Ads by Google Ads by Google

Fasiotia Fa’atonu o Nusipepa - Brazil

E foliga mai ua leai lava se i si mea e soloia ai le tulaga o le fa’aalia uma atu e Nusipepa o mea o tutupu ma faia fa’anana mai le mamalu lautele o le atunu’u, peita’i, a fasiotia loa fa’atonu o nusipepa, ona maua lea o se to’omaga o i latou o lo ’o faia solitulafono.

Ua fa’apea ona fasiotia fo’i le ali’i fa’atonu o Paulo Rodrigues, le lona lua lea o fa’atonu o lea lava nusipepa ua fasiotia, e va i nai aso lava, ona o soligatulafono ua fa’ailoa mai e Nusipepa o le Malo o Brazil.

O lea nusipepa ua i ai lea i le setete o Mato Grosso do Sul, ma na tafana lava o ia ma maliu ai. E 12 pulufana na tafanaina ai o ia, ae lima pulufana na featia’i i lona tino.

O le tala mai, o lenei ali’i fa’atonu, e matua tete’e lava lona tagata tautua ma ona manatu i le tele o mea fa’aletonu i totonu o lo latou malo, ma o se tasi sa fa’afetauia o ia i se pasika na tafanaina o ia ma o lea fo’i oga'ele'ele o le atunu’u, e matua tele ai lava fefa’ataua’iga o fuala’au fa’asaina ma vaila’au o’ona.

I le vaiaso fo’i na te’a, o se tasi o tusitala o lea lava nusipepa, Mario Lopez, sa fana fo’i ma maliu ai i Rio de Janeiro, Brazil. O le ali’i fa’atonu ua na’o le 51 tausaga o lona soifua, ma e faigaluega o ia i le nusipepa a le Journal da Praca ae o la latou uepesite o le Mercosulnews.com.

E o’o mai i le taimi nei, ua matua leai lava se afuaga ua lisia e leoleo su’esu’e ua mafua ai lea faiga ua lavea ai Paulo, ae ua na’o le tasi lava le manatu, ona o tala tusia ma ona manatu fa’aalia i ana tusitusiga patino ua mafua ai.

O le tala a se tasi o tagata pu’e ata, Leo Veras, sa ia fa’ailoa ai, “E tele na’ua manatu fa’aalia o lenei fa’atonu, ae matua alofagia ai lava e le to’atele ona o lea itu.” I le tele o taimi i tala tusia ma ata e lomia i le nusipepa lea e sapaia ai ni lagona o’otia o le lautele o le atunu’u o lo ’o le lava le tamaoaiga e soifua ai, ae o lo ’o matele ina fa’aalu vale le tele o le tamaoaiga o le atunu’u i isi mea e le aoga mo tagata uma.

E ui i manatu fa’aalia o lea ali’i fa’atonu, ae o lo ’o faaaloalogia lava o ia e le to’atele o tagata mautofi o lona malo. O se mea fa’afefe lagona, ona ua to’alua ai lea o e tusitala ma fa’atonu o le nusipepa lava e tasi ua fasiotia fa’apea, ae aunoa ma se iloa patino e leoleo po ’o ai le sui ua fa’ao’o sala ia i la’ua.

Na 'avea fa’amalosi le ali’i tusitala ma lona to'alua, ae toe maua atu ua maliliu uma i la’ua.  O ia lava fo’i lea na fasia muamua fo’i ia Iulai o le tausaga ua te’a, ae na soifua mai lava. Ua fa’aalia se manatu o le Komisi e puipuia le vaega o tusitala i totonu o le Malo Amerika, CPJ, “E matua ilitata lava i latou i lea ituaiga o faiga i tagata faigaluega o lea ituaiga o tautua.”

O le fasiotia o sui tusitala e to’alua i se taimi itiiti lava, o se mea tau fa’afefe lea i tagata o lo ’o tautuaina le atunu’u e ala i le fa’ailoa mai o mea e tutupu i totonu o lo latou malo. E i ai le aia tatau a tagata ta’ito’atasi e iloa ai e i latou le fa’atautaiga o la latou malo, o lo ’o faia e tusa ma tulafono o le fa’avae pe leai fo’i.

 saunia: Leua Aiono Frost