Ads by Google Ads by Google

TOE TAOFI SI’ITAGA FALEMA’I

Leai ni tagata faigaluega vaea

O se tala fiafia lenei mo tagata uma o Amerika Samoa, ina ua fa’alauiloa aloaia e le alii kovana i le aoauli ananafi i se fonotaga ma tusitala, le taofia o si’itaga o pili a le falema’i sa amata mai i le vaiaso talu ai, atoa ai ma lona fa’amaonia mai o le leai o ni tagata faigaluega a le falemai e vaea, e pei ona folafolaina mai e le Komiti Faafoe ma le pulega a le LBJ.

Saunoa le afioga Togiola Tulafono e fa’apea, o siitaga i pili o le falemai sa faia i le vaiaso na te’a nei, e pei o le $50 mo le va’aiga o le foma’i, fa’apea ai le $40 sa totogi mo le talavai, atoa ai ma isi lava siitaga, ua taofia nei, i le mae’a ona latou sainia ma le pulega a le falemai i le aso ananafi o se maliliega, e tu’uina atu ai le tupe e $3 miliona lea na pasia mai e le Fono Faitulafono, e fesoasoani ai i a latou galuega ma fesoasoani i faafitauli tau tupe o loo tulai mai ai.

Sa ia fa’alauiloa foi le leai o ni tagata faigaluega a le falemai e vaea e pei ona folafolaina, ae o le a tumau pea ona galulue tagata faigaluega i a latou galuega.

O lenei fa’asalalauga ma le feagaiga e pei ona sainia i le aso ananafi, na faia i le mae’a ai ona fa’alauiloa e le alii kovana i luga o lana polokalama i le vaiaso na te’a nei, lona sauni e fa’amalolo le komiti fa’afoe a le falemai, pe afai e o’o mai i le Aso Lulu na te’a nei, o lo o tumau pea fuafuaga a le falemai e vaea ana tagata faigaluega, e aofia ai ma foma’i, fa’apea ai ma le tumau o a latou siitaga mo pili ma talavai.

O se fonotaga na faia i le aoauli ananafi i le va o le kovana ma le pulega a le falemai o le LBJ, na sainia ai lenei feagaiga ma le fa’amoemoe, o le a fesoasoani i fa’afitauli a le falemai mo le taimi nei.

O le pili tupe lea na pasia e le fono i le vaiaso na te’a nei, sa latou pasia ai se nonogatupe e $3 miliona, e fa’atupe mai i tupe o le Teugatupe o Taui mo Tagata Faigaluega, ma le fa’amoemoe e toe totogi i le tupe e maua mai i le lafoga o totogi e 2%.

O le pili la lea ua sainia nei e le alii kovana ma ua avea nei ma tulafono. Sa saunoa le kovana, ina ua fesiligia e tusitala, afai e vave le aoina mai o le tupe mai le lafoga e 2%, atonu e na o le 12 masina e totogi ai le nonoga tupe lea ae mae’a, pe a fuafua i le aofaiga, pe a ma le $3 miliona, lea e maua mai i le lafoga e 2%, pe a ao e le malo.

O se tasi o va’aiga fa’anoanoa na ta’ua e Togiola, lea ua maitauina i le falemai, talu ona fa’amamaluina mai siitaga i le aso 6 o Fepuari, o le tau leai lea o nisi e asiasi atu i le falemai mo le va’aia o fomai ma fai a latou talavai, e ui o lo o lagona lava pea e le atunu’u le vaivai ma le mama’i, ae ua manatu e nonofo i aiga ona o le taugata o pili a le falemai.

I se pepa o fa’amatalaga na tu’uina mai e le pulega a le falemai, ina ua mae’a ona latou sainia ma le kovana lenei feagaiga, o le fa’aitiitia lea o itula faigaluega a le aufaigaluega, fuafua i le maualuluga o lo o i ai a latou totogi.

O le itula e 8:00 i le taeao nei lea ua faalauiloa mai e le pulega o le falemai a le LBJ o le a taofia ai a latou siitaga ae toe fa’afoi le totogi o a latou pili i le tulaga tuai sa amata mai ai.

Sa fa’amaonia mai foi e le pulega a le falemai e faapea, e amata mai ananafi,o le a leai ni tagata faigaluega a le falemai e faamalolo, lea e pei ona fuafuaina mo le aso 19 Fepuari, sei vagana ai le faaitiitia o itula faigaluega a tagata faigaluega o le a amata i le aso 4 Mati 2012.

Mo i latou uma lava e i lalo mai o le tai $20,800 o latou totogi, e tai 4 itula e faaitiitia mai o latou totogi, o i latou e tai $20,800 e oo atu i le tai $49,999 o latou totogi, e tai 6 itula o le a faaitiitia, o i latou e tai $50,000 e oo atu i le $62,399 o latou totogi, e tai 8 itula e faaitiitia, ma i latou e i tai $62,400 o latou totogi ma luga atu, e tai 12 itula e faaitiitia mai o latou totogi.