maualuluga a le teritori ua fa’aulu mai e auai i le Ta’amilosaga Afeleti lea ua amatalia. Peita’i, ua mafai ona ulufale mai ni isi fanau a’oga mai isi a’oga maualuluga, i nei lava a’oga e fa ua mae’a fa’aulu o latou igoa e auai.

Ona o le saoasaoa e fua i ai lou agava’a i ta’aloga Afeleti, fa’atasi ai ma le iloa puna pe oso maualuga, togia o le pulu mamafa ma le togia o le pulu salafa, velo o le tao ma le fanafana u, e leai ma se tasi e ono afaina ai lona tino i lenei ituaiga o ta’aloga, ae tele le avanoa e tauva ai ma totogia 'au a’oa’oga maualuluga i Ta’aloga Afeleti.

O lo ’o i ai le Asosi o Ta’aloga Afeleti i lo tatou nei malo, ma ua tatau lava ona to’aga i tatou e fa’amalosia nai a tatou fanau e pa’e’e ma tino u’umi e tauva i nei ituaiga o fa’agatama. E mautinoa o tino o tagata Samoa e matua lava le malosi i so ’o se ituaiga o ta’aloga, ua 'iloga fo’i le malolosi o i latou i ta’aloga fa’atautino, e pei o le Lakapi fa’aperetania, Futipolo fa’a-Amerika, Soka, Faipele, Pi’i ma le Karate, ae o nei ituaiga o ta’aloga e i ai le Afeleti, e le mo’omia ona e fa’aleagaina ai lou tino, ae aoga mo oe lava ia e te sa'ilia ai se pine mo lou malo.

E mautinoa o le Afeleti sa mua’i maua ai le pine 'auro ma le siliva a Samoa i le Olimipeka, i le tama’ita’i o Lisa Misipeka i le togi pulu mamafa, o lea ua toe fa’asolo mai le tausaga o le Olimipeka, sa tatau ona so’o le fau ma le fau i le fa’agatama lea!

Peita’i, afai ua lape lenei tausaga, o lo ’o tele isi tausaga o lumana’i. O le saoasaoa e tatau lava ona 'ausia e so ’o se tamaitiiti umi pe pu’upu’u fo’i, e mama le tino e vave fo’i le tamo’e. O ituaiga tamaiti fo’i lava na e tasi e mafai ona uigi i 'au lakapi, e Receiver i ta’aloga football, pe talitua fo’i i ta’aloga Pesipolo ma le ta’aloga soka ma le Pasiketipolo aua e mana’omia lava le saoasaoa o tatou tama e ta’a’alo ai.

O lea ua fa’atulaga aso e faia ai ulua’i tauvaga tamo’e po ’o afeleti, e sa'ili ai le to’a 6 matua saoasaoa ina ia tauva e sa'ili le tulaga muamua ma fa’asolo ai fa’apena. O le aso Lua o le vaiaso a sau o le a faia ai nei tu’uga e fa’alua i tu’uga tamo’e ta’itasi, ae o le aso Lulu o le vaiaso lava lea a sau nei, o le a fa’atautaia ai ta’aloga togitogi ma’a mamafa, ma’a salafa, velo tao ma isi.

A mae’a ona fa’atulaga le ta’ito’aono maualuluga, ona fa’ato’a faia lea o tu’uga e sa'ili ai tulaga muamua ma fa’asolo mai i tulaga mulimuli ma fa’amaumau ai taimi o tamo’ega i le aso Gafua e mulimuli mai.

Talosagaina Matua ina ia auai mai e sapaia taumafaiga a le fanau, fa’atasi ai ma uso ma tuafafine i a’oga maualuluga e fa ua tauva. O le fa’amatalaga mai, o lo ’o ua i ai tamaiti mai Fagaitua o lo ’o tauva mai le ‘au tamomo’e a Samoana, ma e fa’apena fo’i i le a’oga a Malisi ma Fa’asao, o lo ’o fa’atagaina lea tulaga, ma e fiafia tele le Komisi o Afeleti e talia lea taumafaiga ina ia maua se tasi o talenia i tamo’ega e koleni fa’apitoa mo sikolasipi i fafo, ae maise o le tauvaga a le Olimipeka ma le Oceania lea e le’i o’o lava ni tatou sui e auai i ai.