Ads by Google Ads by Google

FA’AVAE LOTO TAGAVAI ALOAIA AI TUUMALO AFIOGA SENATOA SEUI

I le faagasolo ai o toe sauniga o le afioga i le alii Senatoa ia Seui Laau i le taeao nei, ua poloaina ai e le afioga i le kovana sili le sisi faavaeloto lea o tagavai uma i totonu o le teritori, e amata mai i le taeao o le aso e oo atu i le goto o le la i le aso a taeao, 17 Fepuari, ina ia aloaia ma faaaloalogia ai le tuua o le malo e lenei tamalii o le atunuu.

I sana poloaiga na tuuina mai i le aso ananafi, ua poloaina ai e le afioga Togiola Tulafono le Matagaluega o Leoleo, ina ia faatinoina uma tiute ma faia faaaloaloga uma e tatau ai i taimi o toe sauniga o le alii Senatoa.

I se vaega o lana poloaiga, ua talosagaina ai e le alii kovana le atunuu uma ina ia auai faatasi i le molimauina ma le faaaloalogiaina lea o toe sauniga o le afioga Seui.

“O le a manatuaina pea lana tautua mo lona atunuu ma le malo, o lana tautua foi sa ofoina mai faapea ai ma faataitaiga lelei e pei ona ia faatulai o le a tumau ma avea ma faataitaiga mo tupulaga mo le lumana’i,” o le saunoaga lea a le alii kovana.

O le taeao nei i le itula e 8:30 ua faamoemoe e faataunuuina ai le sauniga faalemalo a Seui i le maota o le Fono Faitulafono, lea o le a molimauina e ona uso a Senatoa faapea ai afioga i faipule o le maota o sui.

O se vaega o le sauniga i le taeao nei ua faamoemoe e tauaao aloaia atu ai e le alii peresetene o le Senate ia Gaoteote Palaie Tofau se iugafono a le Senate ua pasia e  maota e lua, e momoli atu ai le agaga o faamaisega ma le faamafanafanaga a le Fono ma tagata Amerika Samoa, i le faletua/tausi ia Palepa Milovale Gagau Sanitoa Seui ma le aiga Sa Seui, ona o le tuumalo o le alii Senatoa, ma momoli atu ai le agaga faamalo mo le faafetai i lana tautua matavela mo tagata o Amerika Samoa.

O le afioga Seui na soifua mai i le aso 24 Me, 1942, ae valaauina e le Atua i le aso 26 Ianuari 2012 ina ua 69 tausaga o lona soifua.

O loo taua i le iugafono e faapea, o i latou uma e silafia Seui, latou te molimauina lona soifuaga, o ia o se tagata e tautala sa’o, ma o se tasi lea o uiga tumau i lona soifuaga atoa.

E 47 tausaga o lana tautua i le malo o Amerika Samoa, ao lei filifilia o ia i le tausaga e 2009 e avea ma se tasi o Senatoa mo le itumalo o Ituau i le maota maualuga a le Senate.

O lana uluai galuega sa avea ai ma failautusi o mea faigaluega a le Ofisa o Tautua Faa-Ofisa, ma tofia ai loa e avea ma failautusi i vaega tau tupe mo le kamupani o le StarKist Samoa.

Ina ua mavae ni nai tausaga sa toe foi atu o ia ma toe faaauau lana galuega mo le malo o Amerika Samoa, ma avea ai ma taitai failautusi mo le matagaluega o Galuega Lautele, sosoo ai ma tausaga e lua sa galue ai o se Tagata e Fuafuaina mea tau tupe a le Fono Faitulafono, ma toe foi atu ai ma galuega i le Ofisa o Faatauaiga a le malo mo tausaga e 8.

Sa amata galue o ia i le tofiga o le Fesoasoani faapitoa i le Faatonu, sosoo atu ai ma le Faatonu Lagolago, mulimuli ane ai loa avea ma Faatonu o lea matagaluega.

I le tausaga e 1968 ina ua faatoa 26 ona tausaga ao suafa ia Laau Seui, sa ia talia ai le fanoga a  lona aiga na te nofoia le suafa Seui, ma la nofolua ai ma le tofa Seui Afa, ma ia tausia ai loa le aiga ina ua tuumalo Seui Afa ina ua tuanai le 20 tausaga, ma faaauau ai lava lona tausiaina o lona aiga, nuu ma le ekalesia i lona afioaga o Nuuuli mo le 40 tausaga.

O Seui o se tiakono e galue malosi i galuega a lana ekalesia EFKAS i Nuuuli, o ia foi o le tiakono taitai, o le taitai pese a le aufaipese a le Osana Aleluia ma le aufaipese tuu faatasi a lana ekalesia i Nuuuli, o ia foi o le taitai o le komiti o Atinae a le ekalesia.

O se tama sa ia faia ni faataitaiga lelei mo lana fanau ina ia avea i latou ma taitai o le malo ma le ekalesia, lea e pei ona avea ai lona atalii matua o Larry S. Sanitoa ma faipule o le maota o sui, o ia foi o le taitai o le Faalapotopotoga Faavaomalo o Fatuoaiga, Ituaiga o Aiga Paia, ae o lona atalii laititi o Mikaele o le faifeau faamaoni mai Piula a le Ekalesia Metotisi.

O Seui, o ia o le taitaifono o le Komiti o Galuega o le malo a le Senate, sui taitai fono o le komiti o Tagata Litaea, e avea foi o ia ma totino o nisi o komiti a le maota maualuga.

Ia faamaise le Agaga Paia o le Atua i aiga faanoanoa ona o le tuua o le malo e le alii Senatoa ia Seui.