Ads by Google Ads by Google

ASOA - Polokalama Su’isu’i mo Tina

O se va’aiga matagofie le toe to’aga o tina uma ua avea ma totino o le ASOA e taumafai ona fa’aa’oa’o i le tomai e Su’isu’i lelei ai la’ei o tama, le fanau ae maise i latou lava, e ala i le a’oa’oga fa’apitoa ua ofoina mai e le Kolisi Tu’ufa’atasi i le Vaega o le Land Grant - Consumer Science - a’o le A’oga Su’isu’i e a’oa’oina e le Tama’ita’i o Diana Tarrant ma lana soa mai le NEG Program.

O le polokalama lenei e le totogia le tama’ita’i Faia’oga, fa’apea fo’i ma le fa’aaogaina o la’au su’isu’i, ae o le mea taua, ia mae’a le 3 masina o lau a’oa’oga fa’apitoa lenei i le su’isu’i, ua e iloa su’isu’i ma e mafai ona maua ai sou avanoa e faigaluega ai, po’o le gafatia ai fo’i e oe le tina, ona su’ia la’ei o le aiga, ma isi mea uma lava e teuteu ai lou maota.

I le polokalama lea o le su’isu’i, ua atofaina ai mo le ASOA le aso Lua e ta’itolu itula o le aso e fa’aaogaina ai le itula e 9:00 i le taeao se’ia o’o i le 12:00 i le aoauli. E le fa’ailogaina so’o se tasi e mafai ona a’oa’oina i ai nei tomai, afai fo’i o oe o le tagata matua, ua silia ma le 55 tasuaga o lou soifua, ua e agava’a e auai i le ASOA ma avea ai oe o se tasi e ulufale i lea a’oa’oga su’isu’i.

E 10 la’au su’isu’i na avatu e fa’aaogaina e i latou i le polokalama, ma o ia meatotino o lo’o i lalo o le Polokalama a le Land Grant.

Ua va’aia nai tina ua fai matatioata aua ua amata ona leaga le va’ai, ae ua toe taumafai i tiute nei. Ae o le latou fa’afetai, ua maua se avanoa e faia ai nei tiute aoga, o se tomai fo’i e ao ina fa’a’auupegaina ai so’o se tina, po’o se faletua aua e tatau ona sefe mai le tupe fa’asoa a le aiga, pe a ‘aumai lava gafa ie ma tasu’i ai lava e oe la’ei o si ou aiga atoa.

E tolu masina e fa’atautaia ai nei a’oga, ona muta lea, ae maua tusi pasi o i latou na a’oa’oina ai fa’apitoa. O lona uiga, o fa’alapotopotoga nei sa amatalia mai latou a’oga ia Ianuari, o le a fa’au’uina mai i le latou vasega lea ia Aperila 2012.

O se tala fiafia, e le o motusia le lisi a le faletua o Diana Tarrant, aua o le iloa atu lava e lea ekalesia o lea alamanuia, fa’aopoopo le vaega o lea lisi fa’atalitali. I vasega ta’itasi, ua manatu le tama’ita’i o Tarrant e ao ina silia ma le 10 sui e a’oa’oina ai. “Ia aoga a’ia’i lo’u taimi, ia to’atele fo’i nisi e fia maua lea atamai fa’apitoa e su’isu’i ai.”

E fa aso o le vaiaso e faigaluega ai Tarrant e fai a’oga i ana sosaiete ua atofa mo aso ta’itasi o le vaiaso, ae o lona aso Faraile lava ia, e nofo ai o ia e fa’atautaia pepa fa’amaumau mo sui uma o lo’o aofia i ana polokalama ta’itasi, ina ia mautinoa, o lo’o faia le faiva e tusa ai ma ona tulafono tamau, ia mautinoa e amana’ia le tusi pasi o le a umia e so’o se tasi lava sa a’oa’oina fa’apitoa.

I le ulua’i masina o le polokalama e faia lava a’oa’oga i potu a’oga, e le’i o’o lava i le masini e fa’ata’ita’i ona su’ia se la’ei po’o se taga aluga. E i ai tomai eseese e ao ina iloa patino e so’o se tasi, ona fa’ato’a iloa lelei lea, ona tipi se ofu. O le ala lea o nei a’oa’oga amata i potu a’oga.

 O le masina lenei o Fepuari, ua nonofo ai le ASOA i luma o la’au su’isu’i, ma ua va’aia ai le gafatia e i latou ona su’ia o latou puletasi. Ona o lenei fo’i aso o le aso mo Manamea, atonu o le faletua o Diana Tarrant lava le tina ua sili ona to’atele ana manamea na maua i lea aso, aua na mae’a loa le a’oa’oga, ona soso’o lea ma le latou ‘aiga fa’apitoa mo le Manamea. Ua latou fa’afetaia fo’i se manamea ua maua e le ASOA ua atoa le 20 tausaga, talu ona ia a’oa’oina le su’isu’i i le to’atele o tina ma fanau a’oga i le polokalama a le Family Consumer a le Land Grant.

O se ‘aiga fiafia, aua e le lau maua fo’i se vasega e uma loa le a’oa’oga matua fuli mai le vasega a toe fafaga le faia’oga e fa’ailo ai lo latou fiafia ma le agaga fa’afetai i mea ua latou iloa.