E felanulanua’i upu na fa’amatala ai e le alii kovana ma taitai o le Fono uiga tausa’afia na mafai ona o latou a’oa’oina mai i le afioga Senatoa Seui Laau Mautonu, lea ua tu’umalo, a’o latou galulue ai le malo ma le Fono Faitulafono, ma ua manatu ai, o nei fa’ataitaiga uma o le a fai ma a’oa’oga sili mo i latou i le lumana’i.

Saunoa le matua ia Togiola Tulafono, o le afioga i le alii Senatoa ua tuumalo, e le gata o se taitai sa fiafia e tautua mo lona atunuu, ae o ia foi o se taitai e tautua faamaoni, e alofa i lona aiga, e le femoumoua’i lana tofa, e pele ia te ia lona nu’u ae silisili ai lana fanau.

“O se taitai e tumau i le talitonuga ua ia te ia, afai lava e finau Seui i se mea e manatu o le mea sa’o lena, e le toe solomuli ai lana tofa, e le femoumoua’i foi sona taofi, ae finau ina ia mausali le faaiuga ua ia faia,” o se vaega lea o le molimau a le alii kovana, na tuuina atu i le taimi o le sauniga faalemalo mo le alii Senatoa ua tuumalo.

Na fa’atumulia le Fale Samoa o le Fono Faitulafono i taitai o le malo, afioga i le Faamasino Sili, taitai fa’aleaganu’u, sui o le aufai lotu, fa’apea ai le paia o aiganalua na lolofi atu latou te fia molimauina toe sauniga faalemalo o le tofa Seui ua tuumalo.

O le itula e 8:00 na taunuu ai le Sa o le alii Senatoa i le maota o le fono, lea na faafeao atu e malu o le malo, ina ua maea ona ufi lona Sa i le tagavai a le atunuu.

O le susuga ia Rev. Afulupetoa Uta’i, o le Feagaiga a le Ekalesia EFKAS mai Vatia na taitaia le sauniga, lea na ia faamamafaina ai i lana lauga upu faamafanafana a Iesu i luga o le Mauga fai mai, “Amuia e faanoanoa aua e faamafanafanaina i latou.”

O viiga o le Atua na lagiina lea e le aufaipese mai le ekalesia EFKAS mai Vatia.

O le alii kovana na saunoa e fai ma sui o le malo na te momoliina atu se molimau i le soifuaga tautua o le tofa Seui.

Saunoa Togiola i lana molimau, afai e i ai se tagata o loo aumau i Amerika Samoa e le malamalama i le soifuaga o Seui i le taimi lenei, o lona uiga e lei ola mai lea tagata i Amerika Samoa, aua o Seui ua lauiloa lana tautua ma ona talaaga e faatatau i lona soifuaga galue.

O le tele o le soifuaga galue o Seui sa tautua ai mo le malo, peitai e ui sa i ai taimi na se’e atu ai ma tautua i nisi o kamupani tua, peitai o kamupani tua ia o loo tautua foi mo le malo.

Na toe manatua e Togiola le uluai taimi na amata ai ona la masani ma Seui, ao avea o ia ma leoleo o le malo, lea e masani ai ona ia maua mai Seui o faatali pasi atu i Onesosopo, ma faavae mai ai lava iina le la mafutaga seia oo mai i le taimi na avea ai i laua ma taitai o le malo, nuu ma aiga.

“O Seui o se tasi o taitai e pele ia te ia lona nuu ma lona aiga,” o le saunoaga lea a le alii kovana i lana molimau.

O le faamaoniga o le saunoaga a le alii kovana i lana molimau, sa ia taua ai se mataupu na tulai mai i lo la va ma Seui, ina ua maua e Seui le tala ua faasala e le Iuni Lakapi le au lakapi a Nuuuli.

“Sa lelei lava le ma mafutaga ma Seui i le tele o taimi ma aso, ae na maua loa e le alii Senatoa le tala ua faasala lana au lakapi, tu loa Seui e puipui le au lakapi a lona nuu, e le o se mea leaga la lena mea, ae o iina na atagia mai ai le ituaiga taitai e i ai Seui,” o le saunoaga lea a le alii kovana.

Na teena ai foi iina e Togiola ni tala faapea sa fai ai iina se la va ma le alii Senatoa, peitai i lona talitonuga, ona o uiga lava o le alii Senatoa i lona tautua ai i lona aiga ma lona nuu.

O le taeao nei lea ua faamoemoe e faia ai toe sauniga o Seui i le malumalu o lana ekalesia EFKAS i Nuuuli, ma lagomau atu ai loa i lona oliolisaga tumau, i lona aiga lava i Nuuuli.